1 अरामो रे राजे बेन्हददे आपणी सारी सेना कट्ठी कित्ती ओर तेस साथे बत्ती राजा, कोड़े ओर रथ थे; तिना खे साथे लई की तिने सामरिया पाँदे अमला कित्तेया ओर तेसखे केरी की तेसरे खलाफ लड़ेया। 2 ओर तिने शईरो दे इस्राएलो रे राजा अहाबो गे दूत ये बोलणे खे पेजे, "बेन्हदद ताखे ईंयाँ बोलोआ, 3 तेरा सूईना चाँदी मेरा ए ओर तेरिया जवाणसा ओर बच्चेया बीचा ते जो ठीक-ठीक ए सेयो बी सारे मेरे ए।"

4 इस्राएलो रे राजे तेसखे सन्देशा पेजेया, "ओ मेरे प्रभु! ओ राजा! तेरे वचनो रे मुताबिक आऊँ ओर जो कुछ मेरा ए, सारा तेरा ए।" 5 तिने ई दूते फेर आई की बोलेया, "बेन्हदद ताखे ईंयाँ बी बोलोआ कि मैं ताखे ये सन्देश पेजेया था कि ताखे आपणा सूईना, चाँदी, जवाणसा ओर बच्चे बी माखे देणे पड़ने। 6 इजी री खातर काल एस ई बखते मां आपणे कर्मचारी तांगे पेजणे ओर तिना तेरे ओर तेरे कर्मचारिया रे कअरे टोल़-टाल़ करनी ओर तेरिया जो अच्छिया चीजा तिना काडणिया तिना सेयो आपू साथे ली आऊणियां।" 7 तेबे इस्राएलो रे राजे सारे बुजुर्गा खे बुलाई की बोलेया, "सोच-बिचार करो कि से माणूं आसा रा नुकशाण ई चाओआ; तिने मांते मेरी जवाणसा, बाल़क, सूईना, चाँदी मँगवाई राखेया ओर मैं ना नि कित्ती।" 8 तेबे सारे बुजुर्गे ओर आम माणूंए तेसखे बोलेया, "तेसरी नि सुणनी ओर ना मानणी।" 9 तेबे राजे बेन्हददो रे दूता खे बोलेया, "मेरे प्रभु राजे खे मेरी तरफा ते बोलो कि जो कुछ तैं पईले आपणे दासो ते चाया था, से तो मां करना, पर ये मांते नि ऊणा।" तेबे बेन्हददो रे दूते जाई की तेसखे ये ज्वाब सुणाई ता। 10 तेबे बेन्हददे राजा अहाबो गे सन्देशा पेजेया, "जे सामरिया दे इतणी तूड़ निकल़ो कि मां पीछे चलणे वाल़ेया री मुट्ठी परी जाओ तो देवता मां साथे एड़ा ई बल्कि इजी ते बी जादा करो।"* 11 इस्राएलो रे राजे ज्वाब देई की बोलेया, "तेसखे बोलो कि जो अथियार बानोआ से तेस जेड़ा नि फूलो जो तिना खे उतारोआ।" 12 ये वचन सुणदे ई से जो ओरी राजेया समेत डेरेया दे पीणे लगी रा था, तिने आपणे कर्मचारिया खे बोलेया, "अथियार बानो," तेबे तिने शईरो रे खलाफ अथियार बाने।

13 तेबे एक नबीए इस्राएलो रे राजा अहाबो गे जाई की बोलेया, "यहोवा ताखे ईंयाँ बोलोआ कि ये बड़ी पीड़ जो तैं देखी राखी, से सारी मां आज तेरे आथो दे करी देणी, इजी ते तां जाणी लणा कि आऊँ यहोवा ए।" 14 अहाबे पूछेया, "केसरे जरीये?" तिने बोलेया, "यहोवा ईंयाँ बोलोआ कि प्रदेशो रे परदाना रे जरीये!" फेर तिने पूछेया, "युद्ध केस शुरू करना?" तिने ज्वाब दित्तेया, "तां ई करना।" 15 तेबे तिने प्रदेशो रे परदाना री गिणती लई ओर सेयो 232 निकल़े ओर तिना ते बाद तिने सारे इस्राएली लोका री गिणती लई ओर सेयो 7,000 निकल़े। 16 यो त्याड़िया निकल़ी गे, तेस बखते बेन्हदद आपणे मतदगार बत्ती राजेया साथे डेरेया दे शराब पी की मतवाल़ा ऊई रा था।

