1 तेस दिने ई मूसे रे बिधानो री कताब लोका खे पढ़ी की सुणाई ओर तिदे ये लिखेया रा मिलेया, कि कोई अम्मोनी या मोआबी परमेशरो री सभा रे कदी नि आई सकदा; 2 कऊँकि सेयो रोटी-पाणी लई की इस्राएली लोका साथे मिलणे नि आए, बल्कि तिने बिलाम तिना खे स्राप देणे खे पेंट देई की बुलाया था, तेबे बी म्हारे परमेशरे से स्राप आशीषा दे बदली ता। 3 ये बिधान सुणी की, तिने इस्राएलो बीचा ते दूजे कराने रे लोक आपू बीचा ते लग करीते। 4 इजी ते पईले एल्याशीब पुरोईत जो म्हारे परमेशरो रे मन्दरो रे कमरे रा अधिकारी ओर तोबियाह रा रिश्तेदार था। 5 तिने तोबियाह खे एक बड़ी कोठरी त्यार कित्ती थी जिदे पईले नज्जो री बलिया रा समान ओर लोबान ओर पांडे ओर नज्ज, नया शराब ओर जैतूनो रे तेलो रा दशमांश, जेतेखे लेवी, गाणे वाल़े ओर द्वारपाला खे देणे री आज्ञा थी, तेती राखी राखे थे ओर पुरोईता खे चकी री पेंट बी राखो थे। 6 जेस बखते ये ऊआ आऊँ यरूशलेम शईरो दे नि था, कऊँकि बाबेलो रे राजा अर्तक्षत्रो रे बत्थिये साले आऊँ राजे गे चली गा था। तेबे मैं बऊती दिना बाद राजे ते छुट्टी मांगी, 7 ओर आऊँ यरूशलेम शईरो खे आया, तेबे माखे पता लगी गा, कि एल्याशीबे तोबियाह खे परमेशरो रे मन्दरो रे आँगणो रे एक कोठरी त्यार करी की, कितणी बड़ी बुराई करी राखी। 8 ये माखे बऊत बुरा लगेया ओर मैं तोबियाह रे कअरो रा सारा समान तेस कमरे ते बारे सेटी ता। 9 तेबे मेरी आज्ञा ते सेयो कमरे शुद्ध कित्ते ओर मैं परमेशरो रे मन्दरो रे पांडे ओर नज्जो री बलिया रा समान ओर लोबान तिना दे फेर रखवाई ता। 10 फेर माखे पता लगेया कि लेविया रा इस्सा तिना खे नि देई राखेया ओर इजी बजा ते काम करने वाल़े लेविये ओर गाणे वाल़े आपणे-आपणे डोरूआ खे नठीगे रे। 11 तेबे मैं परदाना खे बकी की बोलेया, "परमेशरो रा मन्दर कऊँ त्यागेया?" तेबे मैं सेयो कट्ठे करी की, एक-एक तेसरी जगा पाँदे नियुक्त कित्ते। 12 तदुओ ते सारे यहूदी नज्ज, नया शराब ओर जैतूनो रे तेलो रा दशमांश पण्डारो दे ल्याऊणे लगे। 13 मैं पण्डारो रे अधिकारी शेलेम्याह पुरोईत ओर सादोक मंत्री ओर लेविया बीचा ते पदायाह ओर तिना ते थाले हानान, जो मत्तन्याह रा पोता ओर जक्कूरो रा पाऊ था, नियुक्त कित्ते; सेयो तो परोसे जोगे गिणे जाओ थे ओर तिना रा काम आपणे पाईया बीचे बांडणे रा काम था। 14 ओ मेरे परमेशर! मेरा ये काम मेरे कल्याणो खे याद राख ओर जो-जो अच्छे काम मैं आपणे परमेशरो रे मन्दर ओर तिजी री आराधना रे बारे दे कित्ते, तिना खे नि पुलणा। 15 तिना दिना देई मैं यहूदा दे बऊत लोक देखे जो रामो रे दिने कुण्डा दे दाख केसो थे ओर पूल़िया ल्याओ थे ओर गह्देया पाँदे बोज लादो थे; तेड़े ई सेयो शराब, दाख, दाऊगल़े ओर कई प्रकारा रा बोजा रामो रे दिने यरूशलेम शईरो दे ल्याओ थे; तेबे जेस दिने सेयो खाणे-पीणे रिया चीजा बेचदे माखे दिशे, मैं तेस दिने ई तिना खे बताईता। 16 तेबे यरूशलेम शईरो दे सोरी शईरो रे कुछ लोक रओ थे। सेयो मछली ओर कई प्रकारा रा समान ल्याई की, यहूदिया खे यरूशलेम शईरो दे रामो रे दिनो दे बेचेया करो थे। 