2 सेमुएल 20

शेबा रा बरोद

1 गिलगालो दे बिन्यामीनी गोत्रो रे बिक्रीए रा एक पाऊ रओ था, जेसरा नाओं शेबा था ओर से बऊत ई दखावा करने वाल़ा ओर दुष्ट था: से नरसिंगा बजाई की बोलणे लगेया, "दाऊदो दे म्हारा कोई इस्सा नि ए ओर ना ई यिशै रे पाऊए दे म्हारा कोई इस्सा ए; ओ इस्राएलियो, आपणे-आपणे डेरे खे चली जाओ!" 2 तेबे सारे इस्राएली मर्द दाऊदो पीछे चलणा छाडी की बिक्रीए रे पाऊ शेबा पीछे चली पड़े; पर सारे यहूदी मर्द यरदन नदिया ते यरूशलेम शईरो तक आपणे राजे साथे लगे रे रये। 3 तेबे दाऊद यरूशलेम शईरो खे आपणे मईलो दे आया ओर राजे सेयो दस रखैला खे, जिना खे से मईलो री चौकसी करने खे छाडी गा था, लग एकी कअरे राखिया, ओर तिना खे पाल़दा रया, पर से तिना साथे नि सया। इजी री खातर सेयो आपणी-आपणी मौता रे दिनो तक बिदुआ री जी दशा देई रईया। 4 एक दिन राजे अमासो खे बोलेया, "यहूदी सिपाईया खे तीऊँ दिना ते पीतरे मांगे बुलाई की ल्याओ ओर तैं बी एती आजीर रणा।" 5 तेबे अमासा यहूदी सिपाईया खे बुलाणे गया; पर तेसरे ठराए रे बखतो ते जादा रई गा। 6 तेबे दाऊदे अबीशै खे बोलेया, "एबे बिक्रीए रे पाऊ शेबो अबशालोमो ते बी जादा म्हारा नुकशाण करना; इजी री खातर तूँ आपणे प्रभुए रे लोका खे लई की तिना रा पीछा कर ओर तेसखे काईदे, एड़ा नि ओ कि से गढ़वाल़े शईरो खे लई की म्हारी नजरा ते लूकी जाओ।" 7 तेबे योआबो रे माणूं, करेती ओर पलेती लोक ओर सारे शूरवीर तेस पीछे ऊईगे ओर बिक्रीए रे पाऊ शेबा रा पीछा करने खे यरूशलेम शईरो ते निकल़े। 8 सेयो गिबोन जगा दे तेस पारी पात्थरो गे पऊँचे ई थे कि अमासा तिना साथे आई की मिलेया। योआबे तो योद्धा रे टाल्ले ओर फेंटा गूड़ी राखेया था ओर तेते फेंटे दे एक तलवार आपणी कमरा दे म्यानो दे बानी री थी ओर जेबे से चलेया तेबे से निकल़ी की छूटी गी। 9 तेबे योआबे अमासो ते पूछेया, "ओ मेरे पाई, क्या तूँ ठीक ए?" तेबे योआबे आपणा दाँणा आथ आगे करी की अमासो खे चूमणे खे तेसरी दाढ़ी पकड़ी। 10 पर अमासे तेसा तलवारी री कोई फिकर नि कित्ती जो योआबो रे आथो दे थी ओर तिने से अमासो रे पेटो दे कोपी ती, जेते कि तेसरी आन्तड़िया निकल़ी की जमीना दे छूटी गिया ओर तिने तेसखे दूजी बार नि बाई ओर से मरी गा। तेबे योआब ओर तेसरा पाई अबीशै बिक्रीए रे पाऊ शेबा रा पीछा करने खे चले। 11 तेबे तेसा लाशा गे योआबो रा एक माणूं खड़ा ऊई की बोलणे लगेया, "जो कोई योआबो रे ओर दाऊदो रे पक्षो रा ओ से योआबो पीछे ऊई जाओ।" 12 अमासा री लाश तो सड़का बीचे खूने की लथपथ पड़ी री थी। तो जेबे तिने माणूंए देखेया कि सारे लोक खड़े ऊईगे दे, तेबे अमासा खे सड़का बीचा ते मैदानो दे चकी की लईगा ओर जेबे देखेया कि जितणे तेसगे आओए सेयो खड़े ऊई जाओए, तेबे तिने तेस पाँदे एक कपड़ा राखी ता। 13 तेसरे सड़का बीचा ते खसकेणे ते बाद, सारे लोक बिक्रीए रे पाऊ शेबा रा पीछा करने खे योआबो पीछे ऊईगे।

