1 राजा 11

सुलैमानो रा पापो दे फसणा

1 पर सुलैमान राजा फिरौनो री बेटी ओर कई ओरी परायी जवाणसा साथे, जो मोआबी, अम्मोनी, एदोमी, सीदोनी ओर हित्ती थिया, प्यार करने लगेया। 2 पर सेयो तिना जातिया री थिया जिना रे बारे दे यहोवे इस्राएली लोका खे बोलेया था, "तुसे इना बीचे नि जाणा ओर ना ई सेयो तुसा बीचे आओ, तिना तुसा रा मन आपणे देवतेया रिया तरफा खे पक्का फेरना;" तिना रेई प्यारो दे सुलैमान मस्त ऊईगा। 3 सुलैमानो रिया 700 राणिया ओर 300 रखैलिया ऊईगिया थिया ओर इने जवाणसे तेसरा मन बह्ईकायी ता। 4 तेबे जेबे सुलैमान स्याणा ऊईगा, तेबे तेसरी जवाणसे तेसरा मन पराये देवतेया रिया तरफा खे बह्ईकायी ता ओर जेड़ा सुलैमानो रे बाओ दाऊदो रा मन परमेशर यहोवे रिया तँईं परोसे जोगा था तेड़ा तेसरा मन नि था।

5 सुलैमान तो सिदोनो रे लोका री अश्तोरेत नाओं री देवी ओर अम्मोनी जातिया रे मिल्कोम नाओं रे घृणित देवतेया पीछे चलणे लगेया। 6 तेबे सुलैमाने से कित्तेया जो यहोवे री नजरा दे बुरा था। तिने आपणे बाओ दाऊदो जेड़ी यहोवे री आज्ञा पूरी तरआ ते नि मानी। 7 तिना दिना दे सुलैमाने यरूशलेम शईरो सामणे रे पाह्ड़ो पाँदे मोआबिया रे कमोश नाओं रे घृणित देवते खे ओर अम्मोनिया रे मोलेक नाओं रे घृणित देवते खे एक-एक ऊच्ची जगा बणाई। 8 ओर आपणिया सारिया परायी जवाणसा खे बी जो आपणे-आपणे देवतेया खे तूप बाल़ो थिया ओर बलिदान करो थिया, तिने एड़ा ई कित्तेया।

9 तेबे यहोवे खे सुलैमानो पाँदे रोष आई गा, कऊँकि तेसरा मन इस्राएलो रे परमेशर यहोवे ते दूर ऊईगा था जिने दो बार तेसखे दर्शण दित्तेया था। 10 ओर तिने एसा ई गल्ला रे बारे दे आज्ञा दित्ती थी कि पराये देवतेया पीछे नि चलणा, तेबे बी तिने यहोवे री आज्ञा नि मानी। 11 इजी खे यहोवे सुलैमानो खे बोलेया, "तांते जो एड़ा काम ऊई रा ओर मेरी बानी दी वाचा ओर मेरी दित्ती री बिधि तैं पूरी नि कित्ती, इजी बजअ ते मां तेरा राज तांते पक्का छीनी की तेरे एक कर्मचारिये खे देई देणा। 12 पर आऊँ तेरे बाओ दाऊदो ते प्यार करुँ था। इजी री खातर जदुए तक तूँ जिऊँदा ए मां तेरा राज्य नि लणा। तेरे मरने ते बाद मां तेरे पाऊए खे सारे राज्य पाँदे राज नि करने देणा। 13 तेबे बी मां पूरा राज्य नि छुड़ाणा, पर आपणे दास दाऊदो रिया बजअ ते ओर आपणे चूणे दे यरूशलेम शईरो रिया बजअ ते, मां तेरे पाऊए रे आथो दे एक गोत्र*11:13 एक गोत्र यहूदा छाडी देणा।"

