1 दाऊदो रे दिना दे लगातार तीऊँ साला तक अकाल़ पड़ेया; तो दाऊदे यहोवे ते प्रार्थना कित्ती। यहोवे बोलेया, "ये शाऊल ओर तेसरे खूनी कराने रिया बजअ ते ऊआ, कऊँकि तिने गिबोनी लोक मरवाए थे।" 2 तेबे दाऊद राजे गिबोनिया खे बुलाई की तिना साथे गल्ला कित्तिया। गिबोनी लोक इस्राएली लोका बीचा ते नि थे, सेयो बचे दे एमोरिया बीचा ते थे ओर इस्राएलिये तिना साथे कसम खाई थी, पर शाऊलो खे जो इस्राएली लोका ओर यहूदिया रिया तँईं जल़न ऊई थी, इजी ते तिने तिना खे काणे री कोशिश कित्ती थी। 3 तेबे दाऊदे गिबोनिया ते पूछेया, "आऊँ तुसा रिया तँईं क्‍या करुँ? ओर क्या करी की एड़ा प्राश्चित करुँ कि तुसे यहोवे रे आपणे इस्से खे आशीर्वाद देई सको?" 4 गिबोनिये तेसखे बोलेया, "आसा रे ओर शाऊल या तेसरे कराने बीचे पैसेया रा कोई लड़ाई चगड़ा नि ए ओर ना ई म्हारा काम ए कि केसी इस्राएलिये खे काऊँ।" दाऊदे बोलेया, "जो कुछ तुसा बोलणा, मां सेई तुसा रिया तँईं करना।" 5 तिने राजे खे बोलेया, "जिने मर्दे आसे नाश करी ते ओर म्हारे खलाफ एड़ी साजिश कित्ती कि आसे एड़े नाश ऊई जाऊँ कि इस्राएलो रे देशो दे आगो खे नि रई सकूँ, 6 तेसरे कुलो रे सात जणे आसा रे आथो दे देई दे ओर आसा तिना खे यहोवे रिया तँईं यहोवे रे चूणे दे शाऊलो री गिबा नाओं रिया बस्तिया दे फाँसी देणी।" राजे बोलेया, "मां सेयो देई देणे।" 7 पर दाऊदे ओर शाऊलो रे पाऊ योनाताने आपू बीचे यहोवे री कसम खाई थी, इजी बजअ ते राजे योनातानो रा पाऊ मपीबोशेत जो शाऊलो रा पोता था बचाई की राखेया। 8 पर अर्मोनी ओर मपीबोशेत नाओं रे, अय्या री बेटी रिस्पा रे दोनो पाऊ, जो शाऊलो ते पैदा ऊए थे; ओर शाऊलो री बेटी मेरबा रे पाँजो पाऊ, जो सेयो महोल शईरो दे रणे वाल़े बर्जिल्लै रे पाऊ अद्रीएलो रिया तरफा ते थे, सेयो राजे पकड़वाई की 9 गिबोनिया रे आथो दे देई ते ओर तिने तिना खे पाह्ड़ो पाँदे यहोवे रे सामणे फाँसी दित्ती ओर सातो एक साथे नाश ऊईगे। तिना खे काणा बडाईया रे पईलके दिना रे, मतलब जौ रिया बडाईया री शुरूआता दे ऊआ। 10 तेबे अय्या री बेटिये रिस्पे टाट लई की, बडाईया री शुरूआता ते लई की, जदुओ तक सर्गो ते तिना पाँदे बऊत जादा बर्खा नि ऊई, तदुए तक चट्टानी पाँदे तेसे से टाट आपू ते थाले बछाई की राखी ओर ना तो तेसे से दिने सर्गो रे पंछिया ते ओर ना राती बणो रे डांगरा ते आपणे बच्चेया रिया लाशा छूणे दित्तिया। 11 जेबे अय्या री बेटी शाऊलो री रखैल रिस्पा रे एस कामो रा सन्देश दाऊदो खे मिलेया, 12 तेबे दाऊदे जाई की शाऊल ओर तेसरे पाऊ योनातानो री आड्डिया खे गिलाद जगा रे याबेशो रे परदान लोका ते लई लिया, जो तिने बेतशान शईरो रे तेस चौको ते चोरी तिया थिया, जेती पलिश्तिये सेयो तेस दिने टँगाईया थिया, जेबे तिने शाऊल गिलबो पाह्ड़ो पाँदे काया था; 13 तो से तेथा ते शाऊल ओर तेसरे पाऊ योनातानो रिया आड्डिया खे ली आया ओर जिना खे फाँसी मिली थी तिना री आड्डिया बी कट्ठिया कित्तिया। 14 शाऊल ओर तेसरे पाऊ योनातानो रिया आड्डिया बिन्यामीन गोत्रो रे देशो दे जेला शईरो दे शाऊलो रे बाओ कीशो रे कब्रिस्तानो दे दबाईया ओर राजा दाऊदो री सारी आज्ञा रे मुताबिक काम ऊआ। तिजी ते बाद परमेशरे देशो रिया तँईं तिना री प्रार्थना सुणी ली।

15 पलिश्तिये इस्राएली लोका साथे फेर लड़ाई कित्ती ओर दाऊद आपणे लोका समेत जाई की पलिश्तिया साथे लड़ने लगेया, पर दाऊद थकी गा। 16 तेबे यिशबोबनोब, जो रपाईया रे कुलो रा था ओर तेसरे भाल़े रा पार बजनो दे साढ़े तीन किलो* पीतल़ी रा था ओर तिने नई तलवार बानी राखी थी, तिने दाऊद काणा चाया था, 17 पर सरूयाह रे पाऊ अबीशै दाऊदो री मताद करी की से पलिश्ती एड़ा मारेया कि से मरी गा। तेबे दाऊदो रे माणूंए कसम खाई की तेसखे बोलेया, "तां फेर आसा साथे युद्ध करने नि जाणा, एड़ा नि ओ कि तेरे मरने ते इस्राएलो रा दिऊआ बीजी जाओ।" 18 इजी ते बाद पलिश्तिया साथे गोब जगा दे फेर युद्ध ऊआ; तेस बखते हूशाई सिब्बकै रपाईवंशी सप काई ता। 19 तेबे गोबो दे पलिश्तिया साथे फेर युद्ध ऊआ; तिदे बेतलेहमो रे रणे वाल़ा यारयोरगीमो रा पाऊ एल्हानाने गत शईरो दे रणे वाल़ा गोलियत काई ता, जेसरे बड़छे रा डण्डा जुलाहे री डोंगिया जेड़ा था। 20 फेर गतो रे बी लड़ाई ऊई ओर तेती एक बड़े डील-डौल वाल़ा एक रपाईवंशी मर्द था, जेसरे एक-एक आथ-पैरो रे छे-छे गूठिया, मतलब गिणतिया रे चौबी गूठिया थिया। 21 जेबे तिने इस्राएलो खे ललकारेया, तेबे दाऊदो रे पाई शिमआह रे पाऊ योनाताने से काया। 22 ये ई चारो पलिश्ती गतो रे तेस रपाईये ते पैदा ऊए थे, सेयो सब दाऊद ओर तेसरे माणूंए काईते।