2 सेमुएल 15

अबशालोमो रा बरोद

1 कुछ बखतो ते बाद अबशालोमे रथ ओर कोड़े ओर आपू ते आगे-आगे दौड़ने वाल़े पंजा माणूं राखी ते। 2 अबशालोम प्यागा छोड़ उठी की बड़े द्वारो रे नेड़े बाटा दे खड़ा ओया करो था ओर जेबे-जेबे कोई दावा करने वाल़ा राजे गे न्याय मांगणे खे आओ था तेबे अबशालोम तेसते आका पाई की पूछो था, "तूँ केस शईरो ते ओर केस गोत्रो ते आई रा?" ओर से बोलो था, "तेरा दास इस्राएलो रे अमुक गोत्रो राए।" 3 तेबे अबशालोम तेसखे बोलो था, "सुण, तेरा पक्ष ठीक ओर न्याय राए; पर राजे रिया तरफा ते कोई बी तेरी सुणने वाल़ा नि ए।" 4 तेबे अबशालोम ये बी बोलेया करो था, "पला ऊँदा कि माखे एते देशो रा न्यायी ठरांदे! ताकि जितणे मुकद्दमे वाल़े ऊँदे सेयो सारे मांगे ई आऊँदे ओर आऊँ तिना रा न्याय करदा।" 5 फेर जेबे कोई तेसगे माथा टेकणे खे नेड़े आओ था, तेबे से आथ बढ़ाई की तेसखे पकड़ी की चूम्मो था। 6 जितणे इस्राएली लोक राजे गे आपणा मुकद्दमा लई की आओ थे तिना सबी साथे अबशालोम एड़ा ई करो था; ईंयाँ अबशालोमे इस्राएली माणूंआ रा मन आपणिया तरफा खे फेरी ला था। 7 चार साल बीतणे ते बाद अबशालोमे राजे गे जाई की बोलेया, "माखे हेब्रोन शईरो दे जाई की आपणी तेसा मान्नता खे पूरी करने दे, जो मैं यहोवे री मानी राखी। 8 तेरा दास तो जेबे अरामो रे गशूर शईरो दे रओ था, तेबे ये बोली की यहोवे री मान्नत मानी, कि जे यहोवा सच्ची माखे यरूशलेम शईरो खे वापस ली आओ, तो मां यहोवे री सेवा हेब्रोन शईरो दे करनी।" 9 राजे तेसखे बोलेया, "शान्तिया दे जा।" ओर से उठी की हेब्रोन शईरो खे गया। 10 जेबे से तेती था तेबे अबशालोमे इस्राएलो रे सारे गोत्रा बीचे ये बोलणे खे पेतिए पेजे, "जेबे तुसा खे रड़सिंगे रे बजणे री आवाज सुणो, तेबे बोलणा कि अबशालोम हेब्रोनो दे राजा ऊआ।" 11 अबशालोमो साथे दो सौ बुलाए दे लोक यरूशलेम शईरो ते गये; सेयो सीदे मनो ते तेसरा पेत बिना जाणे ई गये। 12 जेबे अबशालोमो रा यज्ञ ऊआ, तेबे तिने गीलो दे रणे वाल़े अहीतोपेलो खे, जो दाऊदो रा मंत्री था, सन्देशा पेजेया कि से आपणे गीलो शईरो ते आओ। ओर राजद्रोहिया री मण्डल़ी तागतबर ऊँदी गई, कऊँकि अबशालोमो खे मानणे वाल़े लोक लगातार बढ़दे गये।

दाऊदो रा यरूशलेम शईरो ते नठणा

13 तेबे किने दूते दाऊदो गे जाई की ये सन्देश दित्तेया, "इस्राएली माणूंआ रे मन अबशालोमो रिया तरफा खे ऊईगे रे।" 14 तेबे दाऊदे आपणे सारे काम करने वाल़ेया ते जो यरूशलेम शईरो दे तेस साथे थे बोलेया, "आओ, आसे नठी जाऊँए; नई तो आसा बीचा ते कोई बी अबशालोमो ते नि बचणा, इजी री खातर फटाफट चलो, एड़ा नि ओ कि से फटाफट आई की आसा खे केरी देयो ओर आसा रा नुकशाण करो ओर एस शईरो रे लोका खे तलवारी की काई देयो।" 15 राजे रे काम करने वाल़ेया तेसखे बोलेया, "जेड़ा म्हारे प्रभु राजे खे ठीक लगो, तेड़ा ई करने खे तेरे दास त्यार ए।" 16 तेबे राजा निकल़ी गा ओर तेस साथे तेसरा सारा कराना निकल़ी गा। राजे दस रखैलिया मईलो री चौकसी करने खे छाडी तिया। 17 तेबे राजा निकल़ी गा ओर तेस पीछे सारे लोक निकल़ी गे ओर सेयो बेतमेर्हको दे जाई की रूकी गे। 18 तेसरे सारे कर्मचारी तेसगे ते ऊई की आगे निकल़ी गे ओर सारे करेती, ओर सारे पलेती ओर सारे गत शईरो रे, मतलब जो 600 मर्द गतो ते तेस पीछे चले थे सेयो सारे राजे रे सामणे ते ऊई की आगे चली गे। 19 तेबे राजे गती इत्तै ते पूछेया, "तूँ आसा साथे कऊँ चलणे लगी रा? वापस ऊई की अबशालोम राजे गे रओ; कऊँकि तूँ परदेशी ओर आपणे देशो ते दूर ए, इजी री खातर आपणी जगा खे वापस ऊई जा। 20 तूँ तो काल ई आई रा, क्या आऊँ आज ताखे आपू साथे मारा-मारा फिराऊँ? आऊँ तो जेती केथी जाई सकूँआ, तेती जाणा। तूँ वापस ऊई जा ओर आपणे पाईया खे बी लई जा; परमेशरो री दया ओर सच्चाई तां साथे सदा रओ।" 21 इत्तै राजे खे ज्वाब दित्तेया, "यहोवे री जिन्दगिया री कसम ओर मेरे प्रभु राजे री जिन्दगिया री कसम, जेती केसी जगा दे मेरा प्रभु राजा रओगा, चाए मरने खे ओ, चाए जिऊणे खे, तेसा ई जगा दे तेरा दास बी रणा।"

22 तेबे दाऊदे इत्तै खे बोलेया, "मां साथे किद्रोन नाल़े ते पार चल।" तेबे गती इत्तै आपणे सारे माणूंआ ओर आपू साथले सारे बाल-बच्चेया समेत किद्रोन नाल़े ते पार चली गा। 23 सारे रणे वाल़े जोरे-जोरे की रोए ओर सारे लोक किद्रोन नाल़े ते पार ऊईगे, ओर राजा बी किद्रोन नाओं रे नाल़े ते पार ऊआ ओर सारे लोक नाल़े ते पार जंगल़ो रिया बाटा रिया तरफा खे पार ऊई की चली पड़े। 24 तेबे तिने क्या देखेया कि सादोक पुरोईत बी तेती था ओर तेस साथले सारे लेविये बी परमेशरो री वाचा रा सन्दूक चकी की आऊणे लगी रे ओर तिने परमेशरो रा सन्दूक थाले राखी ता, तेबे एब्यातार पुरोईत तदुए तक बलि चढ़ांदा रया जदुओ तक सारे लोक शईरो ते बारे नि निकल़