1 तेबे योआबो खे ये सन्देश मिलेया, "दाऊद राजा अबशालोमो रिया तँईं रोणे लगी रा ओर दु:ख करने लगी रा।" 2 अबशालोमो रे मरने ते से बऊत दु:खी था, इजी री खातर तेस दिनो री जीत सारे लोका री समजा दे दु:खो री ई बजअ बणीगी; कऊँकि लोके तेस दिने सुणेया कि दाऊद राजा आपणे पाऊए खे दु:खी ए। 3 इजी री खातर तेस दिने लोक एड़ा मूँ लकोई की शईरो दे कूसे, जेड़े लोक युद्धो ते नठी की आऊणे ते शर्मिंदा ऊई की मूँ लकोए। 4 ओर दाऊद राजा मूँ टखी की जोरे-जोरे की रोणे लगेया, "हाय मेरे पाऊ अबशालोम! हाय अबशालोम, मेरे पाऊ, मेरे पाऊ!" 5 तेबे योआब मईलो दे दाऊद राजे गे जाई की बोलणे लगेया, "तेरे कर्मचारिये आजके दिने तेरे, ओर तेरे माठे-बेटिया रे, ओर तेरी लाड़िया रे ओर तेरी रखैलिया रे प्राण बचाई राखे, पर तैं आज सबी रा मूँ काल़ा करी राखेया; 6 कऊँकि तूँ आपणे दुश्मणा साथे प्यार ओर आपणे चाणे वाल़ेया साथे बैर राखेया। तैं आज ये दसीता कि ताखे परदाना ओर कर्मचारिया री कोई फिकर नि ए; बल्कि माखे आज पता लगी गा कि जे आसे सारे आज मरी जांदे ओर अबशालोम जिऊँदा रंदा, तो तूँ बऊत खुश ऊणा था। 7 इजी री खातर एबे उठी की बारे जा ओर आपणे कर्मचारिया खे शान्ति दे; नई तो आऊँ यहोवे री कसम खाई की बोलूँआ कि जे तूँ बारे नि गया, तो आज राती एक बी माणूं तां साथे नि रणा ओर तेरे बचपनो ते लई की आजो तक जितणिया मुसीबता तां पाँदे पड़ी रिया, तिना सबी ते ये मुसीबत बड़ी ऊणी।" 8 तेबे राजा उठी की बड़े द्वारो गे जाई की बैठेया। जेबे सारे लोका गे ये बोलेया कि राजा बड़े द्वारो गे बैठी रा; तेबे सारे लोक राजे सामणे आए। एते बीचे इस्राएली सिपाई आपणे-आपणे कअरा खे नठीगे थे।

9 इस्राएलो रे सारे गोत्रा रे लोक आपू बीचे ये बोली की लड़ो थे, "दाऊद राजे आसे म्हारे दुश्मणा रे आथो ते बचाए थे ओर पलिश्तिया रे आथो ते तिने ई आसे छुड़ाए; पर एबे से अबशालोमो रे डरो रे मारे देश छाडी की नठी गा, 10 अबशालोम जेसरा आसे आपणा राजा ऊणे खे अभिषेक कित्तेया था, से युद्धो दे मरी गा रा। तो तुसे एबे चुप कऊँ रओए? ओर राजे खे वापस ल्याऊणे री चर्चा कऊँ नि करदे?" 11 तेबे दाऊद राजे सादोक ओर एब्यातार पुरोईता गे सन्देशा पेजेया, "यहूदी परदाना खे बोलो, ‘कि तुसे लोक राजे खे मईलो दे पऊँचाणे खे सबी ते पीछे कऊँ ओए जबकि सारे इस्राएली लोका री गल्ल बात राजे रे सुणने दे आई री कि तेसखे मईलो दे पऊँचाओ। 12 तुसे लोक तो मेरे पाई, बल्कि मेरे ई कुलो रे ए; तो तुसे राजे खे वापस निणे रे सबी ते पीछे कऊँ ओए?’ 13 एबे अमासा खे ये बोलो, ‘क्या तूँ मेरे कुलो रा नि ए? ओर जे तूँ योआबो रिया जगा रे सदा खे सेनापति नि ठईरे, तो परमेशर मां साथे तेड़ा ई बल्कि तिजी ते बी जादा करो।’" 14 ईंयाँ तिने सारे यहूदी मर्दा रा मन आपणी तरफा खे खींजी ला कि मानो एक ई मर्द था; ओर तिने राजे खे सन्देशा पेजेया, "तूँ आपणे सारे कर्मचारिया खे लई की वापस आईजा।"

