2 सेमुएल 18

अबशालोमो री आर ओर मौत

1 तेबे दाऊदे आपू साथले लोका री गिणती कित्ती ओर तिना पाँदे सौ-सौ ओर ह्जार-ह्जार करी की लग कित्ते ओर तिना पाँदे परदान ओर सेनापति ठराए। 2 तेबे दाऊदे लोका रा एक तिहाई योआबो रे, एक तिहाई सरूयाह रे पाऊ योआबो रे पाई अबीशै रे ओर एक तिहाई गती इत्तै रे आथो दे करी की युद्धो दे लड़ने खे पेजी ते ओर फेर दाऊद राजे लोका खे बोलेया, "मां बी तुसा साथे लड़ाई करने खे पक्का जाणा।" 3 लोके बोलेया, "तूँ नि जाई सकदा, कऊँकि चाए आसे नठी जाऊँ, तेबे बी अबशालोमो म्हारी फिकर नि करनी; बल्कि चाए आसा बीचा ते आदे मरी बी जाओ, तेबे बी अबशालोमो म्हारी फिकर नि करनी, कऊँकि तू आसा जेड़े 10,000 माणूंआ रे बराबर ए; इजी री खातर अच्छा ये कि तूँ शईरो ते ई म्हारी मताद करने खे त्यार रया।" 4 दाऊद राजे तिना खे बोलेया, "जो कुछ तुसा खे ठीक लगोआ, मां सेई करना।" तेबे राजा बड़े द्वारो दे एकी तरफा खे खड़ा रया ओर सारे लोक सौ-सौ ओर ह्जार-ह्जार करी की निकल़ने लगे। 5 जेबे सेयो जाणे लगे तेबे दाऊद राजे योआब, अबीशै ओर इत्तै खे आज्ञा दित्ती, "मेरिया तँईं तेस जवान, मतलब अबशालोमो साथे नरम बर्ताओ करना।" ये आज्ञा राजे अबशालोमो रे बारे दे सारे परदाना खे सारे लोका रे सुणदे ऊए दित्ती। 6 तेबे दाऊदो रे लोक इस्राएली लोका रा सामणा करने खे मैदानो दे निकल़े ओर एप्रैम नाओं रे बणो दे युद्ध ऊआ। 7 तेती इस्राएली लोक दाऊदो रे माणूंआ ते आरी गे ओर तेस दिने एड़ा बड़ा खून-खराबा ऊआ कि 20,000 इस्राएली सैनिक मरी गे। 8 युद्ध तेस सारे देशो दे फैलीगा ओर तेस दिने जितणे लोक तलवारी साथे मरे, तिना ते बी जादा बणो रिया बजअ ते मरी गे। 9 एड़ा ऊआ कि लड़दे ऊए अबशालोम ओर दाऊदो रे माणूंआ रा आमणा-सामणा ऊआ। अबशालोम तो एकी खच्चरा पाँदे चढ़ी की जाणे लगी रा था कि खच्चर एक बड़े डाल़ो री कणी डाल़िया निठा ते गई ओर तेसरा सिर तेस बड़े डाल़ो रिया पाँगटिया दे फसी गा ओर से अदमँजो दे लटकेया दा रई गा ओर तेसरी खच्चर निकल़ी गी। 10 ये देखी की किने माणूंए योआबो गे बोलेया, "मैं अबशालोम बड़े डाल़ो दे लटकेया दा देखेया।" 11 योआबे बताणे वाल़े खे बोलेया, "तैं ये देखेया! तेबे तैं से तेथी जमीना दे काई की कऊँ नि सेटी ता? तो मां ताखे दस टुकड़े चाँदी ओर एक कटिबन्द देणा था।" 12 तिने माणूंए योआबो खे बोलेया, "चाए मेरे आथो दे 1,000 टुकड़े चाँदिए रे तोली की देई देयो, तेबे बी राजकुमारो रे खलाफ आथ नि बढ़ाणा; कऊँकि आसा लोका रे सुणदे राजे ताखे, ओर अबीशै ओर इत्तै खे ये आज्ञा दित्ती थी, कि तुसा बीचा ते कोई कऊँ नि ओ तेस जवान, मतलब अबशालोमो खे नि छूँणा। 13 जे आऊँ तोखा देई की तेसरे प्राण लई लंदा, तो तूँ आपू मेरा दुश्मण ऊई जाणा था, कऊँकि राजे ते कोई बी गल्ल छिपी दी नि रई सकदी।" 14 योआबे बोलेया, "आऊँ तां साथे ईंयाँ ई रूकेया रा नि रई सकदा!" तेबे तिने तीन लकड़िया आथो दे लई की अबशालोमो रे दिलो दे, जो बड़े डाल़ो दे जिऊँदा लटकी रा था, छेद पाईता। 15 तेबे योआबो रे दस अथियार टोणे वाल़े जवाने अबशालोमो खे केरी की तेसरे एड़ी बाई की से मरी गा। 16 तेबे योआबे रड़सिंगे रे फूकर दित्ती ओर लोक इस्राएली सिपाईया रा पीछा करने ते वापस ऊए, कऊँकि योआब प्रजा खे बचाणा चाओ था। 17 तेबे लोके अबशालोम डाल़ो पाँदा ते थाले उतारी की तेस बणो रे एक बड़े गड्डे दे पाईता ओर तेस पाँदे पात्थरा रा एक बऊत बड़ा टेर लगाई ता ओर सारे इस्राएली सिपाई आपणे-आपणे डेरे खे नठीगे। 18 आपणे जिऊँदे जियूए अबशालोमे ये सोची की कि मेरे नाओं खे याद करने वाल़ा कोई पाऊ मेरे नि ए, आपू खे तिने से खम्बा खड़ा कराया था जो राजे री काअटिया दे ए ओर खम्बे रा आपणा ई नाओं राखेया, जेतेखे आजके दिनो तक अबशालोमो रा खम्बा बोलोए।

