1 तेस बखते यारोबामो रा पाऊ अबिय्याह बऊत बमार ऊईगा। 2 तेबे यारोबामे आपणी लाड़िया खे बोलेया, "एड़ा पेष बणा कि कोई ताखे पछयाणी नि सको कि ये यारोबामो री लाड़ी ए ओर शीलो खे चली जा, तेती अहिय्याह नबी रओआ जिने माखे बोलेया था, ‘तूँ एसा प्रजा रा राजा बणी जाणा।’ 3 तूँ तेसगे दस रोटिया, टिक्किया ओर एक कुप्पी सयीतो री लई जा ओर तेस ताखे बताणा कि पाऊए खे क्या ऊणा।" 4 यारोबामो री लाड़िए तेड़ा ई कित्तेया ओर चली की शीलो दे पऊँची गी ओर अहिय्याह रे कअरे आई, अहिय्याहो खे तो कुछ बी दिशणे नि लगी रा था, कऊँकि स्याणा ऊणे रिया बजअ ते तेसरिया आखी तुँदल़िया पड़ी गिया थिया। 5 तेबे यहोवे अहिय्याह खे बोलेया, "सुण, यारोबामो री लाड़ी तांते आपणे पाऊए रे बारे दे जो बमार ए कुछ पूछणे खे आऊणे लगी री, तैं तेसा खे यो-यो गल्ला बोलणिया; तेसा आई की तांगे आपू खे ओर ई जवाणस बताणा।"

6 जेबे अहिय्याहे द्वारो पाँदे आऊँदे ऊए तेसा रे पैरो री आवाज सुणी ओर बोलेया, "ओ यारोबाम री लाड़ी! पीतरे आईजा, तूँ आपू खे दूजी जवाणस कऊँ बताणे लगी री? माखे तेरिया तँईं बुरा सन्देशा मिली रा। 7 तूँ जाई की यारोबामो खे बोल कि इस्राएलो रा यहोवा परमेशर ताखे ईंयाँ बोलोआ, ‘मैं तो तूँ प्रजा बीचा ते बढ़ाई की आपणी प्रजा इस्राएलो पाँदे परदान बणाया, 8 ओर दाऊदो रे कराने ते राज्य छीनी की ताखे देईता, पर तूँ मेरे दास दाऊदो जेड़ा नि ऊआ जो मेरी आज्ञा खे मानो था ओर आपणे पूरे मनो ते सच्चा-पक्का ऊई की मां पीछे-पीछे चलो था ओर बस सेई करो था जो मेरी नजरा दे ठीक था। 9 तैं तिना सारेया ते बढ़ी की जो तांते पईले थे, बुराई कित्ती ओर जाई की पराये देवतेया री आराधना कित्ती ओर मूर्तिया बणाईया, जेते कि आऊँ रोषे करी ता ओर आऊँ तो पीठी पीछे सेटी ता रा। 10 इजी बजअ ते, यारोबाम, मां तेरे परिवारो पाँदे मुसीबत पाणी। मां तेरे परिवारो रे सारे मर्द काई देणे। मां तेरा परिवार इस्राएलो बीचा ते एड़ा नाश करी देणा जेड़े आग गोईटुआ खे नाश करी देओई। 11 यारोबामो रे कराने रा जो कोई शईरो दे मरी जाओ, से कुत्ते खाणा ओर जो मैदानो दे मरोगा, से सर्गो रे पंछिया खाई जाणा; कऊँकि यहोवे ये बोली राखेया।’ 12 इजी री खातर तूँ उठ ओर आपणे कअरो खे चली जा ओर शईरो रे पीतरे तेरे पैर राखदे ई से पाऊ मरी जाणा। 13 सारे इस्राएल प्रदेशो रे लोका तेसरिया तँईं शोक करना। तेबे से कब्रा दे दबाणा। यारोबामो रे परिवारो रा सिर्फ ये ई पाऊ बिधि-बिधानो साथे कब्रा दे दबाया जाणा, ओर कोई नि, कऊँकि इस्राएलो रे यहोवा परमेशरे यारोबामो रे परिवारो दे सिर्फ एसदे ई अच्छाई देखी राखी। 14 यहोवे इस्राएलो दे एक एड़ा राजा खड़ा करना जेस यारोबामो रा सारा परिवार नाश करी देणा। ये सब बऊत छोड़ ऊणा। 15 तेबे यहोवे इस्राएली लोक काईल करने। इस्राएलो रे लोक बऊत डरी जाणे सेयो एड़े कांबणे जेड़े बह्ईंदे पाणिये दे नंगल़ इलदा रओआ। यहोवे इस्राएली लोक एसा अच्छी जमीना ते बारे करी देणे। ये सेई जमीन ए जो तिने तिना रे बुजुर्गा खे दित्ती थी। तेस सेयो फरात नदिया ते पार दूजे कनारे बखेरी देणे। ये इजी बजा ते ऊणा कऊँकि यहोवा इना लोका ते बऊत गुस्से दे आ। कऊँकि इने लोके अशेरा नाओं रिया मूर्तिया आपू खे बणवाई की ओर तिना री पूजा करी की यहोवे खे रोष दलाई राखेया। 16 ओर तिना पापा रिया बजअ ते जो यारोबामे कित्ते ओर इस्राएलो रे लोका ते कराये थे, यहोवे इस्राएल त्यागी देणा।"