17 तेबे मैं यहूदा रे अमीरा खे बकी की बोलेया, "तुसे लोक ये क्या बुराई करने लगी रे, जो रामो रा दिन अपवित्र करने लगी रे? 18 क्या तुसा रे बुजुर्ग एड़ा नि करो थे? ओर क्या म्हारे परमेशरे ये सारी मुसीबत आसा पाँदे ओर एस शईरो पाँदे नि पायी? तेबे बी तुसे रामो रे दिनो खे अपवित्र करने ते इस्राएलो पाँदे परमेशरो रा रोष ओर बी पड़काओए।" 19 जेबे रामो रे पईले दिने यरूशलेम शईरो रे बड़े द्वारो रे नेड़े-तेड़े न्हेरा ऊणे लगेया, तेबे मैं आज्ञा दित्ती, कि शईरो रे दरवाजे बन्द करी देयो ओर ये बी आज्ञा दित्ती, कि यो रामो रे दिन पूरे ऊणे तक नि खोलणे। तेबे मैं आपणे कई नौकर बड़े द्वारो रे अधिकारी ठराईते, ताकि रामो रे दिने कोई बोजा पीतरे नि आओ। 20 इजी री खातर बपारी ओर कई प्रकारा रा समान बेचणे वाल़े यरूशलेम शईरो ते बारे एक या दो बार रये। 21 तेबे मैं तिना खे चतौणी देई की बोलेया, "तुसे लोक दवाला रे सामणे कऊँ रूकी रे? जे तुसे फेर एड़ा कित्तेया तो मां तुसे कैद करी लणे।" तेबे तेस बखतो ते सेयो रामो वाल़े दिने नि आए। 22 तेबे मैं लेविया खे आज्ञा दित्ती, कि आपू-आपू खे शुद्ध करी की बड़े द्वारा री रखवाल़ी करने खे आया करो, ताकि रामो रा दिन पवित्र मानेया जाओ। ओ मेरे परमेशर! मेरे कल्याणो खे ये बी याद राख ओर आपणी बड़ी दया रे मुताबिक मां पाँदे दया कर। 23 तेबे तिना दिना दे माखे एड़े यहूदी दिशे, जिने अशदोदी, अम्मोनी ओर मोआबी शईरो री जवाणसा साथे ब्या करी ला था। 24 तिना रे बाल़का री आदी बोली अशदोदी थी ओर सेयो यहूदी बोली नि बोली सको थे, सेयो दुँईं जातिया री बोली बोलो थे। 25 तेबे आऊँ तिना खे बकेया ओर कोसणे लगेया ओर तिना बीचा ते कई कूटवाये ओर तिना रे बाल़ पटवाये ओर तिना खे परमेशरो री ये कसम खुल़ाई, "आसा आपणी बेटिया रा ब्या तिना रे माठेया साथे नि करना ओर ना आपू खे ओर ना आपणे माठेया साथे तिना री बेटिया रा ब्या करना। 26 क्या इस्राएलो रा राजा सुलैमान एस पापो दे नि फसेया था? बऊत सारी जातिया बीचे तेस जेड़ा राजा कोई नि ऊआ ओर से आपणे परमेशरो रा प्यारा बी था ओर परमेशरे से सारे इस्राएलो पाँदे राजा बणाया, पर तेसखे बी दूजी जातिया रिये जवाणसे पापो दे फसाया। 27 तो क्या आसे तुसा री सुणी की एड़ी बुराई करिए कि दूजी जातिया रिया जवाणसा साथे ब्या करी की परमेशरो रे खलाफ पाप करुँ?" 28 ओर एल्याशीब बड़े पुरोईतो रे पाऊ योयादा रा एक पाऊ, होरोनी शईरो रे सम्बल्लतो रा जवांई था, इजी री खातर से मैं आपू नेड़ा ते नठाईता। 29 ओ मेरे परमेशर तिना खे याद राख, कऊँकि तिने पुरोईत ओर लेविया री वाचा खे अशुद्ध करी राखेया। 30 ईंयाँ मैं सेयो सब दूजी जातिया ते शुद्ध कित्ते ओर एक-एक पुरोईत ओर लेविया री बारी ओर काम ठराईता। 31 तेबे मैं लकड़िया री पेंट ल्याऊणे रे खास बखत ठराईते ओर पईली-पईली उपज देणे रा इन्तजाम बी कित्तेया! ओ मेरे परमेशर! मेरे इना खरे कामा करने रिया बजा ते माखे याद राख।