सुलैमानो रे दुश्मण

14 तेबे यहोवे सुलैमानो रा एक दुश्मण बणाईता। तेसरा नाओं हदद था जो एदोमी राजवंशो रा था। 15 कऊँकि जेबे दाऊद एदोमो दे था ओर योआब सेनापति काये रेया खे माट्टी देणे गया, 16 (योआब तो तेती सारे इस्राएली लोका समेत छे मीन्ने तक रया, जदुओ तक कि तिने एदोमो रे सारे मर्द नाश नि करी ते) 17 तेस बखते जेबे हदद जो छोटा पाऊ था, आपणे बाओ रे कई एक एदोमी सेवका साथे मिस्रो दे जाणे री इच्छा ते नठी गा। 18 ओर सेयो मिद्यान इलाके ते ऊई की पारानो रे रेगिस्तानो खे आए ओर पारानो ते कई मर्दा खे साथे लई की मिस्रो रे फिरौन राजे गे गये ओर फिरौने तेसखे कअर दित्तेया ओर तेसखे रोटी-पाणिये रा इन्तजाम कित्तेया ओर कुछ जमीन बी दित्ती।

19 ओर हददो पाँदे फिरौनो री बड़ी दया-दृष्टि ऊई ओर तिने तेसखे आपणी साल़ी मतलब तहपनेस राणिया री बईण ब्यायी ती। 20 ओर तहपनेसा री बईणा ते गनूबत पैदा ऊआ ओर एसरा दूद तहपनेसे फरौनो रे मईलो दे छुड़ाया; तेबे गनूबत फिरौनो रे मईलो दे तेसरे ई पाऊआ साथे रओ था। 21 जेबे हददे मिस्रो दे रंदे ऊए ये सुणेया कि दाऊद राजा मरीगा ओर योआब सेनापति बी मरीगा, तेबे तिने फिरौनो खे बोलेया, "माखे आज्ञा दे कि आऊँ आपणे देशो खे जाऊँ!" 22 फिरौने बोलेया, "कऊँ? मांगे एती ताखे क्या कमी ऊई कि तूँ आपणे देशो खे जाणा चाएया?" तिने ज्वाब दित्तेया, "कोई कमी नि ऊई, तेबे बी माखे जरूर जाणे दे।"

23 तेबे परमेशरे राजा सुलैमानो रा एक ओर दुश्मण बणाईता, मतलब एल्यादा रा पाऊ रजोन, से तो आपणे स्वामी सोबा रे राजा हदादेजेरो गे ते नठेया था; 24 ओर जेबे राजा दाऊदे सोबा रे माणूं काये, तेबे रजोने आपू गे कई मर्द कट्ठे कित्ते ओर तिना रा परदान बणी गा ओर से दमिश्क शईरो खे जाई की तेथी रणे ओर राज करने लगेया। 25 तेस नुकशाणो खे छाडी की जो हददे कित्तेया, रजोन बी, सुलैमानो रा पूरी जिन्दगी दुश्मण बणेया दा रया ओर से इस्राएलो ते नफरत करदा ऊआ अरामो पाँदे राज करो था।

