1 इस्राएली लोका रे मिस्र देशो ते निकल़ने रे 480 साल बाद जो सुलैमानो रा इस्राएलो पाँदे राज करने रा चौथा साल था, तेसरे जीव* नाओं रे दूजे मीन्ने दे से यहोवे रा मन्दर बनाणे लगेया। 2 जो मन्दर सुलैमान राजे यहोवे खे बणाया से नब्बे फुट* लाम्बा, ती फुट चौड़ा ओर पैंताल़ी फुट ऊच्चा था।* 3 ओर मन्दरो रे सामणे रा आँगण ती फुट लाम्बा था, मतलब मन्दरो री चौड़ाईया रे बराबर था ओर बरांडे री चौड़ाई जो मन्दरो रे सामणे था, से पन्द्रा फुट थी। 4 तेबे तिने मन्दरो दे चौखटा समेत जाल़िया वाल़िया दवारिया बणाईया। 5 ओर तिने मन्दरो रे नेड़े-तेड़े रे पीता साथे लगे रे, मतलब मन्दर ओर दर्शण करने री जगा, दुँईं पीता रे नेड़े-तेड़े तिने मञ्जला ओर कमरे बणाए। 6 सारे ते थालली मञ्जल साडे सात फुट चौड़ी, ओर बीचली नौ फुट ओर पाँदली साडे दस फुट चौड़ी थी, कऊँकि तिने मन्दरो रे नेड़े-तेड़े रे पीत बारलिया तरफा खे कुर्सीदार बणाए थे, इजी खे ताकि कड़िया मन्दरो री दवाला री पकड़ा रे ना ओ। 7 बणांदे बखते मन्दर एड़े पात्थरा साथे बणाया गया, जो तेती ल्याऊणे ते पईले कअड़ी की ठीक कित्ते थे ओर मन्दरो रे बणदे बखते, थौड़ा, छीणी या ओर कोई लोए रे औजारो री आवाज नि सुणी। 8 बारले बीचले कमरे रा द्वार मन्दरो रे दाँणी तरफा खे था ओर लोक चक्करदार पईड़िया रिये ऊई की बीचली मञ्जला खे जाओ थे ओर तिना ते ई पाँदली मञ्जला खे जाया करो थे। 9 तिने मन्दर बणाई की पूरा कित्तेया ओर तेतेरी छत देवदारो री लकड़ी ओर तख़्तेया साथे बणी री थी। 10 ओर पूरे मन्दरो साथे लगी री जो मञ्जला तिने बणाईया सेयो साडे सात फुट ऊच्चिया थिया ओर सेयो देवदारो री लकड़िया रे जरीये मन्दरो साथे मलाईया री थिया।

11 तेबे यहोवे रा ये वचन सुलैमानो गे पऊँचेया, 12 "ये मन्दर जो तूँ बनाणे लगी रा, जे तूँ मेरी बिदिया पाँदे चलेगा ओर मेरे नियम मानोगा ओर मेरी सारी आज्ञा पाँदे चलदा ऊआ तिना रा पालण करदा रएगा, तो जो वचन मैं तेरे बारे दे तेरे बाओ दाऊदो गे दित्तेया था से मां पूरा करना। 13 ओर मां इस्राएली लोका बीचे रणा ओर आपणी इस्राएली प्रजा नि छाडणी।" 14 तेबे सुलैमाने यहोवे रा मन्दर बणाई की पूरा कित्तेया।* 15 तिने मन्दरो री कांदा दे पीतरा ते देवदारो रे तख़्तेया साथे बन्द कित्तिया ओर मन्दरो रे मेल्ले ते छतो तक री कांदा दे पीतरे लकड़िया रे तख़्ते ओर मन्दरो रा मेल्ला तिने केली रे तख़्तेया साथे बणाया।

16 ओर मन्दरो रे पिछले कनारे बी तिने ती फुटो री दूरिया पाँदे मेल्ले ते लई की पीतो पाँदो तक देवदारो रिया तख़्तिया लगाईया, ईंयाँ तिने परम पवित्र जगा खे मन्दरो री एक पीतरली कोठरी बणाई। 17 तिजी रे सामणे रा कमरा साठ फुट लाम्बा था।

18 मन्दरो री कांदा पाँदे पीतरा ते देवदारो री लकड़िया साथे तख़्ताबंदी कित्ती थी ओर तिदे कलिया ओर खिले रे फूला री कडाई करी राखी थी, सारा देवदार ई था, कोई बी पात्थर नि दिशो था।

