1 राजा 13

परमेशरो रे दासो रा सन्देश

1 जेबे यारोबाम बेतेलो री बेदिया पाँदे पेंट चढ़ाणे खे खड़ा ऊआ था, तेबे यहोवे रे वचनो ते आज्ञा पाई की यहूदा प्रदेशो ते परमेशरो रा एक माणूं तेती आया। 2 तिने माणूंए यहोवे ते वचन पाई की बेदिया रे खलाफ आका पाई की बोलेया, "बेदी, ओ बेदी! यहोवा ईंयाँ बोलोआ कि सुण, दाऊदो रे कराने दे योशिय्याह नाओं रा एक पाऊ पैदा ऊणा, तेस सेयो ऊच्ची जगा रे पुरोईत जो तांगे तूप बाल़ोए, तां पाँदे बलि करी देणे ओर तां पाँदे माणूंआ री आड्डिया फूकिया जाणिया।" 3 ओर तिने तेस ई दिने ये बोली की तेसा गल्ला रा नशाण बी बताया, "ये वचन जो यहोवे बोली राखेया, तेतेरा नशाण ये कि ये बेदी फटी जाणी ओर एते पाँदली स्वा खींडी जाणी।"

4 तेबे एड़ा ऊआ कि परमेशरो रे माणूंए रा ये वचन सुणी की जो तिने बेतेलो री वेदिया रे खलाफ आका पाई की बोलेया, राजा यारोबामे वेदिया ते आथ बढ़ाई की बोलेया, "एसखे पकड़ो!" तेबे तेसरा आथ जो तिने तेसरी तरफा खे बढ़ाया था, सूकीगा ओर से तेसखे आपणी तरफा खे खींजी नि सकेया। 5 तेबे बेदी फटी गी ओर तेतेरी स्वा खींडी गी; तेबे से नशाण पूरा ऊआ, जो परमेशरो रे माणूंए यहोवे ते वचन पाई की बोलेया था। 6 तेबे राजे परमेशरो रे माणूंए ते बोलेया, "आपणे परमेशर यहोवे खे मना ओर मेरिया तँईं प्रार्थना कर कि मेरा आथ जेड़ा था तेड़ा ई ऊई जाओ।" तेबे परमेशरो रे माणूंए यहोवा मनाया ओर राजे रा आथ जेड़ा का तेड़ा ऊईगा। 7 तेबे राजे परमेशरो रे माणूंए खे बोलेया, "मां साथे कअरे चली की आपणा जियू ठण्डा कर ओर मां ताखे दान बी देणा।"

8 परमेशरो रे माणूंए राजे खे बोलेया, "चाए तूँ माखे आपणा आदा कअर बी दे, तेबे बी मां तेरे कअरे नि जाणा ओर एते जगा रे मां ना तो रोटी खाणी ओर ना पाणी पीणा। 9 कऊँकि यहोवे रे वचनो रे जरीये माखे एड़ी आज्ञा मिली री कि ना तो रोटी खाणी ओर ना पाणी पीणा ओर ना तेसा बाटा रिये वापस आऊणा जेते रिये तूँ जाणा।" 10 इजी री खातर से तेसा बाटा दे जिदे बेतेल गया था वापस ऊई की दूजी बाटा रिये चली गा।

11 बेतेलो दे एक स्याणा नबी रओ था ओर तेसरे माठे आई की तेसते तिना सारे कामो रा वर्णन कित्तेया जो परमेशरो रे माणूंए तेस दिने बेतेलो दे कित्ते थे; ओर जो गल्ला तिने राजे साथे कित्तिया थिया, सेयो बी तिने आपणे बाओ गे बताईया। 12 तेसरे माठेया तो ये देखेया था कि परमेशरो रा से माणूं जो यहूदा ते आया था, कुणजी बाटा दे गया, तो तिना रे बाओए तिना ते पूछेया, "से कुणजी बाटा दे गया?" 13 तेबे तिने आपणे माठेया खे बोलेया, "मेरिया तँईं गह्दे खे त्यार करो;" तेबे तिने गह्दे पाँदे काठी बानी ओर से तेस पाँदे चढ़ेया, 14 ओर परमेशरो रे माणूंए पीछे गया ओर तेसखे से बड़े डाल़ो निठे बैठेया रा मिलेया; तेबे तिने तेसते पूछेया, "परमेशरो रा जो माणूं यहूदा ते आया था, क्या तूँ सेईए?" 15 तिने बोलेया, "आ, आऊँ सेईए।" तिने तेसखे बोलेया, "मां साथे कअरे चली की रोटी खा।" 16 तिने तेसखे बोलेया, "आऊँ ना तो तां साथे वापस ऊई सकदा ओर ना ई तेरे कअरे जाई सकदा ओर ना ई एते जगा दे तां साथे रोटी खाणी ओर ना पाणी पीणा। 17 कऊँकि यहोवे रे वचनो रे जरीये माखे ये आज्ञा मिली री कि तेती ना तो रोटी खाणी ओर ना पाणी पीणा ओर जेते बाटा रिये तूँ जाएगा, तेते रिये फेर वापस नि आऊणा।"

