1 राजा 22

मीकायाह नबीए रे जरीये अहाबो खे चतौणी

1 लगभग तीऊँ साला तक अरामी ओर इस्राएलो बीचे कोई युद्ध नि ऊआ। 2 तीजे सालो दे यहूदा रा राजा यहोशापात इस्राएलो रे राजे गे गया। 3 तेबे इस्राएलो रे राजे आपणे कर्मचारिया खे बोलेया, "क्या तुसा खे पता ए कि गिलाद इलाके रा रामोत शईर म्हारा ए? तेबे आसे चुपचाप कऊँ रऊँए ओर तेस रामोत शईरो खे अरामो रे राजे रे आथो ते कऊँ नि छुड़ाई लंदे?" 4 ओर तिने यहोशापातो ते पूछेया, "क्या तूँ मां साथे गिलाद इलाके रा रामोत शईरो दे लड़ने खे जाणा?" यहोशापाते इस्राएलो रे राजे खे ज्वाब दित्तेया, "जेड़ा तूँ ए तेड़ा ई आऊँ बीए। जेड़ी तेरी प्रजा ए तेड़ी मेरी प्रजा बीए ओर जेड़े तेरे कोड़े ए तेड़े मेरे बी कोड़े ए।" 5 तेबे यहोशापाते इस्राएलो रे राजे खे बोलेया, "आज यहोवे री इच्छा पता करी लो।" 6 तेबे इस्राएलो रे राजे नबिया खे जो कोई 400 मर्द थे कट्ठे करी की तिना ते पूछेया, "क्या आऊँ गिलाद इलाके रे रामोत शईरो साथे युद्ध करने खे अमला करुँ या रूकेया रा रऊँ?" तिने ज्वाब दित्तेया, "अमला कर, कऊँकि प्रभुए से राजे रे आथो दे करी देणा।" 7 पर यहोशापाते पूछेया, "क्या एती यहोवे रा ओर बी कोई नबी ए जेसते आसे पूछूँ?" 8 इस्राएलो रे राजे यहोशापातो ते बोलेया, "आ, यिम्ला रा पाऊ मीकायाह एक मर्द ओर ए जेसरे जरीये आसे यहोवे ते पूछी सकूँए। पर आऊँ तेसते नफरत करूँआ, कऊँकि से मेरे बारे दे पलाईया री नि, बल्कि नुकशाणो री ई भविष्यबाणी करोआ।" 9 यहोशापाते बोलेया, "राजा एड़ा नि बोलो।" तेबे इस्राएलो रे राजे एक परदानो खे बुलाई की बोलेया, "यिम्ला रे पाऊ मीकायाह खे फटाफट ली आओ।" 10 इस्राएलो रा राजा ओर यहूदा रा राजा यहोशापात, आपणे-आपणे राजेया रे टाल्ले पईनी की सामरिया रे बड़े द्वारो गे एक खुली जगा दे खल्याणो दे आपणे-आपणे सिंहासनो पाँदे बैठी रे थे ओर सारे भविष्यबक्ता तिना सामणे भविष्यबाणी करने लगी रे थे। 11 तेबे कनाना रे पाऊ सिदकिय्याहे लोए रे सींग बणाई की बोलेया, "यहोवा ईंयाँ बोलोआ कि इना साथे तां अरामी सिपाई काई-काई की नाश करी देणे।" 12 ओर सारे नबीए एतेरे बारे दे भविष्यबाणी करी की बोलेया, "गिलाद इलाके रे रामोत शईरो पाँदे अमला कर ओर तूँ सफल ऊणा; कऊँकि यहोवे से राजे रे आथो दे करी देणा।" 13 ओर जो दूत मीकायाह खे बुलाणे खे गया था तिने बोलेया, "सुण, सारे भविष्यबक्ता एक ई मुंए ते राजे रे बारे दे शुभ वचन बोलोए तो तेरी गल्ल तिना जेड़ी ओ, तैं बी शुभ वचन बोलणे।" 14 मीकायाहे बोलेया, "यहोवे री जिन्दगिया री कसम जो कुछ यहोवा माखे बोलो, मां से ई बोलणा।" 