1 तेस बखते शाऊलो रे कराने ओर दाऊदो रे कराने बीचे बऊत दिना तक लड़ाई ऊँदी रई, पर दाऊद शक्तिशाली ऊँदा गया ओर शाऊलो रा कराना कमजोर ऊँदा गया।

2 हेब्रोन शईरो दे दाऊदो रे यो पाऊ पैदा ऊए; तेसरा जेठा पाऊ अम्नोन था, जो यिज्रेल शईरो री अहीनोअम जवाणसा ते पैदा ऊआ था; 3 ओर तेसरा दूजा पाऊ किलाब था, जेसरी माये कर्मेल शईरो रे नाबालो री बिदुआ लाड़ी अबीगैल थी; तीजा अबशालोम, जो गशूर प्रदेशो रे राजा तल्मै री बेटी माका ते पैदा ऊआ था। 4 चौथा अदोनिय्याह, जो हग्गीता ते पैदा ऊआ था, पाँजुआ शपत्याह, जेसरी माये अबीतल थी; 5 छठुआ यित्राम, जो एग्ला नाओं री दाऊदो री जवाणसा ते पैदा ऊआ। हेब्रोनो दे दाऊदो ते यो ई ल्वादा पैदा ऊईया।

6 जेस बखते शाऊल ओर दाऊदो रे परिवारो बीचे लड़ाई ऊणे लगी री थी, अब्नेरे आपू खे शाऊलो री सेना दे तागतबर बणाई ला था। 7 शाऊलो री एक रखैल थी जेसा रा नाओं रिस्पा था, से अय्या री बेटी थी; ओर ईशबोशेते अब्नेरो ते पूछेया, "तूँ मेरे बाओ री रखैला गे कऊँ गया?" 8 ईशबोशेतो री एसा गल्ला रिया बजअ ते अब्नेर बऊत गुस्से ऊई की बोलणे लगेया, "क्या तूँ सोचेया कि आऊँ यहूदा प्रदेशो दे एकी कुत्ते जेड़ा ए, जो आपणे स्वामिये रे खलाफ काम करोआ? आजो तक आऊँ तेरे बाओ शाऊलो रे कराने, ओर तेसरे पाई ओर दोस्ता साथे प्यार दखांदा आई रा ओर तूँ दाऊदो रे आथो दे पड़ने नि दित्तेया; तेबे तूँ एबे मां पाँदे तेसा जवाणसा रे बारे दे दोष लगाणे लगी रा? 9 जे आऊँ दाऊदो साथे परमेशरो री कसमा रे मुताबिक बर्ताव नि करुँ, तो परमेशर अब्नेरो साथे तेड़ा ई, बल्कि तिजी ते बी जादा करो; 10 मतलब मां राज्य शाऊलो रे कराने ते छुड़ाणा ओर दाऊदो री राजगद्दी उतर दिशा दे दान शईरो रे इलाके ते लई की दक्खणा दे बेर्शेबा शईरो तक इस्राएल ओर यहूदा तक स्थिर करनी।" 11 तेबे ईशबोशेत अब्नेरो खे कोई ज्वाब नि देई सकेया, कऊँकि से तेसते डरो था।

12 तेबे अब्नेरे तेसरे नाओं ते दाऊदो गे दूता ते सन्देशा पेजेया, "देश केसरा ए?" ओर ये बी सन्देशा पेजेया, "तूँ मांते वादा कर ओर मां तेरी मताद करनी, ताकि सारे इस्राएली लोका रे मन तेरी तरफा खे फेरी दूँ।" 13 दाऊदे बोलेया, "खरा ए, आऊँ तांते वादा तो करूँआ, पर आऊँ तांते एक गल्ल चाऊँआ; कि जेबे तूँ मां साथे मिलणे आओ, तेबे तूँ पईले शाऊलो री बेटी मीकला खे आपू साथे लई की आओ, तेबे तूँ मां साथे मिली सकोआ।" 14 तेबे दाऊदे शाऊलो रे पाऊ ईशबोशेतो गे दूता ते ये सन्देशा पेजेया, "मेरी लाड़ी मीकल, जो मैं 100 पलिश्तिया खे काई की तिना रिया खलड़िया देई की आपणी बणाई ली थी, तेसा खे माखे देई दे।"

15 तेबे ईशबोशेते लोका खे पेजी की से लैशो रे पाऊ पलतीएलो ते छुड़ाई ली। 16 ओर तेसा रा लाड़ा तेसा साथे चलेया ओर बहूरीमो तक तेसा पीछे रोंदा ऊआ चली गा। तेबे अब्नेरे तेसखे बोलेया, "कअरो खे वापस ऊई जा;" ओर से वापस ऊईगा। 17 तेबे अब्नेरे इस्राएली लोका रे बुजुर्गा साथे एड़ी गल्ल कित्ती, "पईले तो तुसे लोक चाओ थे कि दाऊद आसा पाँदे राजा ओ। 18 एबे तेड़ा ई करो; कऊँकि यहोवे दाऊदो रे बारे दे ये बोली राखेया कि मां आपणे दास दाऊदो रे जरीये आपणी इस्राएली प्रजा पलिश्तिया, बल्कि तिना रे सारे दुश्मणा रे आथो ते छुड़ाणी।" 19 तेबे अब्नेरे बिन्यामीनो साथे बी गल्ल बात कित्ती; तेबे अब्नेर हेब्रोनो खे चली गा, ताकि इस्राएल ओर बिन्यामीनो रे सारे कराने खे जो कुछ अच्छा लगेया, से दाऊदो खे सुणाओ। 20 तेबे अब्नेर बीइ मर्दा खे साथे लई की हेब्रोनो दे आया ओर दाऊदे तेसखे ओर तेस साथले मर्दा खे रोटी बणाई। 21 तेबे अब्नेरे दाऊदो खे बोलेया, "मां उठी की जाणा ओर आपणे प्रभु राजे गे सारे इस्राएली कट्ठे करने, ताकि सेयो तां साथे वाचा बानो ओर तूँ आपणी इच्छा रे मुताबिक राज करी सके।" तेबे दाऊदे अब्नेर बिदा कित्तेया ओर से रामो दे चली गा।

