1 कुछ बखतो ते बाद जेबे राजा क्षयर्षो रा गुस्सा ठंडा ऊआ, तेबे तिने वशती राणिया री ओर जो काम तेसे कित्तेया था ओर जो तेसा रे बारे दे आज्ञा निकल़ी थी तेतेरी बी सम्बाल़ लई। 2 तेबे राजे रे आपणे सेवक तेसखे बोलणे लगे, "राजे खे बांकी ओर जवान कुआँरी बेटिया खे टोल़ो। 3 ओर राजे आपणे राज्य रे सबी जगा दे लोक इजी खे नियुक्त कित्ते, ताकि सेयो सबी बांकी जवान कुआँरिया बेटिया खे शूशन गढ़ो रे रनवासो दे कट्ठा करो ओर जवाणसा रे रखवाल़े हेगे खे जो राजे रा खुसरा था, सम्बाल़ी देयो ओर तिना खे शुद्ध करने जोगिया चीजा दित्तिया जाओ। 4 तेबे तिना बीचा ते जो कुआँरी राजे खे ठीक लगो, से वशती राणिया री जगा दे पटराणी बणाई जाओ। ये गल्ल राजे खे ठीक लगी ओर तिने एड़ा ई कित्तेया। 5 तेस बखते शूशन शईरो रे गढ़ो दे मोर्दकै नाओं रा एक यहूदी रओ था, जो कीश नाओं रे एक बिन्यामीनिये रा पड़पोता, शिमीए रा पोता ओर याईरो रा पाऊ था। 6 कुछ साल पईले से तिना गुलामा साथे यरूशलेम शईरो ते गुलामिया दे गया था, जिना खे बाबेलो रा राजा नबूकदनेस्सर, यहूदा रे राजा यकोन्याह साथे गुलाम करी की लईगा था। 7 तिने आपणी हदास्सा नाओं री चचेरी बईण, जेसा खे एस्तेर बी बोलो थे पाल़ी थी, कऊँकि तेसा रे माये-बाओ नि थे ओर से बऊत बांकी ओर रूपवती थी ओर जेबे तेसा रे माये-बाओ मरी गे, तेबे मोर्दकैए से आपणी बेटी मानी की पाल़ी।"

8 जेबे राजे री आज्ञा ओर नियम सुणाए ओर बऊत सारी कुआँरी जवान बेटिया, शूशन गढ़ो दे हेगे गे कट्ठिया कित्तिया, तेबे एस्तेर बी राजमईलो री जवाणसा रे रखवाल़े हेगे गे सम्बाल़ी। 9 से बेटी हेगे खे प्यारी लगी ओर से तेसा ते खुश ऊआ, तेबे तिने बिना देरी कित्ते तेसा खे राजमईलो ते शुद्ध करने रिया चीजा ओर रोटी ओर तेसा खे चुणिया रिया सात सेलिया बी दित्तिया ओर तेसा खे ओर तेसा री सेलिया खे रनवासो दे सबी ते अच्छी रणे री जगा दित्ती। 10 मोर्दकैए तेती जाणे ते पईले एस्तेरा खे समजयाई की बोली राखेया था कि तैं तिना खे ये नि बताणा की तूँ यहूदी ए। इजी बजा ते तेसे ना तो आपणी जाति बताई ओर ना ई आपणा कुल केसी गे बताया। 11 मोर्दकै तो हर रोज रनवासो रे आँगणो सामणे कूमणे आया करो था, ताकि जाणो कि एस्तेर ठीक ए कि नि ओर तेसा साथे क्या ऊणे लगी रा?

