2 सेमुएल 14

अबशालोमो रा यरूशलेम शईरो दे आऊणा

1 सरूयाह रे पाऊ योआबो खे पता लगी गा कि राजे रा मन अबशालोमो रिया तरफा खे लगी रा। 2 इजी री खातर योआबे तकोआ शईरो दे दूत पेजी की तेथा ते एक अक्लमंद जवाणस बुलाई ओर तेसा खे बोलेया, "दु:ख करने वाल़ी बणी जा, मतलब शोगो रा पईरावा पईन ओर तेल नि लगा; पर एड़ी जवाणस बणी जा जेसे बऊत दिना ते मरे दे माणूंए खे दु:ख करी राखेया ओ। 3 तेबे राजे गे जाई की एड़िया-एड़िया गल्ला बोलणिया।" ओर योआबे तेसा खे जो कुछ राजे खे बोलणा था से सिखाई ता। 4 जेबे से तकोआ जगा री जवाणस राजे रे नेड़े गई, तेबे से मुंए रे पारे जमीना दे पड़ी की माथा टेकी की बोलणे लगी, "ओ राजा मेरी मताद कर।" 5 राजे तेसा ते पूछेया, "ताखे क्या ऊईरा?" तेसे बोलेया, "मेरा लाड़ा कुछ बखत पईले मरी गा रा ओर आऊँ बिदुआ ऊई गी री। 6 ओर तेरी दासिया रे दो पाऊ थे ओर तिने दुँईं मैदानो दे मारपीट कित्ती ओर तिना खे छुड़ाणे वाल़ा कोई नि था, तेबे एकी जणे दूजे खे एड़ी बाई कि से मरी गा। 7 एबे सुण, सारे कुलो रे लोक तेरी दासिया रे खलाफ ऊई की एड़ा बोलोए, ‘जिने आपणा पाई काई राखेया तेसखे आसा रे आथो दे करी दे, ताकि तेसरे काये रे पाईए रे प्राणो रे बदले तेसखे बी काई देईए;’ ओर ईंयाँ सेयो मेरे आखरी बचे रे बारिसो खे बी नाश करना चाओए। ईंयाँ तिना मेरा दिऊआ जो बचीगा रा बजयाई देणा ओर मेरे लाड़े रा नाओं ओर ल्वाद तरतिया पाँदा ते मिटाई देणे।" 8 राजे जवाणसा खे बोलेया, "आपणे कअरे जा ओर मां आपू तेरा फैंसला करना।"

9 तेबे तकोआ शईरो री जवाणसे राजे खे बोलेया, "ओ मेरे प्रभु, ओ राजा, दोष माखे ओर मेरे बाओ रे कराने खे ई लगो ओर राजा आपणी गद्दिया समेत निर्दोष ठईरो।" 10 राजे बोलेया, "जो कोई ताखे कुछ बोलोगा तेसखे मांगे ल्याओ, तेबे से ताखे फेर छुँईं नि सकदा।" 11 तेसे बोलेया, "राजा आपणे परमेशर यहोवे खे याद राखो कि खूनो रा बदला लणे वाल़ा, ओर नाश नि करी सको ओर मेरे पाऊए रा नाश नि ऊई सको।" तिने बोलेया, "यहोवे री जिन्दगिया री कसम, तेरे पाऊए रा एक बी बाल़ जमीना दे नि पड़ी सकणा।" 12 जवाणसे बोलेया, "तेरी दासी आपणे प्रभु राजे साथे एक गल्ल बोलणा चाओई।" 13 तिने बोलेया, "बोलदी जा।" जवाणस बोलणे लगी, "तूँ परमेशरो रे लोका रिया तँईं से सब कऊँ नि करदा जो तैं मेरिया तँईं करने खे बोली राखेया। ओ राजा, तैं ये फैंसला करने दे आपणे आपू खे दोषी बणाई ला दा ए। कऊँकि तैं आपणे निकयाल़े दे माठे खे आपणे कअरे ल्याऊणे खे ना करिती दी ए। 14 आसा खे तो मरना ईए ओर जमीना दे खींडे रे पाणिए जेड़े ठईरने, जेतेखे फेर चकी नि सकदे; तेबे बी परमेशर प्राण नि लंदा, बल्कि एड़ी योजना करोआ कि काडेया दा तेसगे काडेया दा नि रओ। 15 ओर एबे आऊँ जो आपणे प्रभु राजे खे ये गल्ल बोलणे आई री, इजी री बजअ ये कि लोके आऊँ डराई ती थी; इजी री खातर तेरी दासिये सोचेया, ‘मां राजे गे बोलणा, क्या पता राजा आपणी दासिया री बिनती पूरी करो। 16 पक्का राजे सुणी की आपणी दासी जरूर तेस माणूंए रे आथो ते बचाणी, जो माखे ओर मेरे पाऊए खे परमेशरो रे इस्से ते नाश करना चाओआ।’ 17 इजी री खातर तेरी दासिये सोचेया, ‘मेरे प्रभु राजे रे वचनो ते शान्ति मिलो;’ कऊँकि मेरा प्रभु राजा परमेशरो रे केसी दूतो जेड़ा खरे-बुरे दे भेद करी सकोआ; इजी री खातर तेरा यहोवा परमेशर तां साथे रओ।" 18 राजे ज्वाब देई की तेसा जवाणसा खे बोलेया, "जो गल्ल आऊँ तांते पूछणे लगी रा, से मांते नि छुपा।" जवाणसे बोलेया, "ओ मेरे प्रभु राजा पूछ।" 19 राजे पूछेया, "एते गल्ला दे क्या योआब तां साथे ए?" जवाणसे ज्वाब दित्तेया, "ओ मेरे प्रभु, ओ राजा, तेरी जिन्दगिया री कसम, जो कुछ मेरे प्रभु राजे बोली राखेया, से सब सच आ, तिदे कुछ बी चूठ नि आ। तेरे दास योआबे ई माखे आज्ञा दित्ती ओर यो सारिया गल्ला तेरी दासिया खे तिने ई सिखाई राखिया। 20 तेरे दास योआबे ये काम इजी खे कित्तेया, ताकि गल्ला रा रंग बदलो। ओर मेरा प्रभु परमेशरो रे एक दूतो जेड़ा अक्लमंद ए, एथो तक कि तरतिया पाँदे जो कुछ ओआ, तिना सबी खे से जाणोआ।" 21 तेबे राजे योआबो खे बोलेया, "सुण, मैं ये गल्ल मानी राखी; तूँ जाई की अबशालोमो खे वापस ली आओ।" 22 तेबे योआबे जमीना दे मुंए रे पारे पड़ी की माथा टेकेया ओर राजे आशीर्वाद दित्तेया ओर योआब बोलणे लगेया, "ओ मेरे प्रभु, ओ राजा, आज तेरे दासो खे पता लगी गा रा कि मां पाँदे तेरी दया-दृष्टि ए, कऊँकि राजे आपणे दासो री बिनती सुणी राखी।" 23 तेबे योआब उठी की गशूरो खे गया ओर अबशालोमो खे यरूशलेम शईरो दे लई आया। 24 तेबे राजे बोलेया, "से आपणे कअरे जाई की रओ ओर माखे नि देखो।" तेबे अबशालोम आपणे कअरो खे चली गा ओर राजे खे नि मिलेया।

