1 राजा 12

इस्राएल राज्य रे दो इस्से ऊई जाणा

1 रहूबियाम शकेमो खे गया, कऊँकि सारे इस्राएली तेसखे राजा बनाणे खे तेथी गये थे। 2 जेबे नबातो रे पाऊ यारोबामे ये सुणेया, जो यबुओ तक मिस्रो दे रओ था, कऊँकि यारोबाम राजा सुलैमानो रे डरो रे मारे तेती नठी की मिस्रो दे चली गा था। 3 तो तिने लोके से आपू गे बुलाया, तेबे यारोबाम ओर इस्राएलो री सारी सभा रहूबियामो गे जाई की ईंयाँ बोलणे लगी, 4 "तेरे बाओए तो आसा पाँदे पारी बोज राखी राखेया था, तो तूँ आपणे बाओ री कठण सेवा रे कामो खे ओर तेस पारी बोजो खे जो तिने आसा पाँदे राखी राखेया, कुछ अल़्का कर; तेबे आसा तेरे वशो दे ऊई जाणा।"

5 तिने इस्राएली लोका खे बोलेया, "यबु तो तुसे जाओ ओर तीन दिन बाद मांगे फेर आऊणा।" तेबे सेयो सब चलीगे। 6 तेबे राजा रहूबियामे तिना स्याणेया ते जो तेसरे बाओ सुलैमानो री पूरी जिन्दगी तेस सामणे आजीर रओ थे सला लई, "एसा प्रजा खे केड़ा ज्वाब देणा ठीक ए, इदे तुसे क्या बोलोए?"

7 तिने तेसखे ये ज्वाब दित्तेया, "जे तूँ यबु प्रजा रे लोका रा दास बणी की ओर तिना रे वशो दे ऊई की तिना साथे मीठिया गल्ला बोले, तो तिना सदा तेरे वशो दे ऊई की तेरी सेवा करनी।" 8 रहूबियामे से सला छाडी ती, जो स्याणेया तेसखे दित्ती थी ओर तिना जवाना ते सला लई जो तेस साथे बड़े ऊए थे ओर तेस सामणे आजीर रया करो थे। 9 तिना ते तिने पूछेया, "आऊँ प्रजा रे लोका खे केड़ा ज्वाब देऊँ? तिदे तुसे क्या सला देओए? तिने तो माखे बोली राखेया कि जो बोज तेरे बाओए आसा पाँदे राखी राखेया, तेतेखे तूँ अल़्का कर।" 10 तेसरे जवान दोस्ते तेसखे ये ज्वाब दित्तेया, "जिने लोके ताखे बोली राखेया कि तेरे बाओए आसा रिया कांदा पाँदे पारी बोज पाई राखेया था। तूँ तिजी खे आसा रिया तँईं अल़्का कर, तैं तिना खे ईंयाँ बोलणा, जे मेरा बाओ शेर था तो आऊँ सवा शेर ए। 11 मेरे बाओए जो तुसा पाँदे पारी बोज राखेया था, से मां ओर बी पारी करना; मेरा बाओ तो तुसा खे कोड़ेया साथे सजा देयो था, पर मां कांडे वाल़े कोड़ेया साथे सजा देणी।" 12 तीजे दिने जेड़ा राजे ठराया था कि तीजे दिने फेर मांगे आऊणा, तिंयाँ ई यारोबाम ओर सारी प्रजा रे लोक रहूबियामो गे कट्ठे ऊए। 13 तेबे राजे प्रजा साथे कड़क गल्ला कित्तिया, 14 ओर स्याणेया री दित्ती री सला छाडी की, जवाना री दित्ती री सला रे मुताबिक तिना खे बोलेया, "मेरे बाओए तो तुसा रा बोज पारी करी ता, पर मां से ओर बी पारी करी देणा, मेरे बाओए तो कोड़ेया साथे तुसा खे सजा दित्ती, पर मां तुसा खे कांडे वाल़े कोड़ेया साथे सजा देणी।"

