1 सोर शईरो रे हीराम राजे आपणे दूत सुलैमानो गे पेजे, कऊँकि तिने सुणेया था कि से अभिषिक्त ऊई की आपणे बाओ री जगा पाँदे राजा बणी गा दा ओर दाऊदो री पूरी जिन्दगिया दे हीराम तेसरा दोस्त बणेया दा रया। 2 सुलैमाने हीरामो गे तेसरे सन्देशो रा ये ज्वाब पेजेया, "ताखे पता ए, 3 कि मेरा बाओ दाऊद आपणे परमेशर यहोवे रे नाओं रा एक मन्दर इजी खे नि बणाई सकेया कि से चऊँ कनारे रिया लड़ाईया दे एड़ा फसेया दा रया, जदुओ तक यहोवे तेसरे दुश्मण तेसरे पैरा निठे नि करी ते।" 4 पर एबे मेरे यहोवा परमेशरे मेरे देशो खे चऊँ तरफा ते राम देई राखेया। एबे मेरा कोई दुश्मण नि ए। मेरे लोक केसी बी खतरे दे नि ए। 5 मैं आपणे परमेशर यहोवे रे नाओं रा एक मन्दर बनाणे री ठाणी राखी, मतलब तेसा गल्ला रे मुताबिक जो यहोवे मेरे बाओ दाऊदो खे बोली थी, "तेरा पाऊ जो मां तेरी जगा दे गद्दिया पाँदे बठयाल़ना, तेस ई मेरे नाओं रा मन्दर बनवाणा।" 6 इजी री खातर एबे तूँ माखे लबानोनो पाँदा ते देवदार बाडणे री आज्ञा दे ओर मेरे दास तेरे दासा साथे रणे ओर जो कुछ मजदूरी तां ठराणी, सेई मां ताखे ओर तेरे दासा खे देणी, ताखे पता तो आए कि सीदोन शईरो रे बराबर लकड़ी बाडणे रा पेत आसा लोका बीचा ते कोई नि जाणदा। 7 सुलैमान राजे रिया इना गल्ला खे सुणी की हीराम राजा बऊत खुश ऊईगा ओर तिने बोलेया, "आज यहोवा तन्य ए, जिने दाऊदो खे तेसा बड़ी जातिया पाँदे राज करने खे एक अक्लमंद पाऊ दित्तेया।"

8 तेबे हीराम राजे सुलैमान राजे खे ये सन्देशा पेजेया, "जो तैं माखे सन्देशा पेजी राखेया से मेरी समजा दे आई गा, देवदार ओर केली री लकड़िया रे बारे दे जो कुछ तूँ चाए, मां सेई करना। 9 मेरे दासा लकड़ी लबानोनो ते समुद्रो तक पऊँचाणी, तेबे मां तिना रे बेड़े बणाई की जो जगा तूँ ठराएगा, तेथी समुद्रो रिया बाटा रिये सेयो पऊँचाई देणे, तेती मां सेयो खोली की राखी देणे ओर तैं सेयो लई लणे ओर तैं मेरे परिवारो खे रोटी देई की मेरी बी इच्छा पूरी करनी।" 10 ईंयाँ हीराम राजा सुलैमान राजे री इच्छा रे मुताबिक तेसखे देवदार ओर केली री लकड़ी देणे लगेया। 11 ओर सुलैमान राजे हीराम राजे रे परिवारो रे खाणे खे 2,000 टन कणक ओर 440,000 लीटर शुद्ध जैतूनो रा तेल दित्तेया; ईंयाँ सुलैमान राजा हीराम राजे रे परिवारो खे हर साल देया करो था।

12 यहोवे सुलैमानो खे आपणे वादे रे मुताबिक बुद्धि दित्ती ओर हीराम राजा ओर सुलैमान राजे बीचे मेल बणेया रा रया, बल्कि तिने दुँईं आपू बीचे वाचा बी बानी ती। 13 सुलैमान राजे पूरे इस्राएलो रे 30,000 लोक कामो दे लगाए, 14 ओर से तिना खे लबानोन पाहड़ो पाँदे बारी-बारी करी की मीन्ने रे मीन्ने 10,000 पेजेया करो था ओर एक मीन्ना सेयो लबानोनो पाँदे ओर दो मीन्ने कअरे रया करो थे; ओर कामो वाल़ेया पाँदे अदोनीराम ठराया। 15 सुलैमानो रे 70,000 बोजा टोणे वाल़े ओर पाह्ड़ो पाँदे 80,000 डाल़ बाडणे वाल़े ओर पात्थर काडणे वाल़े थे। 16 इना खे छाडी की सुलैमानो रे 3,300 मुखिया थे, जो काम करने वाल़ेया पाँदे अधिकारी थे। 17 तेबे राजे री आज्ञा ते बड़े-बड़े कीमती पात्थर इजी रिया तँईं खणी की निकयाल़े, ताकि मन्दरो री निऊँ, कअड़े रे पात्थरा साथे पाई जाओ। 18 सुलैमानो रे कारीगर ओर हीरामो रे कारीगर ओर गबाली शईरो रे लोके सेयो पात्थर कअड़े ओर मन्दरो खे बनाणे खे लकड़ी ओर पात्थर त्यार कित्ते।