17 जो प्रदेशो रे परदान थे तिना रे सेवक पईले निकल़ी गे। तेबे बेन्हददे दूत पेजे ओर तिने तेसखे बोलेया, "सामरिया ते कुछ माणूं आऊणे लगी रे।" 18 तिने बोलेया, "चाए सेयो मेल करने खे निकल़े ओ, चाए लड़ने खे, तेबे बी तिना खे जिऊँदे ई पकड़ी की ल्याओ।" 19 तेबे प्रदेशो रे परदाना रे सेवक ओर तिना ते पिछली सेना रे सिपाई शईरो ते निकल़े। 20 ओर सेयो आपू सामणे रे मर्दा खे काणे लगे ओर अरामी नठीगे ओर इस्राएलिये तिना रा पीछा कित्तेया ओर अरामो रा राजा बेन्हदद, सवारा साथे कोड़ेया पाँदे चढ़ेया ओर नठी की बचीगा। 21 राजा अहाब आपणी इस्राएलो री सारी सेना खे लई की आगे चलेया ओर तिने अरामो री सेना रे सारे कोड़े ओर रथ आपणे कब्जे दे करी ले। ईंयाँ राजा अहाबे अरामी सेना बुरे तरीके ते अराई। 22 तेबे तिने नबीए इस्राएलो रे राजे गे जाई की बोलेया, "जाई की लड़ाई करने खे आपू खे मजबूत कर ओर सचेत ऊई की सोच कि क्या करना चाईयो, कऊँकि नवां साल ऊँदे ई अरामो रे राजे तां पाँदे फेर अमला करना।"

23 तेबे अरामो रे राजे रे कर्मचारिये तेसखे बोलेया, "तिना लोका रा देवता पाह्ड़ी देवता ए, इजी बजअ ते सेयो आसा पाँदे प्रबल ऊए; इजी री खातर जे आसे तिना साथे मैदानी जगा दे लड़ूँगे तो आसे पक्का तिना पाँदे प्रबल ऊई जाणे। 24 ओर ये काम बी कर, मतलब सबी राजेया रा पद लई लो ओर तिना री जगा पाँदे सेनापतिया खे ठराई दे। 25 फेर एक ओर सेना जो तेरी तेसा सेना रे बराबर ओ जो खत्म ऊई गी री, कोड़े रे बदले कोड़ा ओर रथो रे बदले रथ, आपणिया तँईं गिणी लो; तेबे आसा तिना साथे सवीं जगा दे लड़ना ओर आसे तिना पाँदे पक्का जीती जाणे।" तिना री ये सला मानी की बेन्हददे तेड़ा ई कित्तेया। 26 ओर नवां साल लगदे ई बेन्हददे अरामी लोक कट्ठे कित्ते ओर इस्राएली लोका साथे लड़ने खे अपेक शईरो खे गया।

27 ओर इस्राएली बी कट्ठे कित्ते ओर तिना खे खाणे री त्यारी ऊई; तेबे सेयो तिना रा सामणा करने खे गये ओर इस्राएली तिना सामणे डेरे लगाई की बाकरिया रे दो चूण्डो जेड़े दिखो थे, पर अरामिया साथे देश परी गा।

28 तेबे परमेशरो रे तिने माणूंए इस्राएलो रे राजे गे जाई की बोलेया, "यहोवा ईंयाँ बोलोआ कि अरामिये ये बोली राखेया कि यहोवा पाह्ड़ी देवता ए, पर मैदानी जगा रा नि ए, इजी बजअ ते मां से बड़ी पीड़ तेरे आथो दे करी देणी, तेबे तुसा खे पता लगी जाणा कि आऊँ यहोवा ए।" 29 ओर तिने सात दिन तक आमणे-सामणे डेरे लगाई की राखे; तेबे सातुए दिने लड़ाई छिड़ी गी ओर एकी दिनो दे इस्राएलिये 100,000 अरामी सिपाई कायी ते।

30 जो बची गे सेयो अपेको खे नठी की शईरो दे कूसी गे ओर तेती तिना बचे रे लोका बीचा ते 27,000 सिपाई शईरो री दवाल टल़ने ते दबी की मरी गे। बेन्हदद बी नठी गा ओर शईरो दे एकी पीतरले कमरे दे चली गा।

31 तेबे तेसरे कर्मचारिये तेसखे बोलेया, "सुण, आसे तो सुणी राखेया कि इस्राएलो रे कराने दे दया करने वाल़े राजा ओए, इजी री खातर आसा खे लको दे टाट बानी की ओर सिरो पाँदे रस्सिया बानी की इस्राएलो रे राजे गे जाणे दे, क्या पता से तेरे प्राण बचाई देयो।" 32 तेबे सेयो लको दे खसरा टाल्ला ओर सिरो दे रस्सिया बानी की इस्राएलो रे राजे गे जाई की बोलणे लगे, "तेरा दास बेन्हदद ताखे बोलोआ कि कृपा करी की माखे जिऊँदा रणी दे।" राजे ज्वाब दित्तेया, "क्या से एबुए तक जिऊँदा ए? से तो मेरा पाई ए।"

33 तिने लोके ये शुभ शकुन जाणी की, फटाफट बूजणे री कोशिश कित्ती कि ये एसरे मनो री गल्ल ए कि नि, ओर तिने बोलेया, "आ, तेरा पाई बेन्हदद।" राजे बोलेया, "जाई की तेसखे ली आओ।" तेबे बेन्हदद तेसगे आया ओर तिने से आपणे रथो पाँदे चढ़ाईता। 34 तेबे बेन्हददे तेसखे बोलेया, "जो शईर मेरे बाओए तेरे बाओ ते लई ले थे, सेयो मां वापस करी देणे ओर जेड़ी मेरे बाओए सामरिया दे आपू खे सड़का बणाईया, तेड़िया ई तूँ दमिश्को दे सड़का बणवाया।" अहाब राजे बोलेया, "आऊँ एसा गल्ला रिया बजा ते ताखे छाडी देऊँआ" तेबे तिने तेस साथे वादा करी की से आजाद करी ता। 35 इजी ते बाद नबिया रे दलो बीचा ते एकी जणे यहोवे रा वचन पाई की आपणे साथिये खे बोलेया, "माखे बा," जेबे तिने माणूंए तेसखे बाणे खे ना करी ती, 36 तेबे तिने तेसखे बोलेया, "तैं यहोवे रा वचन नि मानेया, इजी बजअ ते सुण, जिंयाँ ई तूँ एथा ते चली जाणा, तिंयाँ ई शेरो तूँ काई देणा।" तेबे जिंयाँ से तेसगे ते चली गा, तिंयाँ ई तेसखे एक शेर मिलेया ओर से काई ता। 37 तेबे तेसखे दूजा माणूं मिलेया ओर तेसखे बी तिने बोलेया, "माखे काईदे।" तेबे तिने तेसरे एड़ी बाई कि से कायल ऊईगा।

38 तेबे से नबी चली गा ओर आखी पगड़िया साथे टखी की राजे खे बाटा रे न्याल़दा ऊआ खड़ा रया। 39 जेबे अहाब राजा नेड़े ऊई की जाणे लगी रा था, तेबे तिने तेसरी दुहाई देई की बोलेया कि जेबे तेरा दास युद्धो रे मैदानो रे गया था तेबे कोई माणूं मेरी तरफा खे मुड़ेया ओर केसी माणूंए खे मांगे ली आया ओर माखे बोलेया, "एस माणूंए री चौकसी कर; जे ये किंयाँ बी छूटी जाओ, तो एसरे प्राणो रे बदले ताखे आपणा प्राण देणा पड़ना, नई तो पैंती किलो चाँदी देणा पड़ना। 40 तिजी ते बाद तेरा दास ओरे-पोरे कामो रे फसी गा, तेबे से नि मिलेया।" इस्राएलो रे राजे तेसखे बोलेया, "तेरा एड़ा ई न्याय ऊणा; तैं आपू आपणा न्याय करी राखेया।" 41 नबीए फटाफट आपणिया आखी ते पगड़ी टाई, तेबे इस्राएलो रे राजे से पछयाणी ला कि से कोई नबी ए। 42 तेबे तिने राजे खे बोलेया, "यहोवा ताखे ईंयाँ बोलोआ इजी खे कि तैं आपणे आथो ते एक एड़ा माणूं जाणे दित्तेया, जो मैं नाश ऊणे खे ठराया था, ताखे तेसरे प्राणो रे बदले आपणा प्राण ओर तेसरी प्रजा रे बदले आपणी प्रजा देणी पड़नी।" 43 तेबे इस्राएलो रा राजा उदास ओर दु:खी ऊई की सामरिया दे आपणे कअरो खे आया।