22 तेते ते बाद छोड़ ई दाऊदो रे कई जणे योआबो साथे केथी चढ़ाई करी की बऊत सारी लूट लई की आईगे। ओर अब्नेर दाऊदो गे हेब्रोनो दे नि था, कऊँकि तिने से बिदा करी ता था ओर से रामो दे चली गा था। 23 जेबे योआब ओर तेस साथली सारी सेना आई, तेबे लोके योआबो खे बोलेया, "नेरो रा पाऊ अब्नेर राजे गे आया था ओर तिने से बिदा करी ता ओर से रामो दे चली गा।" 24 तेबे योआबे राजे गे जाई की बोलेया, "तैं ये क्या करी राखेया? अब्नेर जो तांगे आया था, तो क्या बजअ ए कि तैं से फेर जाणे दित्तेया ओर से चली गा? 25 तूँ नेरो रे पाऊ अब्नेरो खे तो जाणेया कि से ताखे तोखा देणे, ओर तेरे आऊणे-जाणे ओर सारे कामो रा पेत लणे आई रा था।"

26 योआबे दाऊदो गे ते निकल़ी की अब्नेरो पीछे दूत पेजे ओर सेयो तेसखे सीरा नाओं रे कुएँ ते वापस ली आए। पर दाऊदो खे एते गला रा पता नि था। 27 जेबे अब्नेर हेब्रोनो खे वापस आया, तेबे योआब तेस साथे कल्ले जे गल्ला करने खे तेसखे बड़े द्वारो ते पीतरे लग जे लईगा ओर तेती आपणे पाई असाहेलो रे खूनो रे बदले तेसरे पेटो दे एड़ी बाई कि से मरी गा। 28 इजी ते बाद जेबे दाऊदे ये सुणेया, तेबे बोलेया, "नेरो रे पाऊ अब्नेरो रे खूनो रे बारे दे आऊँ आपणी प्रजा समेत यहोवे री नजरा दे सदा निर्दोष रणा। 29 से योआब ओर तेसरे बाओ रे सारे कराने खे लगो ओर योआबो रे कुलो दे कोई ना कोई प्रमेह रा रोगी, ओर कोढ़ी, ओर लंगड़ा जो बसाखिये की चलणा, ओर तलवारी साथे मरने वाल़ा ओर पूखा मरने वाल़ा सदा ऊँदा रओ।" 30 योआब ओर तेसरे पाई अबीशै अब्नेरो री इजी बजअ ते अत्या कित्ती थी, कऊँकि तिने तिना रा पाई असाहेल गिबोनो दे लड़ाईया रे बखते काया था।

31 तेबे दाऊदे योआब ओर आपू साथले सारे लोका खे बोलेया, "आपणे टाल्ले फाड़ो ओर लको दे टाट बानी की अब्नेरो री लाशा ते आगे-आगे चलो।" ओर दाऊद राजा आपू लाशा ते पीछे-पीछे चलेया। 32 अब्नेर हेब्रोनो दे दबाईता ओर राजा अब्नेरो री कब्रा गे फूटी-फूटी की रोणे लगेया ओर सारे लोक बी रोए। 33 तेबे राजा दाऊदे अब्नेरो रे बारे दे ये दु:ख देणे वाल़ा गीत बणाया,

"क्या ये सई था कि अब्नेर मूर्खो जेड़ा मरो?

34 ना तो तेरे आथ बाने गये ओर ना ई तेरे पैरो दे बेड़िया पाई राखी थिया; जेड़ा कोई बुरे माणूंए रे आथो ते काया जाओ। तेड़ा ई तूँ काया।"

तेबे सारे लोक तेसरे बारे दे फेर रोणे लगे। 35 तेबे सारे लोक दिने ई दाऊदो खे रोटी खुलाणे खे आए, पर दाऊदे कसम खाई की बोलेया, "जे आऊँ सूरज डूबणे ते पईले रोटी या कोई ओर चीज खाऊँ, तो परमेशर मां साथे एड़ा ई, बल्कि इजी ते बी जादा करो।" 36 सारे लोके इजी रे बारे दे सोचेया ओर इजी ते खुश ऊए, तेड़े ई जो कुछ राजा करो था तिजी ते सारे लोक खुश ओ थे। 37 तेबे तिने सारेया लोके, बल्कि सारे इस्राएलिये बी तेसी दिने जाणी ला कि नेरो रे पाऊ अब्नेरो खे काणा राजे रिया तरफा ते नि था। 38 राजे आपणे कर्मचारिया खे बोलेया, "क्या तुसे लोक नि जाणदे कि इस्राएलो दे आजके दिने एक परदान ओर प्रतापी माणूं मरी रा? 39 जेबे की आऊँ अभिषिक्त राजा ए, तेबे बी आज आऊँ कमजोर ए ओर सेयो सरूयाह रे पाऊ मांते जादा तागतबर ए। पर यहोवा बुराई करने वाल़े खे तेसरी बुराईया रे मुताबिक ई बदला देयो।"