1 बऊत दिना ते बाद, तीजे साले यहोवे रा ये वचन एलिय्याह गे पऊँचेया, "जाई की आपणे आपू खे अहाबो खे दखा ओर मां जमीना दे बर्खा करी देणी।" 2 तेबे एलिय्याह आपणे आपू खे अहाबो गे दखाणे खे गया। तेस बखते सामरिया दे बड़ा पारी अकाल़ पड़ी रा था। 3 इजी री खातर अहाबे ओबद्याह खे जो यहोवे रा पग्त था ओर तेसरे कराने रा अधिकारी था, आपू गे बुलाया। 4 ओबद्याह तो यहोवे रा डर इतणा मानो था कि जेबे ईजेबेल यहोवे रे नबिया खे नाश करो थी, तेबे ओबद्याह 100 नबिया खे लई की 50-50 करी की गुफा रे लकोई ते ओर खाणा-पीणा देई की तिना रा पालण-पोषण करो था।

5 ओर अहाबे ओबद्याह खे बोलेया, "देशो दे पाणिए रिया सारिया सूबल़ा ओर सारी नदिया गे जा, बस इतणा काआ मिली जाओ कि आसे कोड़ेया खे ओर खच्चरा खे जिऊँदा बचायी सकिये ओर म्हारे सारे डांगर नि मरी जाओ।" 6 तेबे तिने आपू बीचे देश बांडेया कि आसे तिदे ऊई की चलूँए; एकी तरफा खे अहाब ओर दूजी तरफा खे ओबद्याह चलेया। 7 ओबद्याह बाटा दे था कि एलिय्याह तेसखे मिलेया; तेसखे पछयाणी की से मुंए रे पारे थाले पड़ेया ओर बोलेया, "ओ मेरे प्रभु एलिय्याह, क्या तूँ ए?" 8 तिने बोलेया, "आ आऊँ ईए, जाई की आपणे स्वामिए खे बोल कि एलिय्याह मिलेया।" 9 तिने बोलेया, "मैं एड़ा क्या पाप करी राखेया कि तूँ माखे मरवाणे खे अहाबो रे आथो रे करना चाएया? 10 तेरे परमेशर यहोवे री जिन्दगिया री कसम कोई एड़ी जाति या जगा नि ए, जिदे मेरे स्वामिए तूँ नि टोल़ेया ओ ओर जेबे तिने लोके बोलेया कि से एती नि ए, तेबे तिने तेसा जाति ओर जगा खे एतेरी कसम खुल़ाई कि एलिय्याह नि मिलेया। 11 ओर एबे तूँ बोलेया कि जाई की आपणे स्वामिए खे बोल कि एलिय्याह एती ए। 12 तेबे जिंयाँ ई आऊँ तांगा गे ते चली जाणा, तिंयाँ ई यहोवे रे आत्मे तूँ ना जाणे केथो खे चकी की लई जाणा, तो जेबे आऊँ जाई की अहाबो गे बताऊँगा ओर जे तूँ तेसखे नि मिलेया, तेबे तेस आऊँ कायी देणा; पर आऊँ तेरा दास बचपनो ते ई यहोवे रा डर मानदा आई रा! 13 क्या मेरे प्रभुए खे ये नि बताई राखेया कि जेबे ईजेबेल राणी यहोवे रे नबिया खे काओ थी तेबे मैं क्या कित्तेया कि यहोवे रे नबिया बीचा ते 100 लई की 50-50 करी की गुफा रे लकोई की राखे ओर तिना खे खाणा-पीणा देई की पाल़दा रया। 14 तेबे तूँ बोलेया कि जाई की आपणे स्वामिए खे बोल कि एलिय्याह मिलेया! तेबे तेस आऊँ कायी देणा।"

