1 क्षयर्ष नाओं रे राजे रे दिना दे यो गल्ला ऊईया, ये सेई क्षयर्ष ए, जो 127 राजा पाँदे, मतलब हिन्दूस्तानो ते लई की कूश देशो तक राज करो था। 2 तिना दिना देई जेबे क्षयर्ष राजा आपणी तेसा राजगद्दिया पाँदे विराजमान था जो शूशन नाओं रे राजगढ़ो दे थी। 3 तेती तिने आपणे राज्य रे तीजे साले आपणे सारे काम करने वाल़ेया खे ओर परदाना खे पाट्टी दित्ती। फारस ओर मादै रे सेनापति ओर राज्य-राज्य रे परदान ओर हाकिम तेसगे आए। 4 से तिना खे बऊत दिना तक बल्कि 180 दिना तक आपणे राजमईलो रा वैभव ओर आपणे कीमती पदार्थ दखांदा रया।

5 इतणे दिन बीतणे पाँदे राजे क्या छोटे, क्या बड़े तिना सबी खे बी जो शूशन नाओं रे राजगढ़ो दे कट्ठे ऊए थे, राजमईलो रे बगीचे दे खुली जगा दे साता दिना तक पाट्टी दित्ती। 6 तेथो रे पड़दे सफेद ओर नीले सूतो रे थे ओर रेशम ओर बैंगणी रंगो री डोरिये की चाँदिए रे छल्लेया दे संगमरमरो रे खम्बेया दे लगी रे थे ओर तेथो री चौकिया सूईने-चाँदिए रिया थिया ओर लाल, सफेद, पिऊँल़े ओर काल़े संगमरमरो रे बणे दे मारबल मेल्ले दे बछाई राखे थे। 7 राजे रे मईमाना खे सूईने रे ग्लासा दे शराब देई जाओई थी। यो ग्लास लग-लग प्रकारा रे ओ थे। राजा बऊत उदार सबाओ रा था ओर से तिना खे बऊत शराब पल़्याओ था। 8 पीणा तो नियमो रे मुताबिक ओ था, केसी खे जबरदस्ती नि पल़्याया जाओ था, कऊँकि राजे तो आपणे मईलो रे सबी पण्डारिया खे आज्ञा देई राखी थी कि मईमाना री इच्छा ओ तेस साथे तेड़ा ई बर्ताओ करना। 9 तेस ई बखते वशती राणिये बी राजा क्षयर्षो रे मईलो दे जवाणसा खे पाट्टी दित्ती।

10 सातुए दिने जेबे राजे रा मन शराबो दे मगन था, तेबे तिने महूमान, बिजता, हर्बोना, बिगता, अबगता, जेतेर ओर कर्कस नाओं रे सातो खुसरेया खे जो क्षयर्ष राजे सामणे सेवा-टईल करेया करो थे, आज्ञा दित्ती, 11 वशती राणिया खे राजमुकुट धारण करी की राजे रे सामणे ली आओ, जेते कि देशो-देशो रे लोका ओर परदाना रे सामणे तेसा री सुन्दरता सामणे आओ, कऊँकि से देखणे दे बऊत बांकी थी। 12 जेबे वशती राणिया खे खुसरेया रे जरीये राजे री ये आज्ञा मिली तो तेसे आऊणे ते ना करी ती। ये सुणी की राजे खे बऊत गुस्सा आया।

13 तेबे राजे बखतो रा पेत जाणने वाल़े पण्डता ते पूछेया (राजा तो निती ओर न्याय रे सबी ज्ञानिया साथे एड़ा ई करेया करो था। 14 तेसगे कर्शना, शेतार, अदमाता, तर्शीश, मेरेस, मर्सना, ओर ममूकान नाओं रे फारस ओर मादै रे सात सेनापति थे, जो राजे रा दर्शण करी की खास-खास पदा पाँदे नियुक्त करी राखे थे।) 15 राजे तिना लोका ते पूछेया, "वशती राणिये राजा क्षयर्षो री खुसरेया रे जरीये दित्ती री आज्ञा नि मानी, तो नियमो रे मुताबिक तेसा साथे क्या करना चाईयो?" 16 तेबे ममूकाने राजा ओर परदाना री मौजुदगिया दे ज्वाब दित्तेया, "वशती राणिये जो गल़त काम करी राखेया, तेसे ना बस राजे साथे बल्कि सबी परदाना साथे ओर तिना सबी देशा रे लोका साथे बी जो राजा क्षयर्षो रे सबी राजा दे रओए। 17 कऊँकि राणिया रे एस कामो री चर्चा सबी जवाणसा बीचे ऊणी ओर जेबे ये बोलेया जाणा कि राजा क्षयर्षे वशती राणिया खे आपू सामणे ल्याऊणे री आज्ञा दित्ती, पर से नि आई, तेबे तिना बी आपणे-आपणे लाड़े तुच्छ जाणने। 18 तेबे आजके दिन फारसी ओर मादी परदाना रिया जवाणसा जिने राणिया री ये गल्ल सुणी राखी, तो तिना बी राजे रे सबी परदाना खे एड़ा ई बोलणा; इजी बजा ते बऊत ई नफरत ओर रोष पैदा ऊणा। 19 अगर राजे खे अच्छा लगो, तो ये आज्ञा निकयाल़ो ओर फारसी ओर मादिया रे कानूनो दे लिखी बी जाओ, जेते खे कदी बदली नि सको कि वशती राणी क्षयर्ष राजे सामणे फेर कदी नि आओ ओर राजा पटराणिया रा पद केसी दूजिया खे देई देयो, जो तेसा ते ठीक ओ। 20 तेबे जेबे राजे री ये आज्ञा तेसरे सारे राज्य दे सुणाई जाणी, तेबे तिना सबी जवाणसा छोटे, बड़े आपणे-आपणे लाड़ेया री इज्जत करेया करनी।" 21 ये गल्ल राजा ओर परदाना खे पसन्द आई ओर राजे ममूकानो री सलाह् मानी ली ओर एते गल्ला पाँदे फैंसला लया। 22 तेबे राजे हर राज्य रे अक्षरा रे ओर हर जातिया री पाषा रे पर्चिया पेजिया कि सब मर्द आपणे-आपणे कअरो ओर बच्चेया पाँदे पूरा अक्क चलाओ ओर आपणी जातिया री पाषा बोलेया करो।