1 राजा 21

नाबोतो री अत्या ओर परमेशरो रा गुस्सा

1 नाबोत नाओं रा एक माणूं था जो यिज्रेल शईरो रा रणे वाल़ा था। तेसगे एक अंगूरा रा बगीचा था जो सामरिया रे राजा अहाबो रे मईलो रे नेड़े यिज्रेल शईरो दे था। 2 इना गल्ला ते बाद अहाबे नाबोतो खे बोलेया, "तेरे अंगूरा रा बगीचा मेरे कअरो रे नेड़े ए, तूँ तेस माखे देई दे, ताकि आऊँ तिदे साग-पातो रा बगीचा लगाऊँ ओर मां तिजी रे बदले ताखे एक अच्छा बगीचा देणा, नई तो जे तेरी इच्छा ओ तो मां ताखे तिजी री कीमत देई देणी।"

3 नाबोते अहाबो खे बोलेया, "यहोवा नि करो कि आऊँ आपणे बुजुर्गा रा इस्सा ताखे देऊँ।" 4 यिज्रेली नाबोतो रे एसा गल्ला रिया बजअ ते कि मां ताखे आपणे बुजुर्गा रा निज इस्सा नि देणा, अहाब उदास ओर दु:खी ऊई की आपणे कअरो खे चली गा ओर टखणो पाँदे लेटीगा ओर मूँ फेरी ला ओर कोई रोटी नि खाई। 5 तेबे तेसरी लाड़ी ईजेबेले तेसगे आई की पूछेया, "तेरा मन एड़ा उदास कऊँ ए कि तूँ कुछ खाया नि करदा?" 6 तिने बोलेया, "बजअ ये कि मैं यिज्रेली नाबोतो खे बोलेया कि पैसा लई की माखे आपणा अंगूरा रा बगीचा देई दे, नई तो अगर तूँ चाए तो आऊँ ताखे तिजी रे बदले दूजा अंगूरा रा बगीचा देई देऊँगा ओर तिने बोलेया कि मां ताखे आपणा अंगूरा रा बगीचा नि देणा।" 7 तेबे तेसरी लाड़िए तेसखे बोलेया, "क्या तूँ इस्राएलो पाँदे राज करेया कि नई? उठी की रोटी खा ओर तेरा मन खुश ओ; यिज्रेली नाबोतो रा अंगूरा रा बगीचा मां ताखे दलाई देणा।"

8 तेबे तेसे अहाबो रे नाओं री चिट्ठी लिखी की तेसरी गूठिया री छाप लगाई की तिना बुजुर्गा ओर अमीरा गे पेजी ती जो तेस शईरो दे नाबोतो रे पड़ोसो दे रओ थे। 9 तेते पर्चिया दे तेसे ईंयाँ लिखेया, "बअरतो रा प्रचार करो ओर नाबोत तेसरे लोका सामणे ऊच्ची जगा दे बठयाल़ना। 10 तेबे दो नीच माणूं तेस सामणे बठयाल़ने जो चूठी गवाई देई की तेसखे बोलो कि तैं परमेशर ओर राजा दुँईं री बेज्जती करी राखी। तेबे तुसे से बारे निणा ओर तेस पाँदे पात्थर बाणे कि से मरी जाओ।" 11 ईजेबेला री पर्चिया री आज्ञा रे मुताबिक शईरो दे रणे वाल़े बुजुर्गे ओर अमीरे बअरतो रा प्रचार कित्तेया, 12 ओर नाबोत लोका सामणे ऊच्ची जगा दे बठयाल़ेया। 13 तेबे दो नीच माणूं आई की तेस सामणे बैठीगे ओर तिने नीच माणूंए लोका सामणे नाबोतो रे खलाफ ये चूठी गवाई दित्ती कि इने परमेशर ओर राजा दुँईं री निन्दा करी राखी। तेबे तिने से शईरो ते बारे निया ओर तेसखे पात्थर बाए ओर से मरी गा। 14 तेबे तिने ईजेबेला गे ये सन्देशा पेजेया कि नाबोत पत्थराव करी की काई ता रा। 15 ये सुणदे ई कि नाबोत पत्थराव करी की काई ता रा, ईजेबेले अहाब राजे खे बोलेया, "उठी की यिज्रेली नाबोतो रा अंगूरा रा बगीचा जेतेखे तिने पैसा लई की बी ताखे देणे ते ना करी ती थी आपणे कब्जे दे लई लो, कऊँकि नाबोत जिऊँदा नि ए।"