15 तेबे राजा वापस ऊई की यरदन नदिया तक आईगा ओर यहूदी लोक गिलगालो तक गये, ताकि तेस साथे मिली की तेसखे यरदनो ते वार ली आओ।

16 यहूदिया साथे गेरो रा पाऊ बिन्यामीन प्रदेशो रा शिमी बी जो बहूरीमो रा रणे वाल़ा था फटाफट दाऊद राजे खे मिलणे गया; 17 तेस साथे 1,000 बिन्यामीनी मर्द थे। ओर शाऊलो रे कराने रा कर्मचारी सीबा आपणे पंद्रा पाऊ ओर बीइ दासा समेत था, ओर सेयो राजे सामणे यरदन नदिया ते पार पैदल उतरी गे। 18 ओर एक बेड़ा राजे रे परिवारो खे वार ल्याऊणे ओर जेस कामो दे से तेसखे लगाणा चाओ तिदे ई लगणे खे पार गया। जेबे राजा यरदनो ते पार जाणे वाल़ा था, तेबे गेरो रा पाऊ शिमी तेसरे पैरा पाँदे पड़ी की, 19 राजे खे बोलणे लगेया, "मेरा प्रभु मेरे दोषो रा लेखा नि लओ ओर जेस दिने मेरा प्रभु राजा यरूशलेम शईरो खे छाडी की आया, तेस दिने तेरे दासे जो बुरा काम कित्तेया, तेतेखे एड़ा याद नि करो कि राजा तिजी खे आपणे त्यानो दे राखो। 20 कऊँकि तेरा दास जाणोआ कि मैं पाप करी राखेया; देख, आज आपणे प्रभु राजे साथे मिलणे खे यूसुफो* रे सारे कराने बीचा ते आऊँ ई पईला आई रा।" 21 तेबे सरूयाहो रे पाऊ अबीशै बोलेया, "शिमिये जो यहोवे रे अभिषिक्तो खे स्राप दित्तेया था, इजी बजअ ते क्या से काणा नि चाईयो?" 22 दाऊदे बोलेया, "ओ सरूयाहो रे पाऊओ, माखे तुसा ते क्या काम ए कि तुसे आज मेरे बिरोदी ठईरी रे? आज इस्राएलो दे केसी खे बी मौता री सजा नि मिलणी, कऊँकि आऊँ जाणूंआ कि आज आऊँ इस्राएलो रा राजा बणी रा।" 23 तेबे राजे शिमिये खे बोलेया, "ताखे मौता री सजा नि मिलणी।" ओर राजे तेसते कसम बी खाई।

24 तेबे शाऊलो रा पोता मपीबोशेत राजे साथे मिलणे खे आया; तिने राजे रे चली जाणे रे दिनो ते ओर तेसरे रामो दे आऊणे रे दिनो तक ना आपणे पैरो रे नस कटे ओर ना आपणी दाढ़ी बणवाई ओर ना ई आपणे टाल्ले तुलाए थे। 25 जेबे यरूशलेमो रे लोक राजे साथे मिलणे खे गये, तेबे राजे तेसते पूछेया, "ओ मपीबोशेत, तूँ मां साथे कऊँ नि गया था?" 26 तिने बोलेया, "ओ मेरे प्रभु, ओ राजा, मेरे कर्मचारी सीबे माखे तोखा दित्तेया था; तेरा दास जो अपंग ए; इजी री खातर मैं आपणे सेवक सीबा खे बोलेया कि मेरे गह्दे पाँदे काठी बानी की माखे बठयाल़ी दे, मां राजे साथे चली जाणा। 27 ओर मेरे कर्मचारिये मेरे प्रभु राजे सामणे मेरी चुगली करी राखी। पर मेरा प्रभु राजा परमेशरो रे दूतो जेड़ा ए ओर जो कुछ ताखे अच्छा लगो, सेई कर। 28 ओ मेरे मालक! मेरे बाओ रा सारा कराना तेरी तरफा ते मौता री सजा जोगा था; पर तैं आपणा दास आपणी मेजा पाँदे खाणे वाल़ेया बीचे गिणेया। माखे क्या अक्क ए कि आऊँ राजे री दुहाई देऊँ?" 29 राजे तेसखे बोलेया, "तूँ आपणी गल्ला रे बारे दे कऊँ बतांदा रएआ? मेरी ये आज्ञा ए कि तेसा जमीना खे तूँ ओर सीबा आपू बीचे बांडी लो।" 30 मपीबोशेते राजे खे बोलेया, "माखे तो ये ई खरा ऊआ जो मेरा प्रभु राजा सई-सलामत आपणे कअरे आई रा, इजी री खातर सीबे खे ई सब कुछ लई ले।"

