1 राजा सुलैमान तो सारे इस्राएल देशो पाँदे राजा बणी गा था

2 ओर तेसरे दरबारो दे परदान यो थे, मतलब सादोको रा पाऊ अजर्याह पुरोईत, 3 ओर शीशो रा पाऊ एलीहोरोप ओर अहिय्याह परदान मंत्री थे। अहीलूदो रा पाऊ यहोशापात, इतिआसो रा लिखणे वाल़ा था। 4 तेबे यहोयादा रा पाऊ बनायाह परदान सेनापति था ओर सादोक ओर एब्यातार पुरोईत थे। 5 नातानो रा एक पाऊ अजर्याह पण्डारिया पाँदे अधिकारी था ओर नातानो रा दूजा पाऊ जाबूद पुरोईत ओर राजे रा सला देणे वाल़ा बी था। 6 अहीशार राजपरिवारो पाँदे मुखिया था ओर अब्दा रा पाऊ अदोनीराम बेगारो पाँदे मुखिया था।

7 ओर राजा सुलैमानो रे बारा पण्डारी थे, जो सारे इस्राएली लोका रे अधिकारी ऊई की राजा ओर तेसरे करानेया खे खाणे-पीणे रा इन्तजाम करो थे। एक-एक मर्द हर साल आपणे-आपणे ठराए रे मीन्ने दे इन्तजाम करो था। 8 तिना रे नाओं यो थे, मतलब एप्रैमो रे पाह्ड़ी इलाके दे बेन्हूर, 9 ओर माकस, शाल्बीम ओर बेतशेमेश ओर एलोन-बेतानानो दे बेन्देकेर था। 10 अरूब्बोत शईरो दे बेन्हेसेद जेसरे कब्जे दे सोक शईर ओर हेपेर शईरो रा सारा देश था। 11 दोरो रे सारे ऊच्चे देशो रे बेन-अबीनादाब जेसरी लाड़ी सुलैमानो री बेटी तापत थी। 12 अहीलूदो रा पाऊ बाना जेसरे अक्को रे तानाक, मगिद्दो शईर ओर बेतशान शईर रा से सारा देश था, जो सारतान शईरो रे नेड़े ओर यिज्रेलो रे थाले ओर बेतशान शईरो ते लई की आबेल-महोला शईरो तक मतलब योकमाम शईरो रे पोरले कनारे तक आ।

13 ओर गिलाद इलाके रे रामोत शईरो दे बेनगेबेर था, जेसरे अक्को दे मनश्शेई याईरो रे गिलाद इलाके रे गाँवो थे, मतलब एतेरे ई अक्को दे बाशान इलाके रे अर्गोबो रा देश था, जिदे दवाल ओर पीतल़ी रे बेड़े वाल़े साठ बड़े-बड़े शईर थे।

14 इद्दो रे पाऊ अहीनादाबो रे आथो दे महनैम शईर था।

15 नप्ताली गोत्रो दे अहीमास था, जिने सुलैमानो री बसामत नाओं री बेटिया साथे ब्या करी ला था।

16 आशेर ओर आलोतो दे हूशै रा पाऊ बाना, 17 इस्साकार गोत्रो रे पारूह रा पाऊ यहोशापात, 18 ओर बिन्यामीन गोत्रो रे एला रा पाऊ शिमी था। 19 ऊरीए रा पाऊ गेबेर गिलादो रे मतलब एमोरिया रे राजा सिहोन ओर बाशानो रे राजा ओगो रे देशो दे था, एस सारे देशो दे सेई पण्डारी था।

20 यहूदा ओर इस्राएलो रे लोक बऊत थे, सेयो समुद्रो रे कनारे पाँदले बालूए री कणियां जेड़े बऊत थे ओर खांदे-पींदे ओर मजे करदे रओ थे। 21 सुलैमान तो फरात नदिया ते लई की पलिश्तिया रे देश, ओर मिस्रो रे बन्ने तक रे सारे राज्य पाँदे राज करो था ओर तिना रे लोक सुलैमानो खे पूरी जिन्दगी पेंट ल्याओ थे ओर तेसरे वशो दे रओ थे।

22 सुलैमानो री एक दिनो रिया रसोई दे इतणा लगो था, मतलब लगभग 600 किलो मैदा ओर लगभग 1,200 किलो आटा, 23 दस त्यार कित्ते रे बल़द, ओर चरने वाल़े बीइ बल़द, सौ पेडा-बाकरिया ओर इना खे छाडी की ईरण, बारासींगे, यखमूर ओर त्यार कित्ते दे पंछी। 24 सुलैमान फरात नदिया रिया पच्छमा रिया जगा दे सारे देशो पाँदे, मतलब तिप्साह ते लई की गाजा तक जितणे राजा थे, तिना सारेया पाँदे सुलैमान राज करो था ओर आपणे चऊँ कनारे रणे वाल़ेया साथे मेल-मिलाप राखो था। 25 ओर उतर दिशा दे दानो रे इलाके ते लई की दक्खणा दे बेर्शेबा शईरो तक रे सारे यहूदी ओर इस्राएली आपणी-आपणी अंगूरा री बेला ओर दाऊगल़े रे डाल़ो निठे सुलैमानो री पूरी जिन्दगी बिना डरे रओ थे। 26 राजा सुलैमानो गे तेसरे रथा खे 40,000 कोड़ेया रिया गवाईणी थिया ओर तेसरे 12,000 कोड़ सवार थे। 27 ओर सेयो पण्डारी आपणे-आपणे मीन्ने दे राजा सुलैमानो खे ओर जितणे तेसरी मेजा पाँदे खाणे खे आओ थे, तिना सारेया खे खाणे रा इन्तजाम सेयो ई करो थे, तेती केसी चीजा री कमी नि ओ थी। 28 कोड़े ओर तेज चलणे वाल़े कोड़ेया खे जौ ओर पराल़ जेती जरूरत पड़ो थी तेती आज्ञा रे मुताबिक एक-एक जणा पऊँचाया करो था।

29 ओर परमेशरे सुलैमानो खे बुद्धि दित्ती ओर तेसरी समज बऊत ई बढ़ाई ओर तेसरा ज्ञान समुद्रो कनारले बालूए रिया कणियां ते बी जादा बढ़ाया। 30 ओर सुलैमानो री बुद्धि पूर्व देशो दे रणे वाल़े ओर मिस्रिया री बी बुद्धिया ते बढ़ी की थी। 31 से तो तरतिया रे सारेया माणूंआ ते बी जादा अक्लमंद था बल्कि, एतान, एज्रेही ओर हेमान ओर माहोलो रे पाऊ कलकोल ओर दर्दा ते बी जादा अक्लमंद था ओर तेसरी कीर्ति चऊँ तरफा रिया सबी जातिया दे फैली गी।

32 तिने 3,000 नसीअता रिया गल्ला बोले ओर तेसरे 1,005 गीत बी ए। 33 तेबे तिने लबानोनो रे देवदारा ते लई की पीतो दे जमणे वाल़ी जूबा तक री सारे डाल़ा री चर्चा ओर पंछी-डांगर ओर लूरने वाल़े जन्तु ओर मछलिया री चर्चा कित्ती। 34 ओर देशो-देशो रे लोक तरतिया रे सारे राजेया री तरफा ते जिने सुलैमानो री बुद्धिया री कीर्ति सुणी थी, तेसरी बुद्धिया री गल्ला सुणने खे आया करो थे।