1 राजा 9

सुलैमानो खे यहोवे रा दूजा दर्शण

1 जेबे सुलैमान यहोवे रे मन्दर ओर राजमईलो खे बणाई चुकेया ओर जो कुछ से करना चाओ था, तिजी खे पूरा करी चुकेया, 2 तेबे यहोवे जिंयाँ तेसखे गिबोन जगा दे दर्शण दित्तेया था, तिंयाँ ई दूजी बार बी तेसखे दर्शण दित्तेया। 3 ओर यहोवे तेसखे बोलेया, "जो प्रार्थना तैं गिड़गिड़ाई की मांते कित्ती थी, से मैं सुणी, ये मन्दर जो तैं बणाई राखेया, तिदे मैं आपणा नाओं सदा खे राखी की से पवित्र करी राखेया ओर मेरिया आखी ओर मेरा मन सदा तेथी लगेया दा रणा। 4 ओर जे तूँ आपणे बाओ दाऊदो जेड़ा मनो री सच्चाईया ओर सीदे सबाओ ते आपू खे मां सामणे जाणी की चलदा रये ओर मेरी सारी आज्ञा रे मुताबिक करेया करे ओर मेरी बिदिया ओर नियम मानदा रये, तो मां तेरा राज्य इस्राएलो पाँदे सदा बणाई की राखणा; 5 जेड़ा कि मैं तेरे बाओ दाऊदो खे वचन दित्तेया था, ‘तेरे कुलो दे इस्राएलो री गद्दिया पाँदे विराजणे वाल़े सदा बणे दे रणे।’ 6 पर जे तुसे लोक ओर तुसा रे कुलो रे लोक मां पीछे चलणा छाडी देयो ओर मेरी तिना आज्ञा ओर नियमा खे जो मैं तुसा खे देई राखे, मानो नि ओर जाई की पराये देवतेया री आराधना करो ओर तिना गे माथा टेकणे लगो, 7 तो मां इस्राएल तेस देशो ते जो मैं तिना खे देई राखेया, बाडी देणे ओर ये मन्दर जो मैं आपणे नाओं खे पवित्र करी राखेया, आपणी नजरा ते गिराई देणा ओर सारे देशा रे लोका बीचे इस्राएलो री उपमा देया करनी ओर उदारण बोलेया करना। 8 ओर ये मन्दर जो ऊच्चे पाँदे रणा, तो जो कोई एतेरे नेड़े चलेया करोगा, से हैरान ऊणा ओर चाड़िया बजाणियां ओर तिना पूछणा, ‘यहोवे एस देशो साथे ओर मन्दरो साथे एड़ा कऊँ कित्तेया;’ 9 तेबे लोका बोलणा कि तिने आपणे परमेशर यहोवे खे जिने तिना रे बुजुर्ग मिस्र देशो ते निकयाल़ी की ल्याये थे, त्यागी की पराये देवते पकड़ी ले ओर तिना गे माथा टेकेया ओर तिना री आराधना कित्ती, इजी बजअ ते यहोवे ये सारी मुसीबत तिना पाँदे ल्याई।"

सुलैमानो रा हीरामो साथे समजौता

10 सुलैमानो खे तो यहोवे रे मन्दर ओर राजमईल बनाणे खे बीइ साल लगी गे। 11 तेबे सुलैमाने सोर देशो रे राजा हीरामो खे जिने तेसखे मनमाने देवदार ओर केली री लकड़ी ओर सूईना दित्तेया था, गलील देशो दे बीइ शईर दित्ते। 12 जेबे हीरामे सोरो ते जाई की सेयो शईर देखे, जो सुलैमाने तेसखे दित्ते थे, तेबे सेयो तेसखे ठीक नि लगे। 13 तेबे हीरामे सुलैमानो खे बोलेया, "ओ मेरे पाई, यो केड़े शईर तैं माखे देई राखे?" ओर तिने तिना शईरा रा नाओं कबूल*9:13 कबूल बेकार देश राखेया ओर ये ई नाओं आजके दिन तक पड़ेया राए। 14 तेबे हीरामे राजे गे लगभग 4,000 किलो*9:14 4,000 किलो 120 किक्कार सूईना पेजेया था।

