1 राजा 1

राजा दाऊद आपणिया स्याणदिया अवस्था दे

1 एस बखते दाऊद राजा स्याणा ओर तेसरी उम्र बऊत ऊईगी थी; तेसखे गर्म टाल्ले टखाये जाओ थे पर तेबे बी से गर्म नि ओ था। 2 तेबे तेसरे कर्मचारिये तेसखे बोलेया, "म्हारे प्रभु राजे खे कोई जवान कुआँरी छोट्टी टोल़ी जाओ, जो राजे सामणे रई की तेसरी सेवा करेया करो ओर तांगे लेटेया करो ताकि म्हारे प्रभु राजे खे गर्मी पऊँचो।" 3 तेबे तिना खे सारे इस्राएल देशो दे सुन्दर कुआँरी टोल़दे-टोल़दे अबीशग नाओं री एक शूनेमिन छोट्टी मिली ओर सेयो तेसा खे राजे गे ली आए। 4 से छोट्टी सच्चो खे ई बऊत ई बांकी थी; ओर से राजे री दासी बणी की तेसरी सेवा करदी रई; पर राजे रा तेसा साथे कोई बी शारीरिक रिश्ता नि ऊआ।

अदोनिय्याह रा राजद्रोह

5 तेबे राजा दाऊदो री लाड़ी हग्गीता रा पाऊ अदोनिय्याह*1:5 अदोनिय्याह ये दाऊदो रा चौथा पाऊ था ओर तेसरा जन्म तेबे ऊआ था जेबे दाऊद हेब्रोनो ते राज करो था। तेसरे तीन बड़े पाईया रे मरने ते बाद एबे सेई सबी ते बड़ा था। आगे आई की बोलणे लगेया, "मां नवां राजा बणना।" तेबे तिने रथ ओर सवार ओर आपू ते आगे-आगे दौड़ने खे पंजा आदमी राखी ते। 6 ये इजी बजा ते ऊआ कि तेसरे बाओए जन्मो ते लई की तेसखे कदी बी ये बोली की उदास नि कित्तेया था, "तैं एड़ा कऊँ कित्तेया।" से बऊत बांका था ओर अबशालोमो ते बाद से जम्मेया था। 7 अदोनिय्याहे सरूयाह रे पाऊ योआबो ते ओर एब्यातार पुरोईतो साथे गल्ल बात कित्ती ओर तिने तेस पीछे ऊई की तेसरी मताद कित्ती। 8 पर सादोक पुरोईत यहोयादा रा पाऊ बनायाह, नातान नबी, शिमी, रेई ओर दाऊदो रे शूरवीरे अदोनिय्याह रा साथ नि दित्तेया। 9 तेबे अदोनिय्याहे जोहेलेत नाओं रे पात्थरो गे जो एनरोगेलो रे नेड़े ए, पेड बल़द ओर त्यार कित्ते रे डांगर बलि कित्ते ओर आपणे पाई सारे राजकुमार ओर राजे रे सारे यहूदी कर्मचारी बुलाई ले। 10 पर तिने नातान नबी, बनायाह, राजे रे शूरवीर ओर आपणा पाई सुलैमान नि बुलाया। 11 नाताने जेबे ये सुणेया तेबे तिने सुलैमानो री माये बतशेबा खे बोलेया, "क्या तैं सुणी राखेया कि हग्गीता रा पाऊ अदोनिय्याह राजा बणी की बैठी रा ओर म्हारा प्रभु दाऊद इजी रे बारे दे नि जाणदा?" 12 इजी री खातर एबे आओ, आऊँ ताखे एड़ी सला देऊँआ, जेते कि तूँ आपणे ओर आपणे पाऊ सुलैमानो रे प्राण बचाई सकोई। 13 तूँ दाऊद राजे गे जाई की तेसते ईंयाँ पूछ, "ओ मेरे प्रभु! ओ राजा! तैं कसम खाई की आपणी दासिया खे ये बोलेया था कि तेरा पाऊ सुलैमान मांते बाद राजा ऊणा ओर से मेरी राजगद्दिया पाँदे बैठणा। तेबे अदोनिय्याह राजा बणी की कऊँ बैठी रा?" 14 ओर जेबे तां तेती राजे साथे एड़िया गल्ला बताणिया, तेबे मां पीछा ते आई की जो कुछ ऊई रा तेतेरे बारे दे राजे खे बताणा। इजी ते ये गल्ल पक्की ऊई जाणी की जो कुछ तैं बोलेया से सब सच ए।