15 जेबे से राजे गे आया तेबे राजे तेसते पूछेया, "ओ मीकायाह! क्या आसे गिलाद इलाके रे रामोत शईरो ते युद्ध करने खे जाऊँ या ना जाऊँ?" तिने तेसखे ज्वाब दित्तेया, "आ, अमला कर ओर तूँ सफल ओ ओर यहोवा तेसखे राजे रे आथो दे करी देयो।" 16 राजे तेसखे बोलेया, "माखे कितणी बार ताखे कसम खुल़ाई की समजयाणा पड़ना कि तूँ यहोवे खे याद करी की मांगे सच ई बोल।" 17 मीकायाहे बोलेया, "माखे सारा इस्राएल बिना गवाल़े री पेडा-बाकरिया जेड़ा पाह्ड़ो पाँदे तित्तर-बित्तर दिशेया ओर यहोवे रा ये वचन आया, तिना खे कोई चराणे वाल़ा नि ए; इजी री खातर सेओ आपणे-आपणे कअरे रामो दे वापस ऊई जाओ।"*22:17 मत्ती 9:36, मर. 6:34 18 तेबे इस्राएलो रे अहाब राजे यहोशापातो खे बोलेया, "क्या मैं ताखे बोलेया नि था कि तेस मेरे बारे दे पलाईया री नि, पर नुकशाणो री ई भविष्यबाणी करनी।" 19 मीकायाहे बोलेया, "इजी बजअ ते तूँ यहोवे रा ये वचन सुण माखे सिंहासनो पाँदे बैठेया रा यहोवा ओर तेसरे दाँणे-खूँजे खड़ी री तेसरी स्वर्गो री सारी सेना दिशी री।"*22:19 प्रका. 4:2, प्रका. 4:9,10, प्रका. 5:1,7,13 प्रका. 6:16, प्रका. 7:10, प्रका. 7:15, प्रका. 19:4, प्रका. 21:5 20 तेबे यहोवे पूछेया, "अहाब केस एड़ा बईकाणा कि से गिलाद इलाके रे रामोत शईरो पाँदे अमला करी की डोरूआ खे आओ?" तेबे किने कुछ ओर किने कुछ बोलेया। 21 अन्तो दे एक बुरी आत्मा नेड़े आई की यहोवे रे सामणे खड़ी ऊई ओर बोलणे लगी, "मां से बईकेरना" यहोवे पूछेया, "किंयाँ?" 22 तेसे बुरी आत्मे बोलेया, "मां जाई की तेसरे सारे भविष्यबक्ता दे समाई की तिना ते चूठ बुलाणा।" यहोवे बोलेया, "तेरा तेसखे बईकेरना सफल ऊणा, जाई की एड़ा ई कर।" 23 तो एबे सुण, यहोवे तेरे इना सारेया भविष्यबक्तेया रे मुंए दे एक चूठ बोलणे वाल़ी आत्मा बठयाल़ी राखी ओर यहोवे तेरा नुकशाण करने रा फैंसला करी ला दा ए। 24 तेबे कनानो रे पाऊ सिदकिय्याहे मीकायाह रे नेड़े जाई की तेसरी खाखा पाँदे थप्पड़ बाई की पूछेया, "यहोवे रा आत्मा माखे छाडी की तां साथे गल्ला करने खे केई गया?" 25 मीकायाहे बोलेया, "जेस दिने तूँ लूकणे खे एकी कमरे ते दूजे कमरे दे नठणा तेस दिने ताखे पता लगणा।" 26 तेबे इस्राएलो रे राजा अहाबे आपणे अधिकारिया बीचा ते एकी खे मीकायाह खे पकड़ने रा उक्म दित्तेया। तेबे इस्राएलो रे राजा अहाबे आपणे अधिकारिया खे बोलेया, "एसखे कैद करी लो ओर शईरो रे परदान आमोन ओर योआश राजकुमारो गे लई जा; 27 ओर तिना खे बोल कि राजा ईंयाँ बोलोआ कि एसखे जेला दे पाई देयो ओर जदुओ तक आऊँ सई-सलामत नि आऊँ, तदुओ तक एसखे दु:खो री रोटी-पाणी देया करो।"*22:27 इब्रा. 11:36 28 मीकायाहे बोलेया, "जे तूँ युद्धो ते सई-सलामत वापस आए तो जाणी लया कि यहोवे मेरे जरीये नि बोलेया।" तेबे मीकायाहे बोलेया, "ओ लोको, तुसे सारे के सारे बी सुणी लो।"