12 जेबे बी केसी बेटिया री बारी आओ थी कि से क्षयर्ष राजे गे रात कटणे खे जाओ तो तेसा खे से सब करना ओ ओर ठराए रे नियमो रे मुताबिक बारा मीन्ने तक त्यार ऊणा पड़ो था मतलब तिना रे शुद्ध करने रे दिन ईंयाँ बीते कि छे मीन्ने तक गन्धरसो रा तेल लगाया जाओ था ओर छे मीन्ने तक खुशबूदार इत्र ओर जवाणसा खे शुद्ध करने रा ओर सामान लगाया जाओ था। 13 ईंयाँ जेबे सेयो बेटिया राजे गे जाओ थिया, तेबे जो कुछ सेयो चाओ थिया कि रनवासो ते राजमईलो दे लई जाओ, से तेसा खे देयो थे। 14 साँजा खे तो सेयो जाओ थिया ओर प्यागा वापस ऊई की रनवासो रे दूजे कअरे जाई की रखैला रे रखवाल़े राजे रे खुसरे शाशगजो रे कब्जे दे ऊई जाओ थिया ओर राजे गे फेर नि जाओ थिया। ओर जे राजा तिना ते खुश ऊई जाओ था, तेबे से तेसा खे नाओं लई की बुलाओ था। 15 जेबे मोर्दकै रे चाचा अबीहैलो री बेटी एस्तेर, जो मोर्दकै बेटी मानी की राखी थी, तेसा री बारी आई कि राजे गे जाओ, जेबे जो कुछ जवाणसा रे रखवाल़े राजे रे खुसरे हेगे तेसा रिया तँईं ठराया था, तिजी ते जादा तेसे ओर कुछ नि मांगेया ओर जितणेया एस्तेर देखी, सेयो सब तेसा ते खुश ऊए।

16 ईंयाँ एस्तेर राजमईलो दे राजा क्षयर्षो गे तेसरे राज्य रे सातुए सालो रे तेबेत नाओं रे दसुए मीन्ने दे पऊँचाई। 17 ओर राजे एस्तेरा खे सबी जवाणसा ते जादा प्यार कित्तेया ओर सबी कुआँरिया ते जादा तेसरे अनुग्रहो री दया-दृष्टि तेसा पाँदे ई ऊई, इजी बजा ते तिने तेसा रे सिरो पाँदे राजमुकुट राखेया ओर से वशती राणिया री जगा पाँदे राणी बणाई। 18 तेबे राजे आपणे सारे परदाना ओर कर्मचारिया खे बड़ी पाट्टी कित्ती ओर तिजी खे एस्तेरा री पाट्टी बोलेया ओर राज्य दे छुट्टी* दित्ती ओर आपणी उदारता बताणे रिया तँईं ईनाम बी बांडे।

19 कुछ बखतो ते बाद जेबे कुआँरिया छोट्टिया दूजी बार कट्ठिया कित्तिया, तेबे मोर्दकै राजमईलो रे बड़े द्वारो गे काम करेया करो था। 20 एस्तेरे आपणी जाति ओर कुलो रे बारे दे नि बताई राखेया था, कऊँकि मोर्दकै तेसा खे एड़ी आज्ञा देई राखी थी कि बताया नि ओर एस्तेर मोर्दकै री गल्ल एड़ी मानो थी, जेड़ी तेसगे आपणे पाल़ने रे बखते मानो थी।

21 तिना दिना दे जेबे मोर्दकै राजे रे राजमईलो रे बड़े द्वारो गे काम करने लगी रा था, तेबे राजे रे खुसरे जो द्वारपाल बी थे, तिना बीचा ते बिगतान ओर तेरेश नाओं रे दूई जणेया राजा क्षयर्षो ते नराज ऊई की तेसखे नुकशाण पऊँचाणे री साजिश कित्ती। 22 ये गल्ल मोर्दकै खे पता लगी गी ओर तिने एस्तेर राणिया खे ये गल्ल बताई ओर एस्तेरे मोर्दकै रा नाओं लई की राजे गे दशेया। 23 तेबे खोजबीन करी की ये गल्ल सच निकल़ी ओर सेयो दोनो डाल़ो पाँदे लटकाईते ओर ये वृतांत राजे सामणे इतियासो री कताबा दे लिखेया।