1 यहोवे रा रोष इस्राएली लोका पाँदे फेर पड़केया ओर तिने दाऊदो खे तिना रा नुकशाण करने खे ये बोली की सकेल़ेया, "इस्राएल ओर यहूदा रे लोका री गिणती लओ।" 2 इजी री खातर राजे योआब सेनापतिये खे जो तेसगे था बोलेया, "तूँ उतर दिशा दे दानो रे इलाके ते लई की दक्खणा दे बेर्शेबा शईरो तक रणे वाल़े सारे इस्राएली गोत्रा बीचे ओरे-पोरे कूम ओर तुसे लोक प्रजा रे लोका री गिणती करो, ताकि आऊँ जाणी लऊँ कि प्रजा री कितणी गिणती ए।" 3 योआबे राजे खे बोलेया, "प्रजा रे लोक कितणे बी कऊँ ना ओ, तेरा यहोवा परमेशर तिना खे सौ गुणा बढ़ाई देयो ओर मेरा प्रभु राजा इजी खे आपणी आखी साथे बी देखी सको; ओ मेरे प्रभु, ओ राजा, तूँ एड़ी गल्ल कऊँ चाएया?" 4 तेबे बी राजे री आज्ञा योआब ओर सेनापतिया पाँदे हावी ऊई। तेबे योआब ओर सेनापति राजे सामणे ते इस्राएली प्रजा री गिणती करने खे चली गे। 5 तिने यरदन नदिया ते पार जाई की अरोएर शईरो री दाँणी तरफा खे डेरे खड़े कित्ते, जो गाद नाल़े बीचे ओर याजेर शईरो रिया तरफा खे ए। 6 तेबे सेयो गिलाद जगा दे ओर तहतीम्होदशी नाओं रे देशो दे गये, तेबे दान्यानो खे गये ओर चक्कर लगाई की सिदोनो दे पऊँचे; 7 तेबे सेयो सोर नाओं रे मजबूत गढ़, हिब्बी ओर कनानिया रे सारे शईरो दे गये ओर तिने यहूदा प्रदेशो री दक्खण दिशा रे बेर्शेबा शईरो तक इस्राएलिया बीचे जाई की आपणा दौरा पूरा कित्तेया।

8 ईंयाँ सारे देशो रे ओरे-पोरे कूमी-कूमी की सेयो नौ मीन्ने ओर बीइ दिन बीतणे ते बाद यरूशलेम शईरो खे आए। 9 तेबे योआबे प्रजा री गिणतिया रा जोड़ राजे गे सुणाया ओर तलवार चलाणे वाल़े योद्धा इस्राएलो रे तो आठ लाख ओर यहूदा रे पाँज लाख निकल़े। 10 प्रजा री गिणती करने ते बाद दाऊदो रा मन बेचैन ऊआ ओर दाऊदे यहोवे खे बोलेया, "ये काम जो मैं कित्तेया से महापाप ए। तो एबे ओ यहोवा, आपणे दासो रा पाप दूर कर; कऊँकि मांते बड़ी मूर्खता ऊई री।" 11 प्यागा जेबे दाऊद उठेया, तेबे यहोवे रा ये वचन गाद नाओं रे नबीए गे जो दाऊदो रा दर्शी था पऊँचेया, 12 "जाई की दाऊदो खे बोल कि यहोवा ईंयाँ बोलोआ कि आऊँ ताखे तीन मुसीबता दखाऊँआ; तिना बीचा ते एक चूणी लो, ताकि आऊँ तिजी खे तां पाँदे पाऊ।" 13 तेबे गादे दाऊदो गे जाई की इजी रा सन्देश दित्तेया ओर तेसते पूछेया, "क्या तेरे देशो रे सात साला रा अकाल़ पड़ो? या तीन मीन्ने तक तेरे दुश्मण तेरा पीछा करदे रओ ओर तूँ तिना ते नठदा रये? या तेरे देशो रे तीन दिन तक मरी फैली री रओ? एबे सोच-बिचार कर कि आऊँ आपणे पेजणे वाल़े खे क्या ज्वाब देऊँ?" 14 दाऊदे गादो खे बोलेया, "आऊँ बड़ी मुसीबता दे ए; आसे यहोवे रे आथो दे पड़ूँए, कऊँकि तेसरी दया बड़ी ए; पर माणूंआ रे आथो दे मां नि पड़ना।"