15 इजी बजा ते राजे प्रजा री गल्ल नि मानी, इजी री बजअ ये कि जो वचन यहोवे शीलो दे रणे वाल़े नबी अहिय्याह रे जरीये नबातो रे पाऊ यारोबामो खे बोलेया था, तेतेखे पूरा करने खे तिने एड़ा ठराया था। 16 जेबे सारे इस्राएलिये देखेया कि राजा म्हारी नि मानदा, तेबे तिने बोलेया, "दाऊदो रे राज्य दे म्हारा कोई इस्सा नि ए। म्हारा तो यिशै रे पाऊए दे कोई इस्सा नि ए! ओ इस्राएलियो आपणे-आपणे डेरे खे चली जाओ, एबे ओ दाऊद, आपणे ई कराने री फिकर कर।" 17 पर रहूबियाम फेर बी तिना इस्राएली लोका पाँदे राज करदा रया, जो यहूदा रे शईरा दे रओ थे। 18 तेबे राजे रहूबियामे अदोरामो खे जो सारे काम करने वाल़ेया पाँदे अधिकारी था पेजीता ओर सारे इस्राएलिये तेसखे पात्थर बाये ओर से मरी गा, तेबे रहूबियाम फटाफट आपणे रथो रे चढ़ी की यरूशलेम शईरो खे नठी गा। 19 इजी बजअ ते इस्राएली लोक दाऊदो रे कराने ते फिरी गे ओर आजो तक तेसरे खलाफ ए। 20 ये सुणी की कि यारोबाम वापस आई गा रा, सारे इस्राएलिये से मण्डल़िया दे बुलाया ओर से पूरे इस्राएली लोका पाँदे राजा नियुक्त कित्तेया ओर यहूदा रे गोत्रो खे छाडी की दाऊदो रे कराने ते कोई मिलेया दा नि रया।

शमायाह री भविष्यबाणी

21 जेबे रहूबियाम यरूशलेम शईरो दे आया, तेबे तिने यहूदा रे पूरे कराने खे ओर बिन्यामीनो रे गोत्रो खे, जो मिलाई की 180,000 अच्छे योद्धा थे, कट्ठे कित्ते, ताकि सेयो इस्राएलो रे कराने साथे लड़ी की सुलैमानो रे पाऊ रहूबियामो रे वशो दे फेर राज्य करो। 22 तेबे परमेशरो रा ये वचन परमेशरो रे माणूं शमायाह गे पऊँचेया, यहूदा रे राजा सुलैमानो रे पाऊ रहूबियामो ते, 23 ओर यहूदा रे राजा ओर बिन्यामीनो रे सारे कराने ते ओर सारे लोका खे बोल कि यहोवा ईंयाँ बोलोआ, 24 "कि आपणे पाई इस्राएलो पाँदे अमला करी की युद्ध नि करो; तुसे आपणे-आपणे कअरो खे वापस ऊई जाओ, कऊँकि ये गल्ल मेरी ई तरफा ते ऊई री।" यहोवे रा ये वचन मानी की सेयो तेसरे मुताबिक वापस जाणे खे आपणी-आपणी बाटा दे गये।

यारोबामो रा मूर्तिपूजा कराणा

25 तेबे यारोबाम एप्रैमो रे पाह्ड़ी इलाके रे शकेम शईरो खे मजबूत करी की तिदे रणे लगेया, तेबे तेथा ते निकल़ी की पनूएलो खे बी मजबूत कित्तेया। 26 तेबे यारोबाम सोचणे लगेया, "एबे राज्य दाऊदो रे कराने रा ऊई जाणा। 27 जे प्रजा रे लोक यरूशलेम शईरो दे यहोवे खे बलिदान करने खे जाओ, तो तिना रा मन आपणे स्वामी यहूदा रे राजे रिया तरफा खे फिरी जाणा ओर तिना आऊँ काई देणा ओर सेयो यहूदा रे राजा रहूबियामो रे ऊई जाणे।" 28 तेबे यारोबाम राजे सला लई की सूईने रिया दो बाच्छूए री मूर्तिया बणाईया ओर लोका खे बोलेया, "यरूशलेम शईरो खे जाणा तुसा रे वशो ते बारे ए, इजी री खातर ओ इस्राएल आपणे देवतेया खे देखो, जो तुसा खे मिस्र देशो ते निकयाल़ी की ल्याये।" 29 तेबे तिने एक बाच्छू बेतेल ओर दूजा दानो रे स्थापित कित्तेया। 30 पर ये बऊत बड़ा पाप था, कऊँकि इस्राएलो रे लोके बेतेल ओर दान शईरा री यात्रा बाच्छूआ री पूजा करने रिया तँईं कित्ती। 31 तेबे तिने ऊच्ची जगा दे मन्दर बणाए ओर सारे प्रकारा रे लोका बीचे जो लेविया रे कुलो रे नि थे, पुरोईत ठराए। 32 तेबे यारोबामे आठुए मीन्ने रे पन्द्रुए दिने यहूदा दे त्योआरो जेड़ा, एक त्योआर ठराईता ओर बेदिया पाँदे बलि चढ़ाणे लगेया; ईंयाँ तिने बेतेलो दे आपणे बणाए रे बाच्छूए री मूर्तिया खे बेदिया पाँदे बलि कित्तेया ओर आपणे बणायी री ऊच्ची जगा रे पुरोईतो खे बेतेलो दे ठराईते। 33 जेते मीन्ने रे बारे दे तिने सोचेया था, मतलब आठुए मीन्ने रे पन्द्रुए दिने से बेतेलो दे आपणी बणाई री बेदिया पाँदे चढ़ीगा। तिने इस्राएली लोका खे एक त्योआर ठराईता ओर तूप बाल़ने खे बेदिया गे चढ़ीगा।