17 तेबे यारोबामो री लाड़ी बिदा ऊई की तिर्सा शईरो खे चली गी ओर से कअरो रिया देऊल़ी गे जिंयाँ ई पऊँची, से बाल़क मरी गा। 18 तेबे यहोवे रे वचनो रे मुताबिक जो तिने आपणे दास अहिय्याह नबीए ते बुलाया था, सारे इस्राएलिये तेसखे दबाई की तेसखे शोग कित्तेया। 19 यारोबामो रे ओर काम मतलब तिने केड़ा-केड़ा युद्ध कित्तेया ओर केड़ा राज्य कित्तेया, ये सारा इस्राएलो रे राजेया रे इतिआसो री कताबा रे लिखी राखेया। 20 यारोबाम बाईया साला तक राज करने ते बाद मरीगा ओर नादाब नाओं रा तेसरा पाऊ तेसरी जगा पाँदे नवां राजा बणेया।

21 तेबे सुलैमानो रा पाऊ रहूबियाम यहूदा दे राज करने लगेया। रहूबियाम अकताल़ी साला रा ऊई की राज करने लगेया ओर यरूशलेम जो यहोवे सारे इस्राएली गोत्रो बीचा ते आपणा नाओं राखणे खे चूणी ला था, तेस शईरो दे से सतारा साला तक राज करदा रया ओर तेसरी माया रा नाओं नामाह था जो अम्मोनी जवाणस थी। 22 यहूदी लोके यहोवे रे खलाफ पाप कित्तेया, ओर तेसखे गुस्सा दलाणे रिया तँईं आपणे सबी बुजुर्गा ते जादा बुरे काम कित्ते थे। 23 तिने सारे ऊच्चे टीलेया पाँदे ओर सारे डाल़ा निठे, ऊच्चिया जगा, लक्कड़ ओर अशेरा नाओं रिया मूर्तिया बणाई लिया। 24 ओर तिना रे देशो रे मर्द एकी-दूजे साथे बुरा काम करो थे, बल्कि सेयो तिना जातिया रे जे सारे घिनौने काम करो थे, जो यहोवे इस्राएली लोका सामणे ते निकयाल़ी ते थे।

25 राजा रहूबियामो रे पाँजुए सालो दे मिस्रो रा राजा शीशक, यरूशलेम शईरो पाँदे अमला करी की, 26 यहोवे रे मन्दरो रिया कीमती चीजा ओर राजमईलो रिया कीमती चीजा खे लईगा ओर सूईने रिया जो ढाला सुलैमाने बणाईया थिया से सारेया खे लईगा। 27 इजी री खातर राजा रहूबियामे तिना रे बदले पीतल़ी रिया ढाला बणवाईया ओर सेयो पईरेदारा रे परदाना रे आथो दे सम्बाल़ी तिया, जो राजमईलो रे द्वारो री रखवाल़ी करो थे। 28 तेबे जेबे-जेबे राजा यहोवे रे मन्दरो दे जाओ था तेबे-तेबे पईरेदार तिना खे चकी की लई चलो थे ओर फेर आपणी कमरे दे वापस राखी देयो थे। 29 राजा रहूबियामो रे ओर सारे काम जो तिने कित्ते से यहूदा रे राजेया री इतिआसो री कताबा दे लिखी राखे। 30 रहूबियाम ओर यारोबामो बीचे सदा लड़ाई ऊँदी रयी। 31 ओर रहूबियाम जेसरी माये नामाह नाओं री एक अम्मोनी जवाणस थी, से मरी की आपणे बुजुर्गा साथे मिलीगा ओर तिना गेई दाऊदो रे शईरो गे से दबाईता ओर तेसरा पाऊ अबिय्याम तेसरी जगा पाँदे राज करने लगेया।