15 तेबे यहोवा इस्राएली लोका पाँदे प्यागा ते ठराए रे बखतो दे मरी फैलांदा रया ओर उतर दिशा दे दानो रे इलाके ते लई की दक्खणा दे बेर्शेबा शईरो तक रणे वाल़ी प्रजा बीचा ते 70,000 लोक मरी गे। 16 पर जेबे दूते यरूशलेम शईरो रा नाश करने खे तेस पाँदे आपणा आथ बढ़ाया, तेबे यहोवे तेसा मुसीबता खे पाई की दु:खी ऊआ ओर प्रजा रा नाश करने वाल़े दूतो खे बोलेया, "बस कर, एबे आपणा आथ नाश करने ते पीछे टाईलो।" तेबे यहोवे रा दूत तेस बखते अरौना नाओं रे एक यबूसिये रे खल्याणो गे था। 17 तो जेबे प्रजा रा नाश करने वाल़ा दूत दाऊदो खे दिशेया, तेबे तिने यहोवे खे बोलेया, "देख, पाप तो मैं ई करी राखेया ओर गल़ती बी मैं ई करी राखी; पर इने लोके जो पेडा जेड़े ए इन्ने क्या करी राखेया? तो तेरा आथ मां पाँदे ओर मेरे बाओ रे कराने रे खलाफ ओ।"

18 तेस ई दिने गादे दाऊदो गे आई की बोलेया, "जाई की अरौना यबूसिये रे खल्याणो दे यहोवे री एक बेदी बणा।" 19 तेबे दाऊद यहोवे री आज्ञा रे मुताबिक गादो रा गल्ल सुणी की तेती गया। 20 जेबे अरौने दाऊदो खे तेसरे काम करने वाल़ेया समेत आपू गे आऊँदे ऊए देखे, तेबे तिने निकल़ी की मुंए रे पारे जमीना दे पड़ी की राजे गे माथा टेकेया।

21 ओर अरौने बोलेया, "मेरा प्रभु राजा आपणे दासो गे कऊँ आई रा?" दाऊदे बोलेया, "तांते ये खल्याण मोले लणे आई रा, ताकि यहोवे री एक बेदी बणवाऊँ, ताकि ये महामारी प्रजा पाँदा ते दूर ऊई जाओ।" 22 अरौने दाऊदो खे बोलेया, "मेरा प्रभु राजा जो कुछ तेसखे ठीक लगो से लई की चढ़ाओ; देख, होमबलिया खे तो बल़द आए ओर बाडणे खे अथियार ओर बल़दा रे समानो आगी रा काम देणा।" 23 ये सब कुछ अरौने राजे खे देईता। तेबे अरौने राजे खे बोलेया, "तेरा यहोवा परमेशर तांते खुश ओ।" 24 राजे अरौना खे बोलेया, "एड़ा नि ए, मां यो सब चीजा तांते दाम देई की लणियां, मां आपणे परमेशर यहोवे खे मुफ्तो रिया होमबलिया नि चढ़ाणियां।" तो दाऊदे खल्याण ओर बल़द चाँदिए रे लगभग सात किलो सिक्के दे खरीदी ते। 25 ओर दाऊदे तेती यहोवे री एक बेदी बणवाई की होमबलि ओर मेलबलि चढ़ाए ओर यहोवे देशो रिया तँईं बिनती सुणी ली, तेबे से महामारी इस्राएल देशो पाँदा ते दूर ऊई गी।