अबशालोमो री मौता रा दाऊदो खे सन्देश

19 अबशालोमो रे मरने ते बाद सादोको रे पाऊ अहीमासे बोलेया, "माखे दौड़ी की राजे खे ये सन्देश देणे दे कि यहोवे न्याय करी की तूँ तेरे दुश्मणा रे आथो ते बचाई राखेया।" 20 योआबे तेसखे बोलेया, "तूँ आजके दिने सन्देश नि दे, दूजे दिने सन्देश देई सकेया, पर आज सन्देश नि दे, कऊँकि राजकुमार मरी गा रा।" 21 तेबे योआबे एक कूशी माणूंए खे बोलेया, "जो कुछ तैं देखी राखेया से जाई की राजे गे बताई दे।" तेबे से कूशी योआबो गे माथा टेकी की दौड़ी गा। 22 तेबे सादोको रे पाऊ अहीमासे दूजी बार योआबो ते बोलेया, "जो ओ, सो ओ, पर माखे बी कूशिये पीछे दौड़ने दे।" योआबे बोलेया, "ओ मेरे पाऊ, तेरे सन्देशो रा कोई बदला नि मिलणा, तेबे तूँ कऊँ दौड़ना चाएया?" 23 तिने ये बोलेया, "जो ओ, सो ओ, पर माखे दौड़ने दे।" तिने तेसखे बोलेया, "ठीक ए, दाऊदो गे दौड़ी की जा।" तेबे अहीमास दौड़ेया ओर काअटिया ते ऊई की कूशिये ते आगे चलीगा। 24 दाऊद तो दूई बड़े द्वारा बीचे बैठी रा था कि पईरेदार जो बड़े द्वारो रे छतो ते दवाला पाँदे चढ़ीगा था, तिने आखी चकी की क्या देखेया कि एक माणूं कल्ला दौड़ी की आऊणे लगी रा। 25 जेबे पईरेदारे आका पाई की राजे गे ये बताईता, तेबे राजे बोलेया, "जे कल्ला आऊणे लगी रा तो खरा ई सन्देशा लई की आऊणे लगी रा ऊणा।" से दौड़दे-दौड़दे निकल़ी की आया। 26 तेबे पईरेदारे एक ओर माणूं दौड़दा ऊआ देखी की बड़े द्वारो रे रखवाल़े खे आका पाई की बोलेया, "सुण, एक ओर माणूं कल्ला दौड़ी की आऊणे लगी रा।" राजे बोलेया, "से बी खरा ई सन्देशा ल्याऊणे लगी रा ऊणा।" 27 पईरेदारे बोलेया, "माखे तो एड़ा लगोआ कि जो पईले दौड़ी की आऊणे लगी रा, से सादोको रे पाऊ अहीमासो जेड़ा ए।" राजे बोलेया, "से तो पला माणूं ए, तो खरा सन्देशा ल्याओ ऊणा।" 28 जेबे अहीमासे आका पाई की राजे खे बोलेया, "सारे ठीक ए।" तेबे तिने मुंए रे पारे जमीना दे पड़ी की राजे गे माथा टेकी की बोलेया, "तेरा यहोवा परमेशर तन्य ए, जिने मेरे प्रभु राजे रे खलाफ आथ उठाणे वाल़ा माणूं तेरे वशो दे करी ता!" 29 राजे पूछेया, "क्या से जवान अबशालोम ठीक ए।" अहीमासे बोलेया, "जेबे योआबे राजे रा कर्मचारी ओर तेरा दास पेजीता, तेबे माखे बऊत बड़ी पीड़ दिखी, पर पता नि लगेया कि क्या ऊई रा था।" 30 राजे बोलेया, "अटी की एथी खड़ा रओ।" तेबे से अटी की खड़ा रया। 31 तेबे कूशी माणूं बी आई गा ओर कूशी बोलणे लगेया, "मेरे प्रभु राजे खे सन्देश ए। यहोवे आज न्याय करी की तूँ तेरे सारे दुश्मणा ते बचाई राखेया जो तेरे खलाफ उठे थे।" 32 राजे कूशी माणूंए ते पूछेया, "क्या से जवान मतलब अबशालोम ठीक ए?" कूशिये बोलेया, "मेरे प्रभु राजे रे दुश्मण ओर जितणे लोक तेरा नुकशाण करने खे आए थे, तिना री दशा तेस जवानो री जी ओ।" 33 तेबे राजा बऊत डरीगा ओर बड़े द्वारो पाँदले कमरे दे रोंदा ऊआ चढ़ने लगेया ओर चलदे-चलदे ईंयाँ बोलदा गया, "हाय मेरे पाऊ अबशालोम! मेरे पाऊ, हाय! मेरे पाऊ अबशालोम! पला ऊँदा कि आऊँ आपू तेरे बदले मरदा, हाय! अबशालोम! मेरे पाऊ, मेरे पाऊ!"