16 यिज्रेली नाबोतो री मौता रा सन्देश मिलदे ई अहाब तेसरा अंगूरा रा बगीचा आपणे अक्को रे लणे खे जाणे खे उठी की खड़ा ऊआ। 17 तेबे यहोवे रा ये वचन तिशबी एलिय्याह नबीए गे पऊँचेया, 18 "चल, सामरिया रे रणे वाल़े इस्राएलो रे राजा अहाबो साथे मिलणे खे जा; से तो नाबोतो रे अंगूरा रे बगीचे रे तेतेखे आपणे अक्को रे लणे खे से तेती जाई रा। 19 ओर तेसखे ईंयाँ बोलणा कि यहोवा ईंयाँ बोलोआ कि क्या तैं से नि काया ओर अधिकारी बी बणी की बैठी गा? तेबे तैं तेसखे ये बी बोलणा कि यहोवा ईंयाँ बी बोलोआ कि जेते जगा रे कुत्तेया नाबोतो रा खून चाटेया, तेते जगा रे कुत्तेया तेरा बी खून चाटणा।" 20 एलिय्याह खे देखी की अहाबे बोलेया, "ओ मेरे दुश्मण! क्या तैं मेरा पता लगाई राखेया?" तिने बोलेया, "आ, लगाई तो राखेया ओर इजी री बजअ ये कि जो यहोवे री नजरा रे बुरा ए, तेतेखे करने खे तैं आपू खे बेचीता रा।" 21 मां तां पाँदे एड़ी मुसीबत पाणी कि तूँ पूरी तरअ ते मिटाई देणा ओर अहाबो रे कअरो रा एक-एक पाऊ ओर क्या गुलाम, क्या आजाद, इस्राएलो दे हर रणे वाल़ा बी नाश करी देणा। 22 ओर मां तेरा कराना नबातो रे पाऊ यारोबाम ओर अहिय्याह रे पाऊ बाशा रा जा करी देणा; इजी खे कऊँकि तैं माखे रोष चढ़ाई राखेया ओर इस्राएलो ते पाप करवाई राखेया। 23 ओर यहोवा ईंयाँ बी बोलोआ, "तेरी लाड़ी ईजेबेला री लाश यिज्रेल शईरो रे कुत्तेया खाणी।" 24 अहाबो रे शईरो रा जो कोई मरी जाओगा, से कुत्तेया खाणा ओर जो कोई मैदानो दे मरना से सर्गो रे पंछिया खाई देणा। 25 सच्ची अहाबो जेड़ा ओर कोई नि था जिने आपणी लाड़ी ईजेबेला रे सकेल़ने पाँदे सेयो काम करने खे जो यहोवे री नजरा दे बुरे ए, आपू खे बेचीता था। 26 से तो तिना एमोरिया जेड़ा ए जो यहोवे इस्राएली लोका रे सामणे देशो ते काडे थे कऊँकि सेयो बऊत ई बुरे काम करो थे, मतलब मूर्तिया री आराधना करो थे। अहाब बी तेड़े ई काम करने लगेया था जो यहोवे रे खलाफ था। 27 एलिय्याह रे इना वचना खे सुणी की अहाबे आपणे टाल्ले फाड़े ओर आपणे शरीरो दे टाट लपेटी की बअरत करने लगेया ओर टाट ई पईनी की रणे लगेया ओर नांगे पैरे चलणे लगेया। 28 तेबे यहोवे रा ये वचन तिशबी एलिय्याह गे पऊँचेया, 29 क्या तैं देखेया कि अहाब मां सामणे नम्र बणी गा रा? इजी बजअ ते कि से मां सामणे नम्र बणी गा रा, मां से मुसीबत तेसरे जिऊँदे जियूए तेस पाँदे नि पाणी, पर तेसरे पाऊआ रे दिना दे मां तेसरे टब्बरो पाँदे मुसीबत पेजणी।