यारोबामो रा बिद्रोह

26 तेबे नबातो रा पाऊ यारोबाम नाओ रा एक माणूं राजा सुलैमानो रे खलाफ ऊईगा, से सरूयाह नाओं री बिदुआ रा पाऊ था। से एप्रैमी सरेदा शईरो दे रणे वाल़ा था। जो सुलैमानो रा कर्मचारी बी था। 27 तेसरा राजे रे खलाफ ऊणे री बजअ ये थी कि सुलैमान मिल्लो खे बनाणे लगी रा था ओर आपणे बाओ दाऊदो रे शईरो री दवाला रिया खीड़ा बन्द करने लगी रा था। 28 यारोबाम बड़ा शूरवीर था ओर जेबे सुलैमाने से जवान देखेया कि ये मईणती ए; तेबे तिने से यूसुफो रे कराने रे सारे कामा पाँदे मुखिया ठराया। 29 एक दिन यारोबाम यरूशलेम शईरो ते निकल़ी की जाणे लगी रा था कि शीलो शईरो रा रणे वाल़ा अहिय्याह नबी, नवीं चाद्दर टखी की बाटा दे तेसते मिलेया ओर बस सेयो ई दोनो मैदानो दे थे। 30 ओर अहिय्याहे आपणी से नवीं चाद्दर लई ली ओर तेसा फाड़ी की बारा टुकड़े करी ते। 31 तेबे तिने यारोबामो खे बोलेया, दस टुकड़े लई लो; कऊँकि इस्राएलो रा यहोवा परमेशर ईंयाँ बोलोआ, "सुण, आऊँ राज्य खे सुलैमानो रे आथो ते छीनी की दस गोत्र तेरे आथो दे करी देऊँआ। 32 पर मेरे दास दाऊदो रिया बजअ ते ओर यरूशलेम शईरो रिया बजअ ते जो मैं इस्राएलो रे सारे गोत्रा बीचे चूणी राखे, तेसरा एक गोत्र बणेया दा रणा।" 33 इजी री बजअ ये कि तिने आऊँ त्यागी की सीदोनिया री देवी अश्तोरेता गे ओर मोआबिया रे देवता कमोशो गे ओर अम्मोनिया रे देवता मिल्कोमो गे माथा टेकेया ओर मेरी बाटा दे नि चलेया ओर जो मेरी नजरा दे ठीक ए, से नि कित्तेया ओर मेरी बिदिया ओर मेरे नियम नि माने, जेड़ा कि तेसरे बाओ दाऊदे कित्तेया। 34 तेबे बी मां तेसरे आथो ते पूरा राज्य नि लणा, पर मेरा चूणेया रा दास दाऊद जो मेरी आज्ञा ओर बिदिया मानदा रया, तिजी री बजअ ते मां से पूरी जिन्दगी परदान बणाया दा राखणा। 35 पर तेसरे पाऊए रे आथो ते मां राज्य, मतलब दस गोत्र ताखे देई देणे। 36 ओर तेसरे पाऊए खे मां एक गोत्र*11:36 एक गोत्र यहूदा देणा, कऊँकि यरूशलेम मतलब तेस शईरो दे जो आपणा नाओं राखणे खे मैं चूणी राखेया, मेरे दास दाऊदो रा दिऊआ सदा मां सामणे बणेया रा रओ। 37 पर मां ताखे तिना सबी पाँदे राज करने देणा जिना खे तूँ चाएया। तां सारे इस्राएल देशो पाँदे राज करना। 38 जे तूँ मेरे दास दाऊदो जेड़ा सच्चा-पक्का ओर परोसे वाल़ा बणी की मेरी सारी आज्ञा खे माने ओर मेरी बाटा दे चले ओर जो काम मेरी नजरा दे ठीक ए, सेई करे ओर मेरी बिदिया ओर आज्ञा मानदा रये, तो मां तां साथे रणा ओर जिंयाँ मैं दाऊदो रा कराना बणाई की राखेया, तेड़ा ई तेरा कराना बी बणाई राखूँगा ओर तेरे आथो दे इस्राएलो खे देऊँगा। 39 एस पापो रिया बजअ ते मां दाऊदो रे कराने खे सजा देणी, तेबे बी सदा तक नि देणी। 40 तेबे सुलैमाने यारोबाम काणा चाया, पर से मिस्रो रे राजा शीशको गे नठी गा ओर सुलैमानो रे मरने तक तेथी रया।

सुलैमानो री मौत

41 सुलैमानो रिया ओर सब गल्ला ओर तेसरे सारे काम ओर तेसरी बुद्धिया रा वर्णन सुलैमानो री इतिआसो री कताबा दे लिखी राखे। 42 सुलैमानो खे यरूशलेम शईरो रे सारे इस्राएलो पाँदे राज करदे ऊए चाल़ी साल बीतीगे। 43 तेबे सुलैमान मरीगा ओर से तेसरे बाओ दाऊदो रे शईरो रे दबाईता, जेती तेरे बुजुर्ग दबाई राखे थे। ओर तेसरा पाऊ रहूबियाम तेसरी जगा पाँदे राजा बणी गा।