शेबा खे काणा

14 शेबा सारे इस्राएली गोत्रा बीचे ऊई की आबेल, बेतमाका ओर बेरिया रे देशो तक पऊँचेया ओर सेयो बी कट्ठे ऊई की तेस पीछे चली पड़े। 15 तेबे योआबो रे लोके से बेतमाका दे केरी ता ओर शईरो सामणे एक टीला खड़ा कित्तेया पर शेबा दवाला साथे चिपकी गा। तेबे योआबो साथले सारे लोक दवाला खे टाल़ने खे ताक्का देणे लगे।

16 तेबे एक अक्लमंद जवाणसे शईरो ते आका पाईया, "सुणो! सुणो! योआबो खे बोलो कि एती आओ, ताकि आऊँ तेस साथे कुछ गल्ल करुँ।" 17 जेबे योआब तेसा रे नेड़े गया, तेबे जवाणसे पूछेया, "क्या तूँ योआब ए?" तिने बोलेया, "आ, आऊँ सेईए।" तेबे तेसे तेसखे बोलेया, "आऊँ तेरी दासी ए, मेरिया गल्ला सुण।" तिने बोलेया, "आऊँ सुणने लगी रा।" 18 से बोलणे लगी, "पुराणे जमाने रे लोक बोलेया करो थे, आबेल शईरो दे पूछेया जाओ, ओर ईंयाँ चगड़े खे निपटाई देयो थे। 19 आऊँ तो मेलजोल करने वाल़े ओर परोसे जोगे इस्राएली लोका बीचा ते ई ए; पर तूँ एक परदान शईरो खे नाश करने री कोशिश करने लगी रा, तूँ यहोवे रे इस्से खे किंयाँ खत्म करी सकेया?" 20 योआबे ज्वाब दित्तेया, "ये मांते दूर ओ, दूर, कि आऊँ नाश करुँ! 21 गल्ल एड़ी नि ए। शेबा नाओं रा एप्रैम पाह्ड़ी देशो रा एक मर्द जो बिक्रीए रा पाऊ ए, तिने दाऊद राजे रे खलाफ आथ उठाई राखेया; तो तुसे लोक बस तेसखे ई म्हारे आथो दे करी देयो, तेबे मां शईरो खे छाडी की चली जाणा।" जवाणसे योआबो खे बोलेया, "तेसरा सिर दवाला ते तांगे सेटी देणा।" 22 तेबे जवाणस आपणी अक्ला ते सारे लोका गे गई। तेबे तिने बिक्रीए रे पाऊ शेबा रा सिर बाडी की योआबो गे सेटी ता। तेबे योआबे नरसिंगा बजाया ओर सारे लोक शईरो ते लग-लग ऊई की आपणे-आपणे डेरे खे चली गे ओर योआब यरूशलेम शईरो दे राजे गे वापस ऊईगा।

दाऊदो रे काम करने वाल़े

23 योआब तो सारी इस्राएली सेना पाँदे परदान रया ओर यहोयादा रा पाऊ बनायाह करेती ओर पलेतिया पाँदे परदान था; 24 ओर अदोराम बेगारो वाल़ेया पाँदे परदान था ओर अहीलूदो रा पाऊ यहोशापात इतिआसो रा लिखणे वाल़ा था; 25 ओर शवा मंत्री था; ओर सादोक ओर एब्यातार पुरोईत थे; 26 ओर याईर शईरो रा ईरा बी दाऊदो रा एक मंत्री था।