1 दाऊद आपणे साथिया साथे जैतून पाह्ड़ो रिया चूँडिया पाँदे थोड़ी दूर चलेया, तेती मपीबोशेतो रा सेवक सीबा दाऊदो ते मिलेया। सीबा गे काठिया समेत दो गह्दिया थिया। तिना पाँदे 200 रोटिया, दाखा रिया 100 टिक्किया, गर्मिया रे फलो रिया 100 टिक्किया ओर एक खलडु अँगूरा रा रस था। 2 राजे सीबा ते पूछेया, "इना चीजा ते तेरा क्या मतलब ए?" सीबे बोलेया, "गह्दे तो राजे रे कराने रिया सवारिया खे ए ओर रोटी ओर गर्मिया रे फल जवाना खे खाणे खे ए ओर अँगूरा रा रस इजी खे ए, ताकि जो कोई जंगल़ो दे थकी जाओ से तिजी खे पियो।" 3 राजे पूछेया, "तेरे स्वामी शाऊलो रा पोता मपीबोशेत केई ए?" सीबे राजे खे बोलेया, "से तो ये बोली की यरूशलेम शईरो दे रई गा कि एबे इस्राएलो रे कराने माखे मेरे दादा शाऊलो रा राज्य वापस करी देणा।" 4 राजे सीबे खे बोलेया, "जो कुछ मपीबोशेतो रा था से सारा ताखे मिली गा।" सीबे बोलेया, "नमस्ते; ओ मेरे प्रभु, ओ राजा, मां पाँदे तेरी दया री नजर बणी दी रओ।"

5 जेबे राजा दाऊद ओर जो तेस साथे थे बहूरीम शईरो तक पऊँचे, तेबे शाऊलो रे टब्बरो रा एक माणूं तेथा ते निकल़ेया, से गेरो रा पाऊ शिमी था ओर से दाऊदो खे कोसदा ऊआ आया। 6 से राजा दाऊदो पाँदे ओर तेसरे सारे कर्मचारिया पाँदे पात्थर सेटणे लगेया ओर सेनिका समेत लोक तेसरे दाँणे ओर खूँजे दुँईं तरफा खे थे। 7 शिमी कोसदा ऊआ ईंयाँ बकदा गया, "दूर ऊई जा खूनी, दूर ऊई जा नीच, निकल़ी जा, निकल़ी जा! 8 यहोवे तांते शाऊलो रे कराने रे खूनो रा पूरा बदला लई राखेया, जेसरी जगा पाँदे तूँ राजा बणी रा; यहोवे राज तेरे पाऊ अबशालोमो रे आथो दे करी ता रा। कऊँकि तूँ खूनी ए, तूँ आपणी बुराईया दे आपू फसी गा।" 9 तेबे सरूयाह रे पाऊ अबीशै राजे खे बोलेया, "ये मरेया रा कुत्ता मेरे प्रभु राजे खे स्राप किंयाँ देई सकोआ? माखे तेथी जाई की तेसरा सिर बाडणे दे।" 10 राजे बोलेया, "सरूयाहो रे पाऊओ, माखे तुसा ते क्या काम ए? से जो कोसणे लगी रा ओर यहोवे जो तेसखे बोली राखेया कि दाऊदो खे स्राप दे, तो तेसखे कुण पूछी सकोआ, कि तैं एड़ा कऊँ कित्तेया?" 11 तेबे दाऊदे अबीशै ओर आपणे सारे कर्मचारिया खे बोलेया, "जेबे मेरा आपणा पाऊ बी माखे काणा चाओआ, तो ये बिन्यामीनी एबे एड़ा कऊँ नि करो? एसखे रणी दे ओर स्राप देणे देयो; कऊँकि यहोवे तेसखे बोली राखेया। 12 क्या पता यहोवा एस उपद्रवो पाँदे, जो मां पाँदे ऊणे लगी रा, नजर करी की आजके स्रापो रे बदले माखे अच्छा बदला देयो।" 13 तेबे दाऊद आपणे माणूंआ समेत आपणी बाटा रे चली गा ओर शिमी तेस सामणे रे पाह्ड़ो पाँदा ते स्राप देंदा ओर तेस पाँदे पात्थर ओर तूड़ सेटदा गया। 14 तेबे राजा आपणे सारे लोका साथे आपणे ठकाणे रे थकेया रा पऊँचेया ओर तेथी राम कित्तेया।

15 अबशालोम सारे इस्राएली लोका समेत यरूशलेम शईरो खे आया ओर तेस साथे अहीतोपेल बी आया। 16 जेबे दाऊदो रा दोस्त एरेकी हूशै अबशालोमो गे पऊँचेया, तेबे हूशै अबशालोमो खे बोलेया, "राजा सदा जिऊँदा रओ! राजा सदा जिऊँदा रओ!" 17 अबशालोमे हूशै खे बोलेया, "क्या ये तेरा प्यार ए जो तूँ आपणे दोस्तो साथे राखेया? तूँ आपणे दोस्तो साथे कऊँ नि गया?" 18 हूशै अबशालोमो खे बोलेया, "एड़ा नि ए; जेसखे यहोवा ओर सेयो लोक, बल्कि सारे इस्राएली लोक चाओ, तेसरा ई आऊँ ए ओर तेस साथे ई मां रणा। 19 ओर फेर आऊँ केसरी सेवा करुँ? क्या तेसरे पाऊए रे सामणे रई की सेवा नि करुँ? जेड़ा आऊँ तेरे बाओ सामणे रई की सेवा करुँ था, तेड़ी ई तां सामणे रई की सेवा करनी।" 20 तेबे अबशालोमे अहीतोपेलो खे बोलेया, "तुसे लोक आपणी सला देयो कि माखे क्या करना चाईयो?" 21 अहीतोपेले अबशालोमो ते बोलेया, "जिना रखैला खे तेरा बाओ चौकसी करने खे छाडी गा, तिना गे तूँ जा ओर जेबे सारे इस्राएली लोका ये सुणना कि अबशालोमो रा बाओ तेसते प्यार नि करदा, तेबे तेरे सारे साथिया याओ बानणा।" 22 तेबे तेसरिया तँईं छतो पाँदे एक तम्बू खड़ा कित्तेया ओर अबशालोम सारे इस्राएली लोका सामणे आपणे बाओ री रखैला गे गया। 23 तिना दिना दे जो सला अहीतोपेल देयो था, से एड़ी ओ थी कि मानो कोई परमेशरो रा वचन पूछणे लगी रा ओ। इजी री खातर अबशालोम बी दाऊदो जेड़ा ई अहीतोपेलो री सला मानणे लगेया।