1 बादो ते तेसी दिने क्षयर्ष राजे यहूदिया रे बिरोदी हामानो रा कअर बार एस्तेर राणिया खे देईता। तेबे मोर्दकै राजे रे सामणे आया, कऊँकि एस्तेरे राजे गे बताईता था कि तेस साथे तेसा रा क्या रिश्ता था। 2 तेबे राजे आपणी से छाप जो तिने हामानो ते लई ली थी, खोली की, मोर्दकैए खे देईती ओर एस्तेरे मोर्दकैए खे हामानो रे कअरो पाँदे अधिकारी नियुक्त करी ता। 3 तेबे एस्तेरे दूजी बार राजे खे बोलेया ओर तेसरे पैरा पाँदे पड़ी की, आसू सेटी-सेटी की तेसते गिड़गिड़ाई की प्रार्थना कित्ती कि अगागी हामानो री बुराई ओर यहूदिया रे नुकशाणो री तेसरी साजिश निष्फल करी दे। 4 तेबे राजे एस्तेरा रिया तरफा खे सूईने रा राजदण्ड बढ़ाया।

5 तेबे एस्तेर उठी की राजे रे सामणे खड़ी ऊई ओर बोलणे लगी, "जे राजे खे ठीक लगो ओर से मांते खुश ए ओर ए गल्ल तेसखे ठीक लगो ओर आऊँ बी तेसखे अच्छी लगूँई, तो जो पर्चिया हम्मदाता अगागीए रे पाऊ हामाने राजे रे सबी राजा दे यहूदिया खे नाश करने री साजिश करी की लिखाईया थिया, तिना बदलणे खे लिखेया जाओ। 6 कऊँकि आऊँ आपणी जातिया पाँदे पड़ने वाल़ी तेसा मुसीबता खे किंयाँ देखी सकूँई? ओर आऊँ आपणे टब्बरो रा नाश किंयाँ देखी सकूँई?" 7 तेबे क्षयर्ष राजे एस्तेर राणी ओर मोर्दकै यहूदिये खे बोलेया, "आऊँ हामानो रा कअर बार तो एस्तेरा खे देई चुकेया रा ओर से फाँसिया रे खम्बे पाँदे लटकाई ता रा, इजी खे कऊँकि तिने यहूदिया रा बुरा करने री सोची राखी थी। 8 तो तुसे आपणी समजा रे मुताबिक राजे रे नाओं ते यहूदिया रे नाओं पाँदे लिखो ओर राजे री छापा री मोहर बी लगाओ; कऊँकि जो चिट्ठी राजे रे नाओं ते लिखी जाओई ओर तेते पाँदे राजे री छाप लगाई जाओई, तिजी खे कोई बी पल्टी नि सकदा।" 9 तेस ई बखते मतलब सीवान नाओं रे तीजे मीन्ने रे तेईए दिने राजे रे लेखक बुलाए ओर जेसा-जेसा गल्ला री आज्ञा मोर्दकैए तिना खे दित्ती थी से यहूदिये ओर राज्यपाले हिन्दूस्तानो ते लई की कूशो तक, जो 127 राज्य थे, तिना सबी रे परदान ओर परदाना खे एक-एक राज्य रे अक्षरो दे ओर एक-एक देशो रे लोका री पाषा दे ओर यहूदिया खे तिना रे अक्षरा दे ओर पाषा दे लिखिया।

10 तेबे मोर्दकैए क्षयर्ष राजे रे नाओं ते पर्चिया लिखाई की ओर तिना पाँदे राजे री छापा री मोहर लगाई की, तेज चलणे वाल़े सरकारी कोड़े, खच्चर ओर साँड़णिया पाँदे सवार ऊई की डाक डाकिये रे आथो रे पेजी ती। 11 इना पर्चिया दे सारे शईरा रे यहूदिया खे राजे री तरफा ते ये आज्ञा दित्ती कि सेयो कट्ठे ओ ओर आपणा-आपणा प्राण बचाणे खे त्यार ऊई की, जेसा जातिया रे या राज्य रे लोक अन्याय करी की तिना खे या तिना री जवाणसा खे ओर बाल़का खे दु:ख देणा चाओगे, तिना खे नाश करो ओर तिना री तअन-सम्पत्ति लूटी लो। 12 ओर ये क्षयर्ष राजे रे राजा दे एक ई दिने कित्तेया जाओ, मतलब अदार नाओं रे बारूए मीन्ने रे तेरूए दिने।

13 एसा आज्ञा रे लेखो री नकला, सारे राज्यो रे सबी देशो रे लोका गे खुली रिया पेजिया; ताकि यहूदी तेस दिने आपणे दुश्मणा ते बदला लणे खे त्यार रओ। 14 तेस ई बखते डाकिये तेज चलणे वाल़े सरकारी कोड़ेया पाँदे सवार ऊई की, राजे री आज्ञा ते फुर्ती करी की फटाफट चली गे ओर ये आज्ञा शूशन राजगढ़ो दे दित्ती थी।

15 तेबे मोर्दकै नीले ओर सफेद रंगो रे मईलो रे टाल्ले पईनी की ओर सिरो पाँदे सूईने रा बड़ा मुकुट राखी की ओर छोटे रेशम ओर बैंगणी रंगो रा चोगा पईनी की, राजे रे सामणे ते निकल़ेया ओर शूशन शईरो रे लोक खुशिया रे मारे गर्व करने लगे। 16 ओर यहूदिया खे आनंद ओर खुशी ऊई ओर तिना री बड़ी प्रतिष्ठा ऊई। 17 ओर जेस-जेस राज्य दे ओर जेस-जेस शईरो दे, जेती केथी राजे री आज्ञा ओर नियम पऊँचे, तेती-तेती यहूदिया खे बड़ी पारी खुशी ऊई ओर तिने पाट्टी करी की से दिन खुशिया रा दिन मानेया। ओर तेस देशो रे लोका बीचा ते बऊत लोक यहूदी बणी गे, कऊँकि तिना रे मनो दे यहूदिया रा डर समाई गा था।