31 तेबे गिलाद जगा दे बर्जिल्लै रोगलीमो ते आया ओर राजे साथे यरदन नदिया ते पार गया, कि तेसखे यरदन नदिया ते पार पऊँचाओ। 32 बर्जिल्लै तो स्याणा माणूं था, मतलब अस्सी साला रा था, जदुओ तक राजा महनैमो दे रओ था, तदुओ तक से तेसखे पाल़दा रया; कऊँकि से बऊत अमीर था। 33 तेबे राजे बर्जिल्लै खे बोलेया, "मां साथे पार चल ओर मां तूँ यरूशलेम शईरो दे आपू साथे राखी की तूँ पाल़ना।" 34 बर्जिल्लै राजे खे बोलेया, "आऊँ कितणे दिन जिऊँदा रणा, कि आऊँ राजे साथे यरूशलेम शईरो खे जाऊँ? 35 आज आऊँ अस्सी साला राए; आऊँ तो एबे खरे-बुरे रा भेद पनि करी सकदा। ओर ना तेरा दास जो कुछ खाओ-पियोआ तिजी रा स्वाद पछयाणी सकोआ। एबे माखे गाणेवाल़ेया री आवाज पनि सुणदी। तेरा दास एबे आपणे स्वामी राजे खे कऊँ बोजो री बजअ बणो? 36 तेरा दास राजे साथे यरदनो ते पार तक ई जाणा। राजा इजी रा एड़ा बड़ा बदला माखे कऊँ देयो? 37 आपणे दासो खे वापस ऊणे दे, ताकि आऊँ आपणे ई शईरो दे आपणे माया-बाओ रे कब्रिस्तानो गे मरूँ। पर तेरा दास मेरा पाऊ किम्हाम तांगे आजीर ए; मेरे प्रभु राजे साथे से पार जाओ ओर जेड़ा ताखे ठीक लगो तेड़ा ई तेस साथे बर्ताओ कर।" 38 राजे बोलेया, "आ, किम्हाम मां साथे पार चलणा ओर जेड़ा ताखे ठीक लगो तेड़ा ई मां तेस साथे बर्ताओ करना बल्कि जो कुछ तूँ मांते चाएगा से मां तेरिया तँईं करना।" 39 तेबे सारे लोक यरदन नदिया ते पार गये ओर राजा बी पार ऊआ; तेबे राजे बर्जिल्लै गल़े लगाया ओर तेसखे आशीर्वाद दित्तेया ओर से आपणी जगा खे वापस ऊईगा। 40 नदी पार करने ते बाद राजा गिलगालो रिया तरफा खे पार गया ओर तेस साथे किम्हाम पार ऊआ ओर सारे यहूदी लोके ओर आदे इस्राएली लोके राजा पार पऊँचाया। 41 तेबे सारे इस्राएली मर्द राजे गे आए ओर राजे खे बोलणे लगे, "क्या बजअ ए कि म्हारे यहूदी पाई ताखे चोरिए ल्याए ओर परिवारो समेत राजे खे ओर तेसरे सारे माणूंआ खे बी यरदनो ते पार ली आई रे।" 42 सारे यहूदी मर्दे इस्राएली मर्दा खे ज्वाब दित्तेया, "बजअ ये कि राजा म्हारे गोत्रो राए। तो तुसे एते गल्ला ते नराज मत ओ। कऊँकि आसे राजे रा दित्तेया रा कुछ पनि खाई राखेया, ओर ना ई तिने आसा खे कुछ देई राखेया।" 43 इस्राएली लोके यहूदी लोका खे ज्वाब दित्तेया, "आसे लोक दाऊद राजे रे राज्य रे दस इस्से ए। इजी री खातर आसा रा राजा दाऊदो पाँदे तुसा ते जादा अक्क ए। पर तुसे लोके आसे नकम्मे कऊँ जाणे। क्या आपणे राजे खे वापस ल्याऊणे री चर्चा पईले आसे ई नि कित्ती थी?" तेबे यहूदी लोके इस्राएली लोके ते जोरे की ओर गुस्से दे गल्ला कित्तिया।