1 जेबे मोर्दकैए खे तेते पर्चिया रे बारे दे पता लगी गा, तेबे मोर्दकैए टाल्ले फाड़ी की, टाट पईनी की, स्वा मल़ी की, शईरो बीचे गया ओर दु:खी ऊई की जोरे-जोरे की रोणे लगेया। 2 तेबे से राजमईलो रे बड़े द्वारो गे पऊँचेया, पर टाट पईनी की राजमईलो रे बड़े द्वारो ते पीतरे जाणे री केसी खे आज्ञा नि थी। 3 तेबे एक-एक राज्य दे, जेती-जेती राजे री आज्ञा ओर नियम पऊँचेया, तेती-तेती यहूदी बड़े दु:खी ऊई की बअरत करने लगे ओर रोणे पीटणे लगे, बल्कि बऊत जणे टाट पईनी की ओर स्वा मल़ी की पड़े दे रये।

4 तेबे एस्तेर राणिया री सेलिये ओर खुसरेया जाई की तेसा गे बताईता, तेबे राणी दु:खी ऊई गी ओर मोर्दकैए गे टाल्ले पेजी की ये सन्देस पेजेया कि टाट उतारी की इना खे पईनी लो, पर तिने सेयो नि लये। 5 जेबे एस्तेरे ये सब सुणेया तेबे तेसे राजे रे खुसरेया बीचा ते हताको खे जो राजे तेसा री देखपाल़ करने खे ठराया था, बुलाई की आज्ञा दित्ती कि मोर्दकैए गे जाई की पता लगा कि क्या गल्ल ए ओर इजी री बजा क्या ए। 6 तेबे हताक शईरो रे तेस चौको रे, जो राजमईलो रे बड़े द्वारो रे सामणे था, मोर्दकैए गे गया। 7 मोर्दकैए तेसगे सब कुछ बताईता कि मां पाँदे क्या-क्या बीतेया ओर हामाने यहूदिया खे नाश करने री आज्ञा पाणे खे राजपण्डारो दे बऊत चाँदी परने रा वादा करी राखेया, ये बी ठीक-ठीक बताईता। 8 तेबे यहूदिया खे नाश करने री जो आज्ञा शूशनो दे दित्ती थी, तेतेरी एक नकल बी तिने हताको रे आथो दे, एस्तेरा खे दखाणे खे दित्ती ओर तेसा खे सारा आल बताणे ओर ये आज्ञा देणे खे बोलेया कि पीतरे राजे गे जाई की आपणे लोका रिया तँईं गिड़गिड़ाई की प्रार्थना कर। 9 तेबे हताके एस्तेरा गे जाई की मोर्दकैए रिया गल्ला सुणाईयां। 10 तेबे एस्तेरे हताको गे मोर्दकैए खे ये बोलणे री आज्ञा दित्ती, 11 "राजे रे सारे कर्मचारिया, बल्कि राजे रे राज्य रे सारे लोका खे बी पता ए कि क्या जवाणस, क्या मर्द, कोई कऊँ ना ओ, जो आज्ञा ते बिना आँगणो दे राजे साथे मिलणे खे जाओगा, तेसखे काणे री आज्ञा ए; बस से जेसरी तरफा खे राजा सूईने रा राजदण्ड बढ़ाओ, सेई बचोआ। पर ती दिन ऊईगे दे आऊँ राजे गे नि बुलाई राखी।" 12 एस्तेरा रिया यो गल्ला मोर्दकैए गे सुणाईयां। 13 तेबे मोर्दकै एस्तेरा गे ये सन्देसा पेजेया, "तूँ मन ई मन ये नि सोच कि आऊँ ई राजमईलो रे रणे रिया बजा ते बाकी सबी यहूदिया बीचे बची री रणी। 14 कऊँकि जो तूँ एस बखते चुपचाप रएगी, तो ओर केसी ना केसी उपाय ते यहूदिया रा छुटकारा ओर उद्धार ऊई जाणा, पर तूँ आपणे बाओ रे कराने समेत नाश ऊई जाणी। तेबे क्या पता ताखे एड़े कठण बखतो खे ई राजपद मिली रा ओ।" 15 तेबे एस्तेरे मोर्दकैए गे ये सन्देस पेजेया, 16 "तूँ जाई की शूशनो रे सारे यहूदिया खे कट्ठा कर ओर तुसे सब मेरिया तँईं बअरत करो, तीन दिन-रात कुछ नि खाओ-पियो ओर मां बी आपणी सेलिया साथे ईंयाँ बअरत करना। ओर एड़ी ई दशा दे मां नियमो रे खलाफ राजे गे पीतरे जाणा; तो अगर नाश ऊई गी तो ऊई गी।" 17 तेबे मोर्दकै चली गा ओर एस्तेरा री आज्ञा रे मुताबिक ई तिने सब कुछ कित्तेया।