1 एलिय्याह नाओं रा एक नबी था, जो गिलाद इलाके रे तिशबी शईरो दे रणे वाल़ा था तिने इस्राएलो रे राजा अहाबो खे बोलेया, "इस्राएलो रा यहोवा परमेशर जेस सामणे आऊँ आजीर रऊँआ, तेसरी जिन्दगिया री कसम इना साला दे मेरे बिना बोले, ना तो बर्खा ऊणी ओर ना ई पाल़ा पड़ना।"*

2 तेबे यहोवे रा ये वचन तेसगे पऊँचेया, 3 "एथा ते चली की पूर्वो रिया तरफा खे जा ओर करीत नाओं रे नाल़े रे जो यरदनो सामणे ए लूकी जा। 4 तेस ई नाल़े रा पाणी पिया करना ओर मैं कावा खे आज्ञा देई राखी कि सेयो ताखे तेती खुल़ाओ।"

5 यहोवे रा ये वचन मानी की से यरदनो ते पूर्वो रे करीत नाओं रे नाल़े दे जाई की लूकेया रा रया। 6 ओर प्यागा-साँजा काओ तेसगे रोटी ओर मास ल्याया करो थे ओर से नाल़े रा पाणी पिया करो था। 7 कुछ दिना ते बाद तेते देशो रे बर्खा ना ऊणे रिया बजअ ते से नाल़ा सुकी गा।

8 तेबे यहोवे रा ये वचन एलिय्याह गे पऊँचेया, 9 "चली की सिदोनो रे सारफत शईरो रे जाई की तेथी रओ, सुण मैं तेथो री एक बिदुआ खे ताखे खुलाणे री आज्ञा देई राखी।"* 10 तेबे से तेथा ते चली की सारफतो खे गया; शईरो रे बड़े द्वारो गे पऊँची की तिने क्या देखेया कि एक बिदुआ लकड़ू चुगणे लगी री, तेसा खे बुलाई की तिने बोलेया, "माखे केसी पांडे रे पीणे खे थोड़ा जा पाणी ली आओ।" 11 जेबे से ल्याऊणे खे जाणे लगी तेबे तिने आका पाई की बोलेया, "आपणे आथो रे एक टुकड़ा रोटिया रा बी लंदी आओ।" 12 तेसे बोलेया, "तेरे परमेशर यहोवे री जिन्दगिया री कसम, मांगे एक बी रोटी नि ए बस कड़े रे एक मुट्ठी पर आटा ओर कुप्पिया रे थोड़ा जा तेल ए ओर आऊँ एक-दो लकड़ू चूगी की लई चली री कि आपू खे ओर आपणे पाऊए खे तिजी खे पकाऊँ ओर आसे तिजी खे खाऊँ, तेबे मरी जाऊँ।" 13 एलिय्याहे तेसा खे बोलेया, "डर नि, जाई की आपणी गल्ला रे मुताबिक कर, पर पईले माखे एक छोटी जी रोटी बणाई की ली आओ, तेबे इजी ते बाद आपू खे ओर आपणे पाऊए खे बणाया। 14 कऊँकि इस्राएलो रा यहोवा परमेशर ईंयाँ बोलोआ कि जदुओ तक यहोवा जमीना दे बर्खा नि करोगा, तदुओ तक ना तो तेस कड़े रा आटा खत्म ऊणा ओर ना तेसा कुप्पिया रा तेल कम ऊणा।" 15 तेबे से चली गी ओर एलिय्याहो रे कईणे रे मुताबिक कित्तेया, तदुओ ते से ओर जवाणस ओर तेसा रा कराना कई दिना तक खांदे रये। 16 यहोवे रे तेस वचनो रे मुताबिक जो तिने एलिय्याह रे जरीये बोलेया था, ना तो तेस कड़े रा आटा खत्म ऊआ ओर ना ई तेसा कुप्पिया रा तेल कम ऊआ।

17 कुछ दिना ते बाद तेसा जवाणसा रा पाऊ जो कअरो री मालकण थी, बमार ऊआ ओर तेसरी बमारी इतणी बढ़ी गी कि तेसरा साआ लणा बन्द ऊईगा। 18 तेबे से एलिय्याह खे बोलणे लगी, "ओ परमेशरो रे माणूं! माखे तांते क्या काम ए? क्या तूँ इजी खे मेरे कअरे आया कि मेरे पाऊए री मौता री बजअ बणे ओर मेरे पाप याद दलाए?" 19 तिने जवाणसा खे बोलेया, "आपणा पाऊ मांगे दे;" तेबे से तेसखे तेसा री गोदा ते लई की तेस पाँदले कमरे दे गया जेती से आपू रओ था ओर आपणे माँजे पाँदे लटयाल़ी ता। 20 तेबे तिने यहोवे खे आका पाई की बोलेया, "ओ मेरे यहोवा परमेशर! क्या तूँ एसा बिदुआ रा पाऊ कायी की जेसा रे कअरे आऊँ रूकी रा, एसा पाँदे बी मुसीबत ली आई रा?" 21 तेबे से पाऊए पाँदे तीन बार लेटेया ओर यहोवे खे आका पाई-पाई की बोलेया, "ओ मेरे यहोवा परमेशर! एस बाल़को रा प्राण एसदे फेर पाई दे।" 22 एलिय्याह नबीए री ये गल्ल यहोवे सुणी ली ओर बाल़को रा प्राण तेसदे फेर आई गा ओर से जिऊँदा ऊईगा। 23 तेबे एलिय्याह बाल़को खे पाँदले कमरे ते फेर थाले लईगा ओर एलिय्याहे ये बोली की तेसरी माया रे आथो दे सम्बाल़ी ता, "देख तेरा पाऊ जिऊँदा ए।"* 24 जवाणसे एलिय्याह खे बोलेया, "एबे माखे निश्चा ऊईगा कि तूँ परमेशरो रा माणूं ए ओर यहोवे रा जो वचन तेरे मुंए ते निकल़ोआ, से सच्च ओआ।"