1 राजा 10

शेबा री राणिया रे जरिये सुलैमानो री तारीफ

1 जेबे शेबा देशो री राणिये यहोवे रे नाओं रे बारे दे ओर सुलैमानो री कीर्ति सुणी, तेबे से कठण-कठण प्रश्ना ते तेसरी परीक्षा करने यरूशलेम शईरो खे चली पड़ी। 2 से तो बऊत पारी दला साथे मसाला, ओर बऊत सूईना ओर मणिया साथे लदे रे ऊँट साथे लई की यरूशलेम शईरो खे आई ओर सुलैमानो गे पऊँची की आपणे मनो री सारिया गल्ला रे बारे दे तेस साथे गल्ला करने लगी। 3 सुलैमान राजे तेसा रे सारे प्रश्ना रे ज्वाब दित्ते, तेसा रा एड़ा कोई बी प्रश्न नि था जेतेरा ज्वाब सुलैमाने तेसा खे नि दित्तेया ओ।

4 जेबे शेबा री राणिये सुलैमानो री सारी अक्लमंदी, ओर तेसरा बणाया रा मईल ओर तेसरे मेजो पाँदला खाणा देखेया, 5 ओर तेसे ये बी देखेया कि तेसरे कर्मचारी मिली की रओए। तेसे मईलो दे तेसरे सेवा-टईल करने वाल़े ओर तिना रे बांके टाल्ले जो तिने पईनी राखे थे, सेयो बी देखे। तेसे तेसरा खाणे-पीणे रा तरीका ओर यहोवे रे मन्दरो दे चढ़ावे ओर बलि बी देखे ओर किंयाँ सेयो ऊबे चढ़ाई चढ़ी की मन्दरो दे जाओए देखेया। इना सबी खे देखी कि से बऊत ई हैरान ऊईगी। 6 तेबे तेसे राजे खे बोलेया, "तेरे काम ओर अक्ला री जो कीर्ति मैं आपणे देशो रे सुणी थी से सच्च ए। 7 पर जदुओ तक मैं आपू ई आपणिया आखी साथे नि देखेया, तदुओ तक मैं तिना गल्ला पाँदे परोसा नि कित्तेया, बल्कि एत्तेरा आदा बी मांगे नि बताया था; तेरी बुद्धि ओर कल्याण तेसा कीर्तिया ते बी बढ़ी की ए, जो मैं सुणी थी। 8 तन्य ए तेरे माणूं! तन्य ए तेरे यो सेवक! जो हर रोज तां सामणे आजीर रयी की तेरी बुद्धिया रिया गल्ला सुणोए। 9 तन्य ए तेरा यहोवा परमेशर! जो तांते एड़ा खुश ऊआ कि तूँ इस्राएलो री राजगद्दिया पाँदे बठयाल़ेया, यहोवा इस्राएलो साथे सदा प्यार राखोआ, इजी बजअ ते तिने तूँ न्याय ओर तर्म करने खे राजा बणाया।"

10 तेबे तेसे राजे खे लगभग 4,000 किलो सूईना, बऊत सारा खुशबूदार द्रव्य ओर मणि दित्ते; जितणा खुशबूदार द्रव्य शेबा री राणिये सुलैमान राजे खे दित्तेया, तीतणा फेर कदी नि आया।

11 तेबे हीरामो रे जाह्ज बी जो ओपीरो ते सूईना ल्याओ थे, सेयो बऊत सारी चन्दनो री लकड़ी ओर मणि बी ल्याये। 12 ओर राजे चन्दनो री लकड़िया ते यहोवे रा मन्दर ओर राजमईलो रे खम्बे ओर गाणेवाल़ेया खे बीणा ओर सारंगिया बणवाईया; एड़ी चन्दनो री लकड़ी आजो तक फेर कदी नि आई ओर ना ई दिखी।

13 शेबा री राणिये जो कुछ चाया, सेई सुलैमान राजे तेसा री इच्छा रे मुताबिक तेसा खे दित्तेया, फेर सुलैमान राजे तेसा खे आपणी उदारता ते बऊत कुछ दित्तेया, तेबे से आपणे माणूंआ समेत आपणे देशो खे वापस ऊई गी।