19 मन्दरो ते पीतरे तिने एक पवित्र जगा दे यहोवे रे वादे रा सन्दूक राखणे खे त्यार कित्ती। 20 ओर तेसा पवित्र जगा री लम्बाई, चौड़ाई ओर ऊचाई ती-ती फुट थी ओर तिने तेते पाँदे शुद्ध सूईना मढ़ेया ओर बेदिया री तख़्ताबंदी देवदारो साथे कित्ती। 21 तेबे सुलैमाने मन्दर पीतरा ते शुद्ध सूईने साथे मढ़ाया ओर पवित्र जगा सामणे सूईने रिया साँगल़िया लगाईया ओर से बी सूईने साथे मढ़ाईया। 22 ओर तिने पूरा मन्दर सूईने साथे मढ़ाई की तेतेरा पूरा काम निपटाई ता। ओर पवित्र जगा री पूरी बेदी बी तिने सूईने साथे मढ़ाई।

23 पवित्र जगा दे तिने पन्द्रा-पन्द्रा फुट ऊच्चे जैतूनो री लकड़िया रे करूब बणाए। 24 एकी करूबो रा एक पंख साडे सात फुट था ओर तेतेरा दूजा पंख बी साडे सात फुट था, एक पंखो रे सिरे ते दूजे पंखो रे सिरे तक लम्बाई पन्द्रा फुट थी। 25 दूजा करूब बी पन्द्रा फुटा रा था; दोनो करूब एक ई नापो रे ओर एक ई आकारो रे थे। 26 एकी करूबो री ऊचाई पन्द्रा फुटो री ओर दूजे री बी इतणी ई थी। 27 तिने करूब पीतरली जगा दे रखवाई ते ओर करूबो रे पंख एड़े फैले थे कि एकी करूबो रा एक पंख, एक कांदा ते ओर दूजे रा दूजा पंख, दूजी कांदा साथे लगेया रा था, तेबे तिना रे दो पंख मन्दरो बीचे एकी-दूजे साथे लगे रे थे। 28 तिने करूब सूईने की मढ़वाए। 29 तिने मन्दरो री कांदा दे बारे ओर पीतरे चऊँ कनारे करूब, खजूर ओर खिले रे फूला री कडाई कराई राखी थी। 30 मन्दरो रे पीतरले ओर बारले मेल्ले तिने सूईने की मढ़वाए। 31 पवित्र जगा रे द्वारो पाँदे तिने जैतूनो री लकड़िया रे दरवाजे लगवाए ओर दरवाजे रे सिरे रा आकार पांजा कूणेया वाल़ा बणवाया। 32 दोनो फल़े जैतूनो री लकड़िया रे थे ओर तिने तिना दे करूब, खजूरी रे डाल़ ओर खिले रे फूला री कडाई कराई ओर सूईने साथे मढ़े रे ओर करूब ओर खजूरा पाँदे बी सूईना मढ़वाया ओर कडाई करवाई।

33 ईंयाँ तिने मन्दरो रे द्वारो खे बी जैतूनो री लकड़िया रे दरवाजे रे कनारे बणाए ओर से मन्दरो री चौड़ाईया रा चौथा इस्सा था। 34 दोनो फल़े केली री लकड़िया रे थे, जिना बीचा ते एकी फल़े रे दो पल्ले थे ओर दूजे फल़े रे दो पल्ले थे जो पल़टी की दोरे ऊई जाओ थे।

35 तिना पाँदे बी तिने करूब ओर खजूरी रे डाल़ ओर खिले रे फूला री कडाई कराई ओर खुदे रे कामो पाँदे तिने सूईना मढ़वाया।

36 तिने पीतरले आँगणो रा केरा कअड़े रे पात्थरा रे तीन रद्दे ओर एक परत देवदारो री कड़िया लगाई की बणाया। 37 सुलैमानो रे राजा बणने रे चौथे सालो रे जीव नाओं रे मीन्ने दे यहोवे रे मन्दरो री निऊँ पाई। 38 ओर ग्यारुए सालो रे बूल नाओं रे आठुए मीन्ने दे मन्दर बनाणे रा काम पूरा ऊआ। ईंयाँ सुलैमानो खे तिजी खे बनाणे खे सात साल लगे। ओर से तिंयाँ ई बणाई की पूरा कित्तेया जेड़ी योजना तिने बणाई राखी थी।