15 तेबे बतशेबा राजे गे कमरे दे गई; राजा तो बऊत स्याणा था ओर तेसरी सेवा-टईल शूनेमिन अबीशग करो थी। 16 तेबे बतशेबे चूकी की राजे गे माथा टेकेया ओर राजे पूछेया, "तूँ क्या चाए ई?" 17 तेसे ज्वाब दित्तेया, "ओ मेरे प्रभु तैं तो आपणे परमेशर यहोवे री कसम खाई की आपणी दासिया खे बोलेया था, तेरा पाऊ सुलैमान मांते बाद राजा ऊणा ओर से मेरी राजगद्दिया पाँदे बैठणा। 18 एबे देख अदोनिय्याह राजा बणी की बैठी रा, पर यबुओ तक मेरा प्रभु राजा इजी रे बारे दे नि जाणदा। 19 तिने बऊत सारे बल़द त्यार कित्ते, डांगर ओर पेडा बलि कित्ते ओर सारे राजकुमारा खे ओर एब्यातार पुरोईत ओर योआब सेनापति बुलाया, पर तेरा दास सुलैमान नि बुलाया। 20 ओ मेरे प्रभु! ओ राजा! सारे इस्राएली ताखे ताकणे लगी रे कि तूँ तिना खे बोले कि म्हारे प्रभु राजे री गद्दिया पाँदे तांते बाद कुण बैठणा। 21 नई तो जिंयाँ ई म्हारा प्रभु राजा आपणे पीतरा साथे मिली जाणा, तिंयाँ ई तिना मां साथे ओर मेरे पाऊ सुलैमानो साथे अपराधिया जेड़ा बर्ताओ करना।" 22 ईंयाँ बतशेबा राजे साथे गल्ला करने ई लगी री थी कि नातान नबी बी आईगा। 23 तेबे राजे खे बोलेया, "नातान नबी आजीर ए" तेबे से राजे सामणे आया ओर मुंए रे पारे पड़ी की राजे गे माथा टेकेया। 24 तेबे नातान बोलणे लगेया, "ओ मेरे प्रभु, ओ राजा! क्या तैं बोली राखेया कि अदोनिय्याह मांते बाद राजा ऊणा ओर से मेरी गद्दिया पाँदे बैठणा?" 25 देख, तिने आज ऊँदे जाई की बऊत सारे बल़द, त्यार कित्ते रे डांगर ओर पेडा बलि करी राखिया ओर सारे राजकुमार, सेनापति ओर एब्यातार पुरोईत बी बुलाई ला रा ओर सेयो तेस सामणे खांदे-पींदे ऊए बोलणे लगी रे, अदोनिय्याह राजा जिऊँदा रओ। 26 पर तिने आऊँ तेरा दास, ओर सादोक पुरोईत ओर यहोयादा रा पाऊ बनायाह ओर तेरा पाऊ सुलैमान पनि बुलाया। 27 क्या ये मेरे प्रभु राजे रिया तरफा ते ऊआ? तैं तो आपणे दासो गे ये नि बताया था कि प्रभु राजे री गद्दिया पाँदे तेसते बाद कुण बैठणा।

28 दाऊद राजे बोलेया, "बतशेबा खे मांगे बुलाई की ल्याओ।" तेबे से राजे गे आई की तेस सामणे खड़ी ऊई। 29 राजे कसम खाई की बोलेया, "यहोवा जो मेरे प्राण सारे जोखिमा ते बचांदा आई रा, 30 तेसरी जिन्दगिया री कसम, जेड़ा मैं ताखे इस्राएलो रे परमेशर यहोवे री कसम खाई की बोलेया था, कि तेरा पाऊ सुलैमान मांते बाद राजा ऊणा ओर से मांते बाद मेरी गद्दिया पाँदे बैठणा, तेड़ा ई पक्का आजके दिने मां करना।"

31 तेबे बतशेबे जमीना दे पड़ी की राजे गे माथा टेकी की बोलेया, "मेरा प्रभु राजा दाऊद सदा तक जिऊँदा रओ!" 32 तेबे दाऊद राजे बोलेया, "मांगे सादोक पुरोईत, नातान नबी ओर यहोयादा रे पाऊ बनायाहो खे बुलाई की ल्याओ।" तेबे सेयो राजे सामणे आए। 33 राजे तिना खे बोलेया, "आपणे प्रभुए रे कर्मचारिया खे साथे लई की मेरे पाऊ सुलैमानो खे मेरी खच्चरा पाँदे चढ़ाओ ओर गीहोनो खे लई जाओ; 34 ओर तेती सादोक पुरोईत ओर नातान नबी इस्राएलो रा राजा ऊणे खे तेसरा अभिषेक करो; तेबे तुसे नरसिंगा बजाणा ओर बोलणा, ‘राजा सुलैमान जिऊँदा रओ।’ 35 ओर तुसे तेस पीछे-पीछे एती आऊणा ओर से आई की मेरे सिंहासनो पाँदे बैठो, कऊँकि मेरे बदले से ई राजा ऊणा ओर मैं सेई इस्राएल ओर यहूदा रा परदान ऊणे खे ठराई राखेया।" 36 तेबे यहोयादा रे पाऊ बनायाहे बोलेया, "आमीन्! मेरे प्रभु राजे रा यहोवा परमेशर बी एड़ा ई बोलो। 37 जिया यहोवा मेरे प्रभु राजे साथे रया, तिंयाँ से सुलैमानो साथे बी रओ ओर तेसरा राज्य मेरे प्रभु दाऊद राजे ते बी जादा बढ़ाओ।"