14 जो सूईना हर साल सुलैमानो गे पऊँचेया करो था, तेतेरा बजन 25,000 किलो*10:14 25,000 किलो 666 किक्कार था। 15 इजी ते जादा सौदागरा ते ओर बपारिया रे लेण-देणो ते ओर अरब देशो रे सारे राजा ओर आपणे देशो रे राज्यपालो ते बी बऊत कुछ मिलो था। 16 सुलैमान राजे सूईना कअड़ी की 200 बड़ी-बड़ी ढाला बणवाईया, एकी-एकी ढाली दे लगभग सात-सात किलो सूईना लगेया। 17 तेबे तिने सूईना कअड़ी की 300 छोटी ढाला बी बणवाईया, एक-एक छोटी ढाला दे लगभग 1,700 ग्राम*10:17 1,700 ग्राम तीन माने सूईना लगेया ओर राजे सेयो लबानोनो रा वन नाओं रे मईलो दे रखवाई तिया। 18 राजे आथी दाँदो रा एक बड़ा सिंहासन बणवाया ओर खरे कुन्दनो साथे मढ़वाया। 19 तेते सिंहासनो दे छे पईड़िया थिया ओर सिंहासनो रा सरयाणा पिछलिया तरफा खे गोल़ था ओर बैठणे री जगा री दोनो तरफा खे टासणा लगी रा था ओर दुँईं टासणे गे एक-एक शेर खड़ेया रा बणी रा था। 20 ओर छे पईड़िया रे दुँईं कनारे एक-एक शेर खड़ेया रा बणी रा था, कुल बारा शेर बणी रे थे। केसी राज्य दे एड़ा सिंहासन कदी नि बणेया। 21 सुलैमान राजे रे पीणे रे सारे पांडे सूईने रे बणी रे थे ओर लबानोनो रा वन नाओं रे मईलो रे सारे पांडे बी शुद्ध सूईने रे बणी रे थे, चाँदिए रा कोई बी पांडा नि था। सुलैमानो रे दिना दे तिजी री कोई कीमत नि थी। 22 कऊँकि समुद्रो दे हीरामो रे जाह्जा साथे राजा बी तर्शीशो दे जाह्ज राखो था ओर तीऊँ-तीऊँ साला तक तर्शीशो रे जाह्ज सूईना, चाँदी, आथी दाँद, बान्दर ओर मोर लई की आओ थे।

23 ईंयाँ सुलैमान राजा, तअन ओर बुद्धिया दे तरतिया रे सारे राजेया ते बढ़ी की ऊईगा। 24 ओर सारी तरतिया रे लोक तेसरी बुद्धिया री गल्ला सुणने खे जो परमेशरे तेसरे मनो दे पैदा कित्ती थी, सुलैमानो रा दर्शण करना चाओ थे। 25 ओर सेयो हर साल आपणी-आपणी पेंट, मतलब चाँदी ओर सूईने रे पांडे, टाल्ले, शस्त्र, खुशबूदार द्रव्य, कोड़े ओर खच्चरा ली आओ थे। 26 तेबे सुलैमाने रथ ओर सवार कट्ठे करी ले, तो तेसरे 1,400 रथ ओर 12,000 सवार ऊए, ओर तिने सेयो रथा रे शईरा दे ओर यरूशलेम शईरो दे राजे गे ठराईते। 27 सुलैमान राजे चाँदी बऊत ऊणे रिया बजअ ते यरूशलेम शईरो दे एड़ा करी ता जेड़े पात्थर, ओर देवदारो री लकड़ी बऊत ऊणे रिया बजा ते तेतेरी कीमत थालले देशो रे गूलरो री लकड़िया जेड़ी करिती।

28 ओर जो कोड़े सुलैमान राखो था, सेयो मिस्रो ते आओ थे ओर राजे रे बपारी तिना खे चूण्ड-चूण्ड करी की ठराए रे दामो रे मुताबिक लया करो थे। 29 मिस्र देशो ते एकी रथो री कीमत 600 चाँदिए रे सिक्के ओर एकी कोड़े री कीमत 150 चाँदिए रे सिक्के थी। एस ई दामो रे सेयो हित्ती ओर अरामो रे सारे राजेया खे बी बपारिया रे जरीये आओ थे।