अबशालोमो रा दाऊद राजे रे सामणे जाणा

25 सारे इस्राएलो रे सुन्दरता रिया बजअ ते बऊत तारीफा जोगा अबशालोमो जेड़ा ओर कोई नि था; बल्कि तेसरे सिरो ते लई की पैरो तक कोई दोष नि था। 26 से सालो रे अन्तो रे आपणे बाल़ कटवाओ था; (तेसखे आपणे बाल़ा रा बोज लगो था, इजी बजअ ते से तिना खे कटवाओ था) ओर जेबे-जेबे से आपणे बाल़ कटवाओ था, तेबे-तेबे आपणे सिरो रे बाल़ तोली की राजे रे तोलो रे मुताबिक तिना रा बजन दो किलो ओ था। 27 अबशालोमो रे तीन पाऊ ओर तामार नाओं री एक बेटी पैदा ऊई ओर से बऊत बांकी जवाणस थी। 28 जेबे अबशालोम राजे खे बिना मिले यरूशलेम शईरो दे दुँईं साला तक रया। 29 तेबे अबशालोमे योआब बुलाया, ताकि तेसखे राजे गे पेजो, पर योआबे तेसगे आऊणे ते ना करी ती। ओर तिने फेर से दूजी बार बुलाया, पर तेबे बी तिने आऊणे ते ना करी ती। 30 तेबे तिने आपणे सेवका खे बोलेया, "सुणो, योआबो रा एक डोरू मेरी जमीना रे नेड़े ए ओर तिदे तेसरे जौ री फसल ए; तुसे जाई की तिदे आग लगाई देयो।" ओर अबशालोमो रे सेवके तिदे आग लगाईती। 31 तेबे योआब उठेया ओर अबशालोमो रे कअरे तेसगे जाई की तेसते पूछणे लगेया, "तेरे सेवके मेरे डोरूए दे आग कऊँ लगाई?" 32 अबशालोमे योआबो खे बोलेया, "कऊँकि आऊँ चाऊँ था तूँ राजे गे जाई की पूछे कि जे मांते मिलणा नि चांदा तो तिने आऊँ गशूरो ते कऊँ बुलाया। आऊँ तेथी ई रूकेया दा रंदा। एबे माखे राजे साथे मिलणे दे। अगर जे से मांदे केसी गल्ला रा दोष पाओआ तो से माखे काई देयो।" 33 तेबे योआबे राजे गे जाई की तेसगे ये गल्ल सुणाई ओर राजे अबशालोम बुलाया। से तेसगे गया ओर तेस सामणे मुंए रे पारे जमीना दे पड़ी की माथा टेकेया ओर राजे अबशालोम गल़े लगाई की चूम्मेया।