1 कुछ बखतो ते बाद दाऊदे आपणी सेना लई की पलिश्ती सेना अराई। तिने पलिश्तिया री राजधानिया पाँदे आपणा कब्जा करी ला।

2 तेबे तिने मोआबी सेना बी अराई ती। तिने मोआबी कैदी तीऊँ पाल़िया दे जमीना पाँदे लेटणे खे मजबूर कित्ते। तिने सेयो सब जो दूई पाल़िया दे थे रस्सी लगाई की नापे ओर काईते। तिने सिर्फ तीजी पाल़िया रे लोक जिऊँदे रणे दित्ते। तेबे मोआबी लोक दाऊदो रे वशो दे ऊई की पेंट ल्याऊणे लगे।

3 जेबे सोबा प्रदेशो रे राजा रहोबो रा पाऊ हदादेजेर फरातो रे नेड़े आपणा राज्य फेर जिंयाँ का तिंयाँ करने जाणे लगी रा था, तेबे दाऊदे से जीती ला। 4 ओर दाऊदे तेसते 1,700 सवार ओर 20,000 प्यादे छुड़ाई कि लई ले ओर सारे रथ वाल़े कोड़ेया री खुटिया री नस कटवाई, पर रथा वाल़े 100 कोड़े बचाईते।

5 जेबे दमिश्क शईरो ते अरामी* सेना सोबा रे राजा हदादेजेरो री सेना री मताद करने खे आए, तेबे दाऊदे अरामिया बीचा ते 22,000 सिपाई काई ते। 6 तेबे दाऊदे दमिश्को रे अरामो दे सिपाईया री चौकिया बणाईया; ईंयाँ अरामी दाऊदो रे वशो दे ऊई की पेंट ल्याऊणे लगे ओर जेती-जेती दाऊद ओर तेसरी सेना जाओ थी तेती-तेती यहोवा तेसखे जीताओ था। 7 हदादेजेरो रे कर्मचारिया गे सूईने रिया जो ढाला थिया तिना खे दाऊदो री सेना लई की यरूशलेम शईरो खे आए। 8 ओर बेतह ओर बेरौताई नाओं रे हदादेजेरो रे शईरो ते दाऊद राजा बऊत सारा पीतल़ लई आया। 9 जेबे हमाता रे राजा तोईए सुणेया कि दाऊदे री सेने हदादेजेरो री सारी सेना जीती ली री, 10 तेबे तोईए योराम नाओं रा आपणा पाऊ दाऊद राजे गे तेसरा सुखसाँद पूछणे ओर से इजी री खातर मुबारकबाद देणे खे पेजेया कि तिने हदादेजेरो साथे लड़ी की से जीती ला था, कऊँकि से हदादेजेर तोईए री सेना साथे लड़ेया करो था। ओर योराम चाँदी, सूईना ओर पीतल़ी रे पांडे लई की आया। 11 यो दाऊद राजे यहोवे रिया तँईं पवित्र करी की राखे ओर तेड़ा ई आपणी जीती री सब जातिया रे लोका रे सूईने चाँदिए साथे बी कित्तेया। 12 मतलब अरामी, मोआबी, अम्मोनी, पलिश्ती ओर अमालेकिया रा सूईना चाँदी ओर रहोबो रे पाऊ सोबा रे राजा हदादेजेरो री लूट बी राखी।

13 जेबे दाऊद लूणो रिया काअटिया रे 18,000 अरामिया खे काई की वापस ऊआ, तेबे तेसरा नाओं चऊँ कनारे फैलीगा।

14 तेबे तिने एदोमो दे सिपाईया रिया चौकिया बणाईया; ओर पूरे एदोम प्रदेशो दे तिने चौकिया बणाई की तेती सिपाई राखी ते, ओर सारे एदोमी लोक दाऊदो रे वशो दे ऊईगे। ओर दाऊद आपणी सेना साथे जेती-जेती जाओ था तेती-तेती यहोवा तेसखे जीताओ था।

15 दाऊद तो सारे इस्राएलो पाँदे राज करो था ओर दाऊद आपणी सारी प्रजा साथे न्याय ओर तर्मो रे काम करो था। 16 परदान सेनापति सरूयाह रा पाऊ योआब था; इतिआसो खे लिखणे वाल़ा अहीलूदो रा पाऊ यहोशापात था; 17 अहीतूबो रा पाऊ सादोक ओर एब्यातारो रा पाऊ अहीमेलेक दोनो परदान पुरोईत थे; मंत्री सरायाह था; 18 करेती ओर पलेतिया रा परदान यहोयादो रा पाऊ बनायाह था ओर दाऊदो रे पाऊ बी मुखिया अधिकारी थे।