15 एलिय्याहे बोलेया, "सेना रा यहोवा जेस सामणे आऊँ रऊँआ, तेसरी जिन्दगिया री कसम आज मां आपणे आपू खे तेसगे दखाणा।" 16 तेबे ओबद्याह अहाबो खे मिलणे गया ओर तेसगे दसीता की एलिय्याह केईया; तो अहाब एलिय्याह ते मिलणे चलेया। 17 एलिय्याह खे देखदे ई अहाबे बोलेया, "ओ इस्राएलो खे सताणे वाल़े, क्या तूँई ए?"* 18 तिने बोलेया, "मैं इस्राएलो खे कोई कष्ट नि दित्तेया, पर तैं ओर तेरे बाओ रे कराने दित्तेया; कऊँकि तुसे यहोवे री आज्ञा टाल़ी की बाल देवतेया री आराधना करने लगे। 19 एबे दूत पेजी की सारे इस्राएलो खे ओर बालो रे 450 नबिया ओर अशेरा रे 400 नबिया खे जो ईजेबेला रे मेजो पाँदे खाओए, मांगे कर्मेल पाह्ड़ो पाँदे कट्ठे करी दे।" 20 तेबे अहाबे सारे इस्राएली लोका खे बुलावा पेजेया ओर नबी लोक कर्मेल पाह्ड़ो पाँदे कट्ठे कित्ते। 21 ओर एलिय्याह सारे लोका गे आई की बोलणे लगेया, "तुसे कदुओ तक दुँईं बिचारा दे फसे दे रणे, जे यहोवा परमेशर ओ, तो तेस पीछे ऊई जाओ ओर जे बाल परमेशर ए ओ, तो तेस पीछे ऊई जाओ।" लोके तेसरे ज्वाबो दे एक बी गल्ल नि बोली। 22 तेबे एलिय्याहे लोका खे बोलेया, "यहोवे रे नबिया बीचा ते बस आऊँ ई रयी गा रा ओर बालो रे नबी 450 माणूं ए। 23 इजी री खातर दो बाच्छू ल्याई की आसा गे देयो ओर सेयो एक बाच्छू आपू खे छाँटी की टुकड़े-टुकड़े करी की लकड़िया पाँदे राखो ओर कोई आग नि लगाओ ओर मां दूजा बाच्छू त्यार करी की लकड़िया पाँदे राखणा ओर कोई आग नि लगाणी। 24 तेबे तुसे आपणे देवते ते प्रार्थना करो ओर मां यहोवे ते प्रार्थना करनी ओर जो आग सेटी की ज्वाब देयो सेई परमेशर ठईरो।" तेबे सारे लोके बोलेया, "अच्छी गल्ल ए।" 25 ओर एलिय्याहे बालो रे नबिया खे बोलेया, "पईले तुसे छाँटी की एक बाच्छू त्यार करी लो, कऊँकि तुसे तो बऊत ए; तेबे आपणे देवते ते प्रार्थना करो, पर आग नि लगाणी।" 26 तेबे तिने से बाच्छू जो तिना खे दित्तेया था लई की त्यार कित्तेया ओर प्यागा ते लई की त्याड़िया तक सेयो ये बोली की बालो ते प्रार्थना करदे रये, "ओ बाल म्हारी सुण, ओ बाल म्हारी सुण!" पर ना कोई आवाज ऊई ओर ना कोई ज्वाब देणे वाल़ा ऊआ। तेबे सेयो आपणी बणाई रिया बेदिया पाँदे नाचणे लगे। 27 त्याड़िया एलिय्याहे ये बोली की तिना रा मजाक कित्तेया, "जोरे की आका पाओ, से तो देवता ए; तिने तो त्यान ऊणा लगाया रा या केथी गया ऊणा या यात्रा रे ऊणा, या ऊई सकोआ कि सऊणे लगी रा ऊगा ओर से जगाणा चाईयो।" 28 ओर तिने जोरे-जोरे की आका पाई-पाई की आपणी रवाजा रे मुताबिक छुरी ओर बड़छेया साथे आपू खे एड़ा कायल कित्तेया कि खून ई खून ऊईगा। 29 सेयो त्याड़िया तक ई क्या, बल्कि सांजा री पेंट चढ़ाणे रे बखतो तक भविष्यबाणी करदे रये, पर कोई आवाज नि सुणी ओर ना ई किने ज्वाब दित्तेया ओर ना किने त्यान दित्तेया।*

30 तेबे एलिय्याहे सारे लोका खे बोलेया, "मां नेड़े आओ; ओर सारे लोक तेस नेड़े आईगे। तेबे तिने यहोवे री बेदिया री जो टाल़ी ती थी मरम्मत कित्ती।" 31 तेबे एलिय्याहे याकूबो रे पाऊआ रे मुताबिक जेसगे यहोवे रा ये वचन आया था, "तेरा नाओं इस्राएल ऊणा," बारा पात्थर छाँटे, 32 ओर तिना पात्थरा साथे यहोवे रे नाओं री एक बेदी बणाई जो पईले टाल़ी ती दी थी, ओर तेतेरे चऊँ कनारे इतणा बड़ा गड्डा खणी ता कि तिदे लगभग चौदा लीटर समायी सको। 33 तेबे तिने बेदिया पाँदे लकड़िया सजाईया ओर बाच्छूए रे टुकड़े-टुकड़े करी की लकड़िया पाँदे राखी ते ओर बोलेया, "चार पाणिए रे कअड़े परी की होमबलिया रे डांगर ओर लकड़िया पाँदे सेटी देयो।" 34 तेबे तिने बोलेया, "दूजी बार एड़ा ई करो।" तेबे लोके दूजी बार तेड़ा ई कित्तेया। फेर तिने बोलेया, "तीजी बार करो।" तेबे लोके तीजी बार बी तेड़ा ई कित्तेया। 35 ओर पाणी बेदिया रे चऊँ कनारिये बह्यी गा ओर पाणिए साथे गड्डा बी परी गा। 36 तेबे पेंट चढ़ाणे रे बखते एलिय्याह नबी नेड़े जाई की बोलणे लगेया, "ओ अब्राहम, इसहाक ओर इस्राएलो रे यहोवा परमेशर! आज ये दशी दे कि इस्राएलो दे तूँ ई परमेशर ए ओर आऊँ तेरा दास ए ओर मैं यो सारे काम तांते वचन पाई की करी राखे। 37 ओ यहोवा! मेरी सुण, मेरी सुण, ताकि यो लोक जाणी लो कि ओ यहोवा, तूँ ई परमेशर ए ओर तूँ तिना रा मन वापस ल्याएया।"

38 तेबे यहोवे री आग सर्गो ते थाले आई ओर होमबलि, लकड़ी ओर पात्थरा ओर तूड़ा समेत फूकी ते ओर गड्डे रा पाणी बी सुकाईता। 39 ये देखी की सारे लोक मुंए रे पारे थाले पड़ी की बोलणे लगे, "यहोवा ई परमेशर ए, यहोवा ई परमेशर ए;" 40 एलिय्याहे तिना खे बोलेया, "बालो रे नबिया खे पकड़ी लो, तिना बीचा ते एक बी बची की नि जाओ;" तेबे तिने सेयो पकड़ी ले ओर एलिय्याहे सेयो थाले लई जाई की कीशोन नाल़े दे कायी ते।

41 तेबे एलिय्याहे अहाबो खे बोलेया, "उठी की खा-पी, कऊँकि पारी बर्खा ऊणे री आवाज आऊणे लगी री।" 42 तेबे अहाब खाणे-पीणे चली गा ओर एलिय्याह कर्मेल पाह्ड़ो री चूँडिया पाँदे चढ़ीगा ओर जमीना दे पड़ी की आपणा मूँ जानूआ बीचे करी ता। 43 ओर तिने आपणे सेवको खे बोलेया, "चढ़ी की समुद्रो रिया तरफा खे नजर करी की देख," तेबे तिने चढ़ी की देखेया ओर वापस ऊई की बोलेया, "कुछ नि दिशदा।" एलिय्याहे बोलेया, "फेर सात बार जा।" 44 साती बार तिने बोलेया, "देख, समुद्रो बीचा ते माणूंए रे आथो रा जा एक छोटा बादल़ उठणे लगी रा।" एलिय्याहे बोलेया, "अहाबो गे जाई की बोल कि रथो पाँदे चढ़ी की थाले जा, केथी एड़ा नि ओ कि तूँ बर्खा रिया बजअ ते एथी रूकी जाए।" 45 थोड़ी जी देर बाद ई सर्ग अवा साथे उडाई री पऊण ओर तूफानो साथे काल़ा ऊईगा ओर पारी बर्खा ऊणे लगी ओर अहाब रथो पाँदे चढ़ी की यिज्रेलो खे गया।* 46 तेबे यहोवे री शक्ति एलिय्याह पाँदे एड़ी ऊई कि से लक बानी की अहाबो ते आगे-आगे यिज्रेल शईरो तक दौड़दा चली गा।*