1 इस्राएलो रे राजा शाऊलो रे मरने ते बाद, जेबे दाऊद अमालेकिया खे काई की वापस ऊआ ओर दाऊदो खे सिकलग शईरो दे रंदे ऊए दो दिन ऊईगे, 2 तेबे तीजे दिने एड़ा ऊआ कि शाऊलो रे डेरे ते एक माणूं फाड़े रे टाल़े ओर सिरो दे तूड़ पाई की आया। जेबे से दाऊदो गे पऊँचेया, तेबे तिने जमीना दे पड़ी की माथा टेकेया। 3 दाऊदे तेसते पूछेया, "तूँ केथा ते आई रा?" तिने तेसखे बोलेया, "आऊँ इस्राएली डेरे ते बची की आई रा।" 4 दाऊदे तेसते पूछेया, "युद्धो दे क्या ऊआ मांगे दश।" तिने बोलेया, "ये, कि लोक युद्धो रा मैदान छाडी की नठीगे ओर बऊत लोक मरी गे ओर शाऊल ओर तेसरा पाऊ योनातान बी मरीगा।" 5 दाऊदे तेस सन्देश देणे वाल़े जवानो ते पूछेया, "तूँ किंयाँ जाणेया कि शाऊल ओर तेसरा पाऊ योनातान मरी गे?" 6 सन्देश देणे वाल़े जवाने बोलेया, "संयोगो ते आऊँ गिलबो रे पाह्ड़ो पाँदे था; तो मैं क्या देखेया, कि राजा शाऊले आपणी तलवारा रे साअरे खड़ी रा था; तेबे मैं ये बी देखेया कि तेसरा पीछा करने खे रथ ओर सवार बऊत तेज दौड़ी की आऊणे लगी रे। 7 तिने पीछे फिरी की आऊँ देखेया ओर माखे आका पाईया।" मैं बोलेया, "क्या आज्ञा ए?" 8 तिने माखे बोलेया, "तूँ कुण ए?" मैं तेसखे बोलेया, "आऊँ तो अमालेकी ए।" 9 तिने माखे बोलेया, "आऊँ मरना चाऊँआ इजी री खातर माखे काईदे; कऊँकि मेरा सिर कूमणे लगी रा, पर प्राण नि निकल़दे।" 10 तेबे माखे ये पक्का पता लगी गा कि से रूड़ने ते बाद नि बची सकदा, मैं तेसगे खड़े ऊई की से काई ता ओर आऊँ तेसरे सिरो रा मुकुट ओर तेसरे आथो रा कड़ा लई की आपणे स्वामिए गे आई रा। 11 तेबे दाऊद बऊत दु:खी ऊआ ओर तिने आपणे टाल़े फाड़े ओर जितणे मर्द तेस साथे थे सारेया तेड़ा ई कित्तेया; ये दखाणे खे कि सेयो बी बऊत दू:खी थे।

12 तेबे सेयो शाऊल, ओर तेसरे पाऊ योनातान, ओर यहोवे री प्रजा ओर इस्राएलो रे कराने रिया तँईं दु:खी ऊई की रोणे लगे ओर साँजा तक कुछ नि खाया, इजी बजअ ते कि सेयो युद्धो दे तलवारी साथे काई राखे थे। 13 तेबे दाऊदे तेस सन्देश देणे वाल़े जवानो ते पूछेया, "तूँ केथो राए?" तिने बोलेया, "आऊँ तो परदेशिये रा पाऊ मतलब अमालेकी ए।" 14 दाऊदे तेसखे बोलेया, "तूँ यहोवे रे चूणे दे माणूंए रा नाश करने खे आथ बढ़ाणे ते कऊँ नि डरेया?"

15 तेबे दाऊदे आपणे एकी जवानो खे बुलाई की बोलेया, "नेड़े जाई की तेसखे काईदे।" तेबे तिने तलवार लई की एड़ी बाई की से मरी गा। 16 तेबे दाऊदे तिना सबी लोका रे सामणे बोलेया, "ये माणूं आपू ई आपणियां मौता रा जिम्मेदार ए, कऊँकि तिने ये बोली की कि यहोवे रा अभिषिक्त माणूं मैं ई काई राखेया, आपणे मुंए ते आपणे ई खलाफ गवाई देई राखी।"

17 तेबे दाऊदे शाऊल ओर तेसरे पाऊ योनातानो रे बारे दे ये रोणे रा गीत बणाया,

18 ओर यहूदिया खे ये धनुष नाओं रे गीतो खे सिखाणे री आज्ञा दित्ती; ये याशार नाओं री कताबा दे लिखी राखेया: से ये ए,

19 "ओ इस्राएली लोको, तुसा रे परदान एसा ऊच्ची जगा दे काईते रे। हाय, शूरवीर केड़े रूड़ी की पड़ी रे!

20 गत शईरो दे ये नि बताओ ओर ना अश्कलोन शईरो रिया सड़का दे प्रचार करो; एड़ा नि ओ कि पलिश्ती जवाणसा खुश ओ, एड़ा नि ओ कि बिना खतना कित्ते रे लोका रिया बेटिया कमण्ड करने लगो।

21 ओ गिलबो रे पाह्ड़, तां पाँदे ना तो पाल़ा पड़ो, ओर ना बर्खा ओ ओर ना ई पेंटा जोगे उपजाणे वाल़े डोरू ओ! कऊँकि तेती शूरवीरा रिया ढाला अशुद्ध ऊईगिया। ओर शाऊलो री ढाल बिना तेल लगाई री रईगी।"

22 थके रे माणूंआ रा खून बाह्णे ते ओर शूरवीरा री चर्बी खाणे ते, योनातानो रा तीरक-बाण वापस नि जाओ था ओर ना ई शाऊलो री तलवार खाली आओ थी।

23 शाऊल ओर योनातान जिऊँदे जिऊए तो लोका ते प्यार करो थे ओर मनो खे अच्छे लगणे वाल़े थे ओर आपणी मौता तक लग नि ऊए; सेयो उकाबो ते बी तेज चलणे वाल़े थे ओर शेरो ते बी जादा तागतबर थे।

24 ओ इस्राएली जवाणसो, शाऊलो रिया तँईं रोओ, से तो तुसा खे लाल टाल़े पन्याई की सुख देयो था ओर तुसा रे टाल़ेया पाँदे सूईने रे गईणे पन्याओ था।

25 हाय, लड़ाईया रिया जगा दे शूरवीर केड़े काम आये! ओ योनातान, तूँ उची जगा दे लड़दे ऊए मरीगा,

26 ओ मेरे पाई योनातान, आऊँ तेरिया बजअ ते दु:खी ए; तूँ माखे बऊत प्यारा लगो था; तेरा प्यार मां पाँदे अद्भुत था, बल्कि बऊत जवाणसा रे प्यारो ते बी जादा था।

27 हाय, शूरवीर किंयाँ रूड़ी गे ओर लड़ाईया रे सारे अथियार केड़े नाश ऊईगे रे!