38 तेबे सादोक पुरोईत ओर नातान नबी ओर यहोयादो रा पाऊ बनायाह करेती ओर पलेतिया खे साथे लई की ऊँदे गये ओर सुलैमानो खे राजा दाऊदो री खच्चरा पाँदे चढ़ाई की गीहोनो खे लई चले। 39 तेबे सादोक पुरोईते यहोवे रे तम्बूए ते तेल परेया रा सींग काडेया ओर सुलैमानो रा राज्याभिषेक कित्तेया। ओर सेयो रड़सिंगे बजाणे लगे; ओर सारे लोक बोलणे लगे, "राजा सुलैमान जिऊँदा रओ।" 40 तेबे सारे लोक तेस पीछे बंसरी बजांदे ऊए इतणे मजे करदे ऊए ऊबे गये कि तिना री आवाजा साथे तरती ईलणे लगी। 41 जेबे अदोनिय्याह ओर तेसरे सारे निऊँदे वाल़े लोक खाई चुके थे, तेबे तिना खे ये आवाज सुणी ओर योआबे रड़सिंगे री आवाज सुणी की पूछेया, "शईरो दे अलचल ओर चींगणे री आवाज कऊँ ऊणे लगी री?" 42 से ईंयाँ बोलणे ई लगी रा था कि एब्यातार पुरोईतो रा पाऊ योनातान आया ओर अदोनिय्याहे तेसखे बोलेया, "पीतरे आओ; तूँ तो खरा माणूं ए ओर खरा सन्देश बी ल्याया ऊणा।" 43 योनाताने अदोनिय्याहो खे बोलेया, "सच्ची म्हारे प्रभु राजा दाऊदे सुलैमान राजा बणाईता। 44 ओर राजे सादोक पुरोईत, नातान नबी ओर यहोयादा रा पाऊ बनायाह ओर करेती ओर पलेती तेस साथे पेजी ते ओर तिने से राजे री खच्चरा पाँदे चढ़ाई राखेया। 45 ओर सादोक पुरोईते ओर नातान नबीए गीहोनो दे राजा ऊणे खे तेसरा अभिषेक कित्तेया; ओर सेयो तेथा ते एड़े मजे करदे ऊए ऊबो खे गये कि शईरो रे अलचल मची गी ओर जो आवाज तुसा खे सुणने लगी री ये सेईए।" 46 सुलैमान गद्दिया पाँदे बैठणे बी लगी रा। 47 तेबे राजे रे कर्मचारी म्हारे प्रभु दाऊद राजे खे ये बोली की तन्य बोलणे आए, तेरा परमेशर, सुलैमानो रा नाओं, तेरे नाओं ते बी महान करो ओर तेसरा राज्य तेरे राज्य ते बी जादा बढ़ाओ; ओर राजे आपणे माँजे पाँदे माथा टेकेया ओर यहोवे री आराधना कित्ती। 48 फेर राजे ये बी बोलेया, "इस्राएलो रा यहोवा परमेशर तन्य ए, जिने आज मां सामणे मेरिया ल्वादा बीचा ते मेरी गद्दिया पाँदे एक जणा बठयाल़ेया।"

49 तेबे जितणे निऊँदे वाल़े अदोनिय्याह साथे थे सेयो सारे थरथराईगे ओर उठी की आपणी-आपणी बाटा रे गये। 50 ओर अदोनिय्याह सुलैमानो ते डरीगा ओर जाई की बेदिया रे सींग पकड़ी ले। 51 तेबे सुलैमानो खे ये सन्देश मिलेया, "अदोनिय्याह सुलैमानो ते एड़ा डरीगा दा ए कि तिने बेदिया रे सींग ये बोली की पकड़ी ते रे कि आज राजा सुलैमान कसम खाओ कि आपणा दास तलवारी साथे नि काणा।" 52 सुलैमाने बोलेया, "अगर से खरायी दखाओ तो तेसरा एक बी बाल़ जमीना दे नि पड़ना, पर जे तेसरे जिऊए दे बईमानी ओ, तो से काया जाणा।" 53 तेबे राजा सुलैमाने लोक पेजी ते जो तेसखे बेदिया ते उतारी की ली आए तेबे तिने आई की राजा सुलैमानो गे माथा टेकेया ओर सुलैमाने तेसखे बोलेया, "आपणे कअरे चली जा।"