18 तिने स्याणे नबीए बोलेया, "जेड़ा तूँ नबी ए तेड़ा ई आऊँ बी नबी ए; ओर मांते एकी दूते यहोवे रा वचन पाई की बोलेया कि तेस माणूंए खे आपू साथे आपणे कअरे वापस ली आओ, ताकि से रोटी खाओ ओर पाणी पियो।" तिने तेसते ये चूठ बोलेया। 19 तेबे से तेस साथे वापस ऊईगा ओर तेसरे कअरे रोटी खाई ओर पाणी पिया।

20 जेबे सेयो रोटी खाई की मेजो पाँदे बैठे ई थे कि यहोवे रा वचन तेस नबीए गे पऊँचेया, जो दूजे खे वापस ली आया था। 21 तिने परमेशरो रे माणूंए खे जो यहूदा ते आया था आका पाई की बोलेया, "यहोवा ईंयाँ बोलोआ कि तैं यहोवे रा वचन नि मानेया ओर जो आज्ञा तेरे यहोवा परमेशरे ताखे दित्ती थी से पनि मानी, 22 पर जेसा जगा रे बारे दे परमेशरे ताखे बोलेया था कि तिदे ना तो रोटी खाणी ओर ना पाणी पीणा, तिदे ई तैं वापस आई की रोटी खाई ओर पाणी बी पिया, इजी बजअ ते तूँ तेरे बुजुर्गा रे कब्रिस्तानो दे नि दबाया जाणा।" 23 जेबे से खाई-पी चुकेया, तेबे तिने नबीए परमेशरो रे तेस माणूंए खे जेसखे से वापस ली आया था गह्दे पाँदे काठी बणाई। 24 जेबे से बाटा दे चलणे लगी रा था तेबे एक शेर तेसखे मिलेया ओर से काई ता ओर तेसरी लोथ बाटा देई पड़ी दी रई ओर गह्दा तेसगे खड़ा रया ओर शेर बी लाशा गे खड़ेया दा रया। 25 जो लोक तिसिये चली की आऊणे लगी रे थे ये देखी की कि बाटा दे एक लोथ पड़ी री ओर तेसगे एक शेर खड़ी रा, तेस शईरो दे जाई की जेती स्याणा नबी रओ था ये सन्देश सुणाया। 26 ये सुणी की तिने नबीए जो तेसखे बाटा ते वापस ली आया था, बोलेया, "परमेशरो रा सेई माणूं ऊणा, जिने यहोवे रे वचनो रे खलाफ कित्तेया था, इजी बजअ ते यहोवे से शेरो रे पंजे दे पड़ने दित्तेया ओर यहोवे रे तेस वचनो रे मुताबिक जो तिने तेसखे बोलेया था, शेरे से फाड़ी की कायी ता ऊणा।" 27 तेबे तिने आपणे माठेया खे बोलेया, "मेरिया तँईं गह्दे पाँदे काठी बानो", जेबे तिने काठी बानी, 28 तेबे तिने बाटा दे तेस माणूंए री लोथ पड़ी दी ओर गह्दा ओर शेर दोनो लाशा गे खड़े दे देखे ओर ये बी कि शेरे ना तो लोथ खाई ओर ना गह्दा फाड़ेया। 29 तेबे तिने स्याणे नबीए परमेशरो रे माणूंए री लोथ चकी की गह्दे पाँदे लादी ती ओर तेसरिया तँईं छाती पीटणे लगेया ओर तेसखे दबाणे खे आपणे शईरो दे वापस लईगा। 30 ओर तिने तेसरी लोथ आपणे कब्रिस्तानो दे राखी ओर तेसरे माठे, "हाय, मेरे पाई!" आसे तेरिया तँईं बऊत दु:खी ए, ये बोली की छातिया पाँदे बाणे लगे। 31 तेबे तिने तेसखे माट्टी देई की आपणे माठेया खे बोलेया, "जेबे आऊँ मरी जाऊँगा तेबे एते कब्रिस्तानो रे राखणा, जिदे परमेशरो रा ये माणूं राखी राखेया ओर मेरी आड्डिया तेसरी ई आड्डिया साथे राखी देणियां। 32 कऊँकि जो वचन तिने यहोवे ते पाई की बेतेलो री बेदी ओर सामरिया शईरो रे सारे ऊच्ची जगा रे मन्दरो रे खलाफ आका पाई की बोलेया था, से पक्का पूरा ऊई जाणा।"

यारोबामो रा नाश ऊणा

33 यारोबाम नि बदलेया, से सारे बुरे काम करदा रया। तिने फेर सब प्रकारा रे लोका बीचा ते ऊच्ची जगा रे पुरोईत बणाए, बल्कि जो कोई चाओ था, तेसरा संस्कार करी की, से तेसखे ऊच्ची जगा रा पुरोईत बणाई देयो था। 34 तेबे ये गल्ल यारोबामो रे कराने खे पाप ठईरी, इजी बजअ ते तेसरा नाश ऊईगा ओर से तरतिया पाँदा ते नाश करी ता।