1 तेबे राजा ओर हामान एस्तेर राणिया री पाट्टिया रे आए। 2 ओर राजे दूजे दिने शराब पींदे-पींदे एस्तेरा ते फेर पूछेया, "ओ एस्तेर राणी! तेरी क्या प्रार्थना ए से पूरी करी जाओ ओर तूँ क्या माँगणा चाएयी? माँग ओर आदे राज्य तक ताखे देया जाणा।"* 3 एस्तेर राणिये ज्वाब दित्तेया, "ओ राजा! जे तूँ मांते खुश ए ओर राजे खे ये ठीक लगो, तो मेरी‍ प्रार्थना ते माखे ओर मेरे माँगणे ते मेरे लोका खे प्राणो रा दान मिलो। 4 कऊँकि आऊँ ओर मेरी जातिया रे लोक बेचीते रे ओर आसे काये जाणे वाल़े ए बल्कि सब नाश ऊणे वाल़े ए, जे आसा खे बस दास-दासिया ऊणे खे बेचदे, तो आऊँ चुप रंदी, ओर आऊँ इतणी छोटी जी गल्ला रिया बजा ते राजे खे दु:ख नि देंदी।"

5 तेबे राजा क्षयर्षे एस्तेर राणिया ते पूछेया, "से कुण ए? ओर केई ए जिने एड़ा करने री इच्छा करी राखी?" 6 एस्तेरे ज्वाब दित्तेया, "से बिरोदी ओर दुश्मण येई दुष्ट हामान ए।" तेबे हामान राजा-राणिया सामणे डरीगा। 7 राजा गुस्से दे आई की शराब छाडी की, राजमईलो रे बगीचे दे निकल़ी गा ओर हामाने ये सोची की कि राजे मेरा नुकशाण सोची राखेया ऊणा, एस्तेर राणिया ते प्राणो रा दान माँगणे खे खड़ा ऊआ। 8 जेबे राजा राजमईलो रे बगीचे ते शराब पीणे री जगा दे वापस आया तेबे क्या देखेया कि हामान तेसा चौकिया पाँदे ई जेते पाँदे एस्तेर बैठी री नपणे लगी रा ओर राजे बोलेया, "क्या ये कअरे ई मां सामणे राणिया साथे जबरदस्ती करना चाओआ?" राजे रे मुंए ते ये गल्ल निकल़ी थी कि सेवके हामानो रा मूँ टखी ता। 9 तेबे राजे सामणे आजीर रणे वाल़े खुसरेया बीचा ते हर्बोना नाओं रे एकी जणे राजे खे बोलेया, "हामानो रे एती पंजा आथ ऊच्चा फाँसिया रा एक खम्बा खड़ा ए, जो तिने मोर्दकैए खे बणाया था, जिने राजे रे कल्याणो री गल्ल बोली थी।" राजे बोलेया, "एसखे इजी पाँदे ई लटकाई देयो।" 10 तेबे हामान तेस खम्बे पाँदे ई जो तिने मोर्दकैए खे बणाया था, लटकाई ता। तेबे राजे रा रोष ठण्डा ऊईगा।