अहाबो री मौत

29 तेबे इस्राएलो रा राजा ओर यहूदा रा राजा यहोशापात दुँईं गिलाद इलाके रे रामोत शईरो पाँदे अमला करने खे गये। 30 तेबे इस्राएलो रे राजे यहोशापातो खे बोलेया, "मां तो पेष बदली की लड़ने खे जाणा, पर तैं आपणे ई टाल्ले पईनी की राखणे।" तेबे इस्राएलो रा राजा पेष बदली की लड़ने खे गया। 31 अरामो रे राजे आपणे बत्ती रथा रे परदाना खे आज्ञा देई राखी थी, "ना तो छोटेया साथे ना बड़ेया साथे लड़ो बस इस्राएलो रे राजे साथे लड़ाई करो।" 32 तो जेबे रथो रे परदाने यहोशापात देखेया तेबे बोलेया, "पक्का इस्राएलो रा राजा सेईए।" ओर सेयो तेस साथे युद्ध करने खे मुड़े तेबे यहोशापात चींगणे लगेया, 33 ये देखी की कि से इस्राएलो रा राजा नि ए, रथो रे परदान तेसरा पीछा छाडी की वापस ऊईगे। 34 पर एकी सिपाईए आपणा तीर चलाया। से नि जाणो था कि तिने तीर केसरिया तरफा खे चलाया। से तीर इस्राएलो रे राजे री झिलम ओर थालले टाल्लेया रे बीचे जाई की कूसी गा। राजे आपणे सारथिये खे बोलेया, "आऊँ काईल ऊईगा रा इजी री खातर रथो खे कुमाई की माखे सेना बीचा ते बारे काडी की लई चल।" 35 ओर तेस दिने युद्ध बढ़दा गया ओर राजा आपणे रथो दे ओरी रे साअरे अरामिया सामणे खड़ेया दा रया ओर साँजा खे मरी गा ओर तेसरे जख़्मो रा खून बह्यी की रथो रे पायदानो दे परी गा। 36 सूरज डूबदे ई सेना दे ये आका पड़िया, "लड़ाई खत्म ऊईगी ए, एबे सब आपणे शईर ओर आपणे देशो खे वापस ऊई जाओ।" 37 जेबे अहाब राजा मरी गा, तेबे से सामरिया दे पऊँचाया ओर से तेथी माट्टिया दे दबाईता। 38 तेबे यहोवे रे वचनो रे मुताबिक जेबे तेसरा रथ सामरिया रे खाबड़े दे तोया, तेबे कुत्तेया तेसरा खून चाटेया ओर वेश्या तेती नाह्ओ थिया। 39 अहाबो रे ओर सारे काम जो तिने कित्ते थे ओर आथिया रे दाँदा रा जो मईल तिने बणाया ओर जो-जो शईर तिने बसाए थे, ये सारे काम इस्राएली राजेया रे इतिआसो री कताबा दे लिखी राखे। 40 तेबे अहाब मरीगा ओर आपणे बुजुर्गा नेड़े दबाईता। तेसते बाद तेसरा पाऊ अहज्याह तेसरी जगा पाँदे राज करने लगेया।

यहूदा दे यहोशापातो रा राज्य

41 इस्राएलो रे राजा अहाबो रे राजो रे चौथे सालो दे आसा रा पाऊ यहोशापात यहूदा पाँदे राज करने लगेया। 42 जेबे यहोशापात राज करने लगेया, तेबे से पैंतीया साला रा था ओर पच्चीया साला तक यरूशलेम शईरो दे राज करदा रया। ओर तेसरी माया रा नाओं अजूबा था, जो शिल्ही री बेटी थी। 43 ओर तेसरी चाल सारी तरफा ते तेसरे बाओ आसा जेड़ी तर्मी थी, मतलब जो यहोवे री नजरा दे ठीक ए, से सेई करदा रया ओर तिना कामा खे करने ते बिल्कुल नि मुड़ेया। तेबे बी ऊच्ची जगा नि टाल़िया, प्रजा रे लोक तेस बखते बी ऊच्ची जगा दे बलि करेया करो थे ओर तूप बी बाल़ेया करो थे। 44 यहोशापाते इस्राएलो रे राजे साथे मेल कित्तेया। 45 यहोशापातो रे काम ओर जो वीरता तिने दखाई ओर तिने जो-जो लड़ाईया कित्तिया, ये सारे काम यहूदा रे राजेया रे इतिआसो री कताबा दे लिखी राखे। 46 पुरूषगामिया बीचा ते जो तेसरे बाओ आसा रे दिना दे रई गे थे, तिने सेयो देशो ते नाश करी ते। 47 तेस बखते एदोम देशो दे आपणा कोई राजा नि था। यहूदा रे राजे तेती आपणा एक अधिकारी राजकाजो रा काम करने खे राखेया था। 48 तेबे राजा यहोशापाते तर्शीशो दे जाह्ज सूईना ल्याऊणे खे ओपीर प्रदेशो दे जाणे खे बणवाई ते, पर सेयो एस्योनगेबेरो दे जाईकी टूटी गे, इजी बजअ ते तेथी नि जाई सके। 49 तेबे अहाबो रे पाऊ अहज्याहे यहोशापातो खे बोलेया, "मेरे जाह्जिया खे आपणे जाह्जिया साथे, जाह्जो दे जाणे दे;" पर यहोशापाते ना करी ती। 50 तेबे यहोशापात मरीगा ओर से तेसरे बुजुर्गा साथे तेसरे मूलमर्द दाऊदो रे शईरो दे दबाईता। ओर तेसरा पाऊ यहोराम तेसरी जगा पाँदे राज करने लगेया।

इस्राएलो दे अहज्याह रा राज्य

51 यहूदा रे राजा यहोशापातो रे सतारूए सालो दे अहाबो रा पाऊ अहज्याह सामरिया दे इस्राएलो पाँदे राज करने लगेया ओर दो साल तक इस्राएलो पाँदे राज करदा रया। 52 ओर तिने से कित्तेया, जो यहोवे री नजरा दे बुरा था ओर तेसरी चाल तेसरे माये-बाओ ओर नबातो रे पाऊ यारोबामो जेड़ी थी जिने इस्राएलो ते मूर्तिया री पूजा कराई की पाप करवाया था। 53 जिंयाँ तेसरा बाओ बाल देवतेया री आराधना ओर माथा टेकणे ते इस्राएलो रे परमेशर यहोवे खे रोष करांदा रया तेड़ा ई अहज्याह बी करो था।