सुलैमानो रे ओर काम

15 राजा सुलैमाने तिना लोका खे जो काम करने खे राखे थे, तिजी रा मतलब ये था कि सेयो यहोवे रा ओर राजा सुलैमानो रा मईल बणाओ ओर मिल्लो शईर ओर यरूशलेम शईरो री दवाल ओर हासोर, मगिद्दो ओर गेजेर शईरा खे मजबूत करो। 16 गेजेर शईरो पाँदे मिस्रो रे राजे फिरौने अमला करी की से लई ला ओर आग लगाई की फूकी ता ओर तेस शईरो दे रणे वाल़े कनानी लोक काईते, ओर तिने से शईर आपणी बेटी जो सुलैमानो री लाड़ी थी, तेसा रा निज इस्सा करी की दित्तेया था, 17 तेबे सुलैमाने गेजेर ओर थालला बेथोरोन, 18 बालात ओर तदमोर शईर जो यहूदा प्रदेशो रिया उजाड़ जगा दे ए, मजबूत कित्ते, यो तो तिना रे ई देशो दे ए। 19 सुलैमान राजे सेयो शईर बी बणाए जेती से कई ओर चीजा खे पण्डार बणाई सको था ओर तिने आपणे रथा ओर कोड़ेया खे बी जगा बणाई। सुलैमाने ओर बी बऊत जिया चीजा बणाईया जिना खे से यरूशलेम शईरो दे, लबानोन ओर आपणे कब्जे वाल़े तिना सबी जगा दे चाओ था। 20 देशो दे एड़े लोक बी थे जो इस्राएली नि थे पर इस्राएलो दे रओ थे। सेयो एमोरी, हित्ती, परिज्जी, हिब्बी ओर यबूसी जातिया रे लोक थे, 21 पर तिना रे कुल जो तिना ते बाद देशो दे रयी गे ओर जिना खे इस्राएली नाश नि करी सके, सेयो सुलैमाने दास बणाई की सेवा रे कामो पाँदे राखी ते ओर आजो तक तिना री सेई दशा ए। 22 पर इस्राएली लोका बीचा ते सुलैमाने कोई बी दास नि बणाया; सेयो तो योद्धा ओर तेसरे कर्मचारी, तेसरे परदान, तेसरे सरदार ओर तेसरे रथ ओर सवारा रे परदान थे।

23 जो खास बड़े परदान सुलैमानो रे कामो पाँदे रयी की काम करने वाल़ेया पाँदे राज करो थे, सेयो 550 थे।

24 जेबे फिरौनो री बेटी दाऊदो रे शईरो ते आपणे तेस मईलो खे आईगी, जो सुलैमाने तेसा खे बणाया था तेबे तिने मिल्लो बणाया। 25 सुलैमान तेसा बेदिया पाँदे जो तिने यहोवे खे बणाई थी, हर साल तीन बार होमबलि ओर मेलबलि चढ़ाया करो था ओर साथे ई तेसा बेदिया पाँदे जो यहोवे सामणे थी, तूप बाल़ेया करो था, ईंयाँ तिने से मन्दर बणाई की त्यार कित्तेया। 26 तेबे सुलैमान राजे एस्योनगेबेर शईरो दे जो एदोम देशो रे लाल समुद्रो रे कनारे एलोत शईरो रे नेड़े ए, बऊत जे जाह्ज बणाए। 27 ओर जाह्जा दे राजा हीरामे आपणे मल्लाह खे, जो समुद्रो री जानकारी राखो थे, सुलैमानो रे सेवका साथे पेजी ते। 28 तिने ओपीर शईरो खे जाई की तेथा ते लगभग 16,000 किलो सूईना,*9:28 420 किक्कार सूईना सुलैमान राजे खे ल्याई की दित्तेया।