1 राजा 15

यहूदा दे अबिय्यामो रा राज्य

1 नबातो रे पाऊ यारोबामो रे राज करने रे ठारूए सालो रे अबिय्याम यहूदा पाँदे राज करने लगेया। 2 ओर से तीऊँ साला तक यरूशलेम शईरो पाँदे राज करदा रया। तेसरी माया रा नाओं माका था जो अबशालोमो री बेटी थी। 3 तिने सेयो ई पाप कित्ते जो तेसरे बाओए तेसते पईले कित्ते थे। अबिय्याह आपणे पड़दादे दाऊदो जेड़ा परमेशर यहोवे खे मानणे वाल़ा नि था। 4 यहोवा दाऊदो ते प्यार करो था। तेतेरिया बजा ते ई यहोवे अबिय्याह खे यरूशलेम शईरो दे राज करने दित्तेया ओर यहोवे तेसखे एक पाऊ दित्तेया। यहोवे यरूशलेम बचाई की राखेया। ये तिने दाऊदो रिया तँईं कित्तेया। 5 कऊँकि दाऊद ईमानदारिया ते से ई काम करेया करो था जो यहोवे री नजरा दे ठीक था ओर हित्ती ऊरिय्याह री गल्ला रे सिवाये ओर केसी गल्ला दे यहोवे री केसी आज्ञा ते पूरी जिन्दगी नि मुड़ेया। 6 रहूबियामो री पूरी जिन्दगी तो तेसरे ओर यारोबामो बीचे लड़ाई ऊँदी रयी। 7 अबिय्यामो रे ओर सारे काम जो तिने कित्ते, सेयो यहूदा रे राजेया रे इतिआसो री कताबा दे लिखी राखे। ओर अबिय्यामो री यारोबामो साथे लड़ाई ऊँदी रयी। 8 तेबे अबिय्याम मरीगा ओर से दाऊदो रे शईरो दे दबाईता। तेबे तेसरा पाऊ आसा तेसरी जगा पाँदे राज करने लगेया।

यहूदा दे आसा रा राज्य

9 इस्राएलो दे राजा यारोबामो रे राज्य रे बिऊए सालो रे आसा यहूदा पाँदे राज करने लगेया; 10 ओर यरूशलेम शईरो पाँदे अकताल़ी साला तक राज करदा रया ओर तेसरी माये अबशालोमो री बेटी माका थी। 11 ओर राजा आसे आपणे मूलमर्द दाऊदो जेड़ा तेड़ा ई कित्तेया जो यहोवे री नजरा दे ठीक ओर सई था। 12 तिने तो पुरूषगामी देशो ते निकयाल़ी ते ओर जितणिया मूर्तिया तेसरे बुजुर्गे बणाईया थिया सेयो सारिया तिने दूर करी तिया। 13 बल्कि तेसरी दादी माका जेसे अशेरा रिया तँईं एक घिनौनी मूर्ति बणाई थी तिने से राजमाता रे पदो ते टाईती ओर आसे तेसा री मूर्ति बाडी की किद्रोनो रे नाल़े रे फूकी ती। 14 पर ऊच्ची जगा नि टाल़ी गईया, तेबे बी आसा रा मन पूरी जिन्दगी यहोवे रिया तरफा खे लगेया दा रया। 15 ओर जो सूईना चाँदी ओर पांडे तेसरे बाओए चढ़ाए थे ओर जो तिने आपू चढ़ाए थे, सेयो सारे तिने यहोवे रे मन्दरो दे पऊँचाई ते। 16 आसा ओर इस्राएलो रे राजा बाशा बीचे तिना री पूरी जिन्दगी युद्ध ऊँदा रया। 17 तेबे इस्राएलो रे राजा बाशे यहूदा पाँदे अमला कित्तेया ओर रामा शईर इजी रिया तँईं मजबूत कित्तेया, ताकि कोई यहूदा रे राजा आसा गे आई-जाई नि सको। 18 तेबे आसे जितणा सूईना चाँदी यहोवे रे मन्दरो ओर राजमईलो रे पण्डारो दे रयी गा था से सारा काडी की आपणे कर्मचारिया रे आथो दे सम्बाल़ी की, दमिश्को दे रणे वाल़ा अरामो रे राजा बेन्हददो गे जो हेज्योनो रा पोता ओर तब्रिम्मोनो रा पाऊ था पेजी की ये बोलेया, 19 "जेड़ी मेरे ओर तेरे बाओ बीचे शान्तिया रा समजौता था तेड़ा ई मां ओर तां बीचे बी शान्तिया रा समजौता ऊणा चाईयो, देख, आऊँ तांगे सूईने चाँदिए री पेंट पेजुँआ, इजी री खातर आओ, इस्राएलो रे राजा बाशा साथे कित्ते रे आपणे शान्तिया रे समजौते खे तोड़ी दे, ताकि से ओर तेसरी सेना मांगा गे ते चली जाओ।" 20 आसा राजे री ये गल्ल मानी की बेहन्ददे आपणे दला रे परदाना साथे इस्राएली जगा पाँदे अमला करवाई की इय्योन, दान, आबेल्वेत्माका ओर सारा किन्नेरेत शईर, ओर नप्तालिया रा सारा देश जीती ला। 21 ये सुणी की राजा बाशे रामा शईर पक्का करना छाडीता ओर तिर्सा दे रणे लगेया। 22 तेबे आसा राजे सारे यहूदा दे ये प्रचार करवाया कोई बिना सुणे नि रया, तेबे सेयो रामा शईरो ते पात्थर ओर लकड़ी जिना साथे बाशा तेतेखे पक्का करो था चकी की लईगे ओर तिना साथे आसा राजे बिन्यामीनो रा गेबा ओर मिस्पा शईर पक्का कित्तेया। 23 आसा रे ओर काम ओर तेसरी वीरता ओर जो कुछ तिने कित्तेया ओर जो शईर तिने पक्के कित्ते, ये सारे यहूदा रे राजेया रे इतिआसो री कताबा दे लिखी राखे। पर जेबे से स्याणा ऊआ तेबे तेसखे पैरो दे बमारी लगी गी। 24 आसा मरीगा ओर से तेसरे मूलमर्द दाऊदो रे शईरो दे तेसरे बुजुर्गा रे नेड़े दबाईता। ओर तेसरा पाऊ यहोशापात तेसरी जगा पाँदे राज करने लगेया।

इस्राएलो दे नादाबो रा राज्य

25 यहूदा रे राजा आसा रे राजो रे दूजे साले यारोबामो रा पाऊ नादाब इस्राएलो पाँदे राज करने लगेया; ओर से दो साल तक राज करदा रया। 26 तिने से काम कित्तेया जो यहोवे री नजरा दे बुरा था ओर आपणे बाओ री बाटा दे सेई पाप करदा ऊआ चलदा रया जो तिने इस्राएलो ते करवाया था। 27 बाशा इस्साकारो रे गोत्रो रे अहिय्याह रा पाऊ था, बाशे नादाबो खे काणे री योजना बणाई। नादाबे सारे इस्राएली लोका समेत पलिश्तिया रे देशो रा गिब्बतोन शईर केरी राखेया था। तेबे बाशे गिब्बतोनो रे नेड़े से काई ता।

28 ओर यहूदा रे राजा आसा रे तीजे साले बाशे नादाब काई ता ओर तेसरी जगा पाँदे राजा बणी गा। 29 राजा बणदे ई बाशे यारोबामो रा सारा कराना काई ता; तिने यारोबामो रा कराना एथो तक नाश करी ता कि तिदे एक बी जिऊँदा नि रया, ये सारा यहोवे रे तेस वचनो रे मुताबिक ऊआ जो तिने आपणे दास शीलो रे रणे वाल़े अहिय्याह ते बुलवाया था। 30 ये इजी बजअ ते ऊआ कि यारोबामे आपू पाप कित्ते ओर इस्राएलो ते बी करवाए थे ओर तिने इस्राएलो रे परमेशर यहोवे खे रोष दलाया था। 31 नादाबो रे ओर सारे काम जो तिने कित्ते थे, सेयो सब इस्राएलो रे राजेया रे इतिआसो री कताबा दे लिखी राखे। 32 यहूदा रे राजा आसा ओर इस्राएलो रा राजा बाशा दोनों जदुए तक जिऊँदे रये आपू बीचे लड़ाई करदे रये।

इस्राएलो दे बाशा रा राज्य

33 यहूदा रे राजा आसा रे तीजे सालो रे अहिय्याह रा पाऊ बाशा, तिर्सा रे सारे इस्राएली लोका पाँदे राज करने लगेया ओर चौबी साल तक राज करदा रया। 34 ओर तिने से कित्तेया जो यहोवे री नजरा दे बुरा था ओर यारोबामो री बाटा दे चली की सेई पाप करदा रया जो तिने इस्राएलो ते करवाया था।