1 राजा 16

1 जेबे बाशा राजा इस्राएलो पाँदे राज करो था, तेबे राजा बाशा रे बारे दे हनानीए रे पाऊ येहूए राजा बाशा खे ये सन्देश दित्तेया जो यहोवे तेसगे बोलेया था, 2 "मैं तूँ एक खास माणूं बणाया, ओर आपणी इस्राएली प्रजा रा परदान बणाया, पर तूँ यारोबामो जेड़ी चाल चलदा ओर मेरी इस्राएली प्रजा ते एड़े पाप करांदा आई रा जिना साथे सेयो माखे रोष चढ़ाओए। 3 इजी री खातर बाशा, मां तूँ ओर तेरा सारा परिवार नाश करी देणे। मां तां साथे तेड़ा ई करना जेड़ा मैं नबातो रे पाऊ यारोबामो रे परिवारो साथे कित्तेया था। 4 बाशा रे कअरो रा जो कोई शईरो दे मरी जाओ, से कुत्ते खाई देणा ओर तेसरा जो कोई मैदानो दे मरोगा, से सर्गो रे पंछिया खाई देणा।" 5 राजा बाशा रे ओर सारे काम जो तिने कित्ते ओर तेसरी वीरता रे काम ये सारे इस्राएलो रे राजेया रे इतिआसो री कताबा दे लिखी राखे। 6 तेबे राजा बाशा मरीगा ओर से तिर्सा शईरो दे दबाईता। तेसते बाद तेसरा पाऊ एला तेसरी जगा पाँदे राज करने लगेया। 7 यहोवे रा जो वचन नबी हनानीए रे पाऊ येहूए रे जरीये बाशा ओर तेसरे कराने रे खलाफ आया, से बस तिना ई बुराईया रिया बजअ ते नि आया जो तिने यारोबामो रे कराने जेड़ा ऊई की यहोवे री नजरा दे कित्तेया था ओर आपणे कामा रे जरीये तेसखे रोष दलाया। यहोवा इजी बजा ते बी रोषे था कि बाशा राजे यारोबामो रा सारा परिवार काईता था।

इस्राएलो दे एला रा राज्य

8 यहूदा रे राजा आसा रे राजो रे छब्बिए साले बाशा राजे रा पाऊ राजा एला तिर्सा दे इस्राएली लोका पाँदे राज करने लगेया ओर दो साल तक राज करदा रया। 9 जेबे से तिर्सा रे अर्सा नाओं रे पण्डारिये रे कअरे जो तेसरे तिर्सा वाल़े मईलो रा परदान था, शराब पी की मतवाल़ा ऊईगा था, तेबे तेसरे जिम्री नाओं रे एक कर्मचारिये जो तेसरे आदे रथा रा परदान था, तिने राजा एला खे काणे री स्कीम बणाई। 10 जिम्री तेस कअरो दे गया ओर तिने राजा एला काईता। ये तेबे ऊआ था जेबे यहूदा प्रदेशो दे राजा आसा खे राज करदे ऊए सताईया साल लगी रा था। ईंयाँ इस्राएलो दे एला ते बाद जिम्री नवां राजा बणेया। 11 ओर जेबे से राज करने लगेया, तेबे सिंहासनो पाँदे बैठदे ई तिने बाशा रा पूरा कराना कायी ता, बल्कि तिने ना तो तेसरे टब्बरो वाल़े ओर ना तेसरे दोस्ता रे पाऊआ बीचा ते कोई बी जिऊँदा छाडेया। 12 ईंयाँ यहोवे रे तेस वचनो रे मुताबिक जो तिने येहू नबीए रे जरीये बाशा रे खलाफ बोलेया था, जिम्रिए बाशा रा सारा टब्बर नाश करी ता। 13 इजी री बजअ बाशा रे सारे पाप ओर तेसरे पाऊ एला रे बी पाप थे, जो तिने मूर्तिपूजा आपू करी की ओर इस्राएलो ते बी करवाई की इस्राएलो रे परमेशर यहोवे खे बेकारो दे रोष दलाया था। 14 राजा एला रे ओर सारे काम जो तिने कित्ते थे, सेयो इस्राएलो रे राजेया रे इतिआसो री कताबा दे लिखी राखे।

इस्राएलो दे जिम्रिए रा राज्य

15 यहूदा रे राजा आसा रे सताईये साले जिम्री तिर्सा शईरो दे राज करने लगेया ओर तिर्सा दे सात दिन तक राज करदा रया। तेस बखते लोके पलिश्तिया रे शईर गिब्बतोनो रे खलाफ डेरे लगाई राखे थे। 16 तेबे जेबे तिने डेरे लगाए रे इस्राएली लोके सुणेया कि जिम्रिए राजद्रोह री सभा करी की राजा कायी ता, तेबे तेस ई दिने सारे इस्राएलिये ओम्री नाओं रा परदान सेनापति डेरे दे इस्राएलो रा राजा बणाया। 17 तेबे ओम्रीये सारे इस्राएलो खे साथे लई की गिब्बतोन छाडेया ओर तिर्सा केरी ता। 18 जेबे जिम्रिए देखेया कि दुश्मणे शईर आपणे कब्जे दे लई ला रा, तेबे तिने राजमईलो रे गुम्मटो दे जाई की राजमईलो दे आग लगाईती ओर तिदे ई आपू बी फूकी की मरी गा। 19 ये तेसरे पापो रिया बजअ ते ऊआ, कऊँकि तिने से कित्तेया जो यहोवे री नजरा दे बुरा था, कऊँकि से यारोबामो री जी चाल ओर तेसरे कित्ते रे ओर इस्राएलो ते करवाये रे पापो रिया बाटा दे चलेया। 20 जिम्रिए रे ओर काम ओर जो राजद्रोह री सभा तिने कित्ती, ये सारे काम इस्राएलो रे राजेया रे इतिआसो री कताबा दे लिखी राखे।

इस्राएलो दे ओम्रीये रा राज्य

21 तेबे इस्राएली प्रजा दो इस्से दे ऊईगी, प्रजा रे आदे लोक तो तिब्नी नाओं रे गीनतो रे पाऊए खे राजा बनाणे खे तेस ई पीछे ऊईगे ओर आदे ओम्रीये पीछे ऊईगे। 22 बादो ते जो लोक ओम्रीये पीछे ऊए थे सेयो तिना पाँदे प्रबल ऊए जो गीनतो रे पाऊ तिब्निये पीछे ऊईगे थे, इजी बजअ ते तिब्नी कायी ता ओर ओम्री राजा बणी गा। 23 यहूदा रे राजा आसा रे कत्थिये सालो दे ओम्री इस्राएलो पाँदे राज करने लगेया ओर बारा साल तक राज करदा रया; तिने छे साला तक तो तिर्सा दे राज कित्तेया। 24 ओर तिने शेमेरो ते सामरिया पाह्ड़ सत्तर किलो चाँदिए दे*16:24 सत्तर किलो चाँदिए दे दो किक्कार चाँदिए मोले लई की, तिदे एक शईर बसाया ओर तिने आपणे बसाए रे शईरो रा नाओं पाह्ड़ो रे मालक शेमेरो रे नाओं पाँदे सामरिया राखेया। 25 ओम्रीये से कित्तेया जो यहोवे री नजरा दे बुरा था, बल्कि तिना सारेया ते बी जादा बुरा कित्तेया जो तेसते पईले राजा ऊए थे। 26 तिने नबातो रे पाऊ यारोबामो जेड़ी चाल चली ओर तेसरे सारे पापो रे मुताबिक जो तिने इस्राएलो ते करवाए थे जिना रिया बजअ ते तिने इस्राएलो रे परमेशर यहोवे खे आपणे बेकारो रे काम मूर्तिपूजा रिया बजअ ते रोष दलाया था। 27 ओम्रीये रे ओर काम जो तिने कित्ते थे ओर जो वीरता तिने दखाई, ये सारे इस्राएलो रे राजेया रे इतिआसो री कताबा दे लिखी राखे। 28 तेबे ओम्री मरीगा से तेसरे बुजुर्गा साथे सामरिया दे दबाईता। तेबे तेसरा पाऊ अहाब तेसरी जगा पाँदे राज करने लगेया।

इस्राएलो दे अहाबो रे राज्य री शुरूआत

29 यहूदा रे राजा आसा रे राजो रे ठथिये साले ओम्रीये रा पाऊ अहाब इस्राएलो पाँदे राज करने लगेया ओर इस्राएलो पाँदे सामरिया दे बाईया साला तक राज करदा रया। 30 ओर ओम्रीये रे पाऊ अहाबे तिना सारे ते जादा जो तेसते पईले राजा उए थे, सेयो काम कित्ते जो यहोवे री नजरा दे बुरे थे। 31 तिने तो नबातो रे पाऊ यारोबामो रे पापो दे चलणा अल़्की जी गल्ल जाणी की, सीदोनिया रे राजा एतबालो री बेटी ईजेबेला साथे ब्या करी की बाल देवतेया री आराधना कित्ती ओर तेसगे माथा टेकेया।*16:31 (प्रका. 2:20) 32 तिने बाल देवते रा एक मन्दर सामरिया दे बणाई की तिदे बाल देवते री एक बेदी बणाई। 33 ओर अहाबे एक अशेरा री मूर्ति बी बणाई, बल्कि तिने तिना सारे इस्राएली राजेया ते बढ़ी की जो तेसते पईले थे इस्राएलो रे परमेशर यहोवे खे रोष दलाणे रा काम कित्तेया। 34 तेसरे बखतो दे बेतेलो दे रणे वाल़े हीएले यरीहो खे फेर बसाया; जेबे तिने तेतेरी निऊँ पाई तेबे तेसरा जेठा पाऊ अबीराम मरी गा ओर जेबे तिने तेतेरे बड़े द्वार खड़े कित्ते तेबे तेसरा छोटा पाऊ सगूब मरी गा, ये यहोवे रे तेस वचनो रे मुताबिक ऊआ, जो तिने नूनो रे पाऊ यहोशूए रे जरीये बुलवाया था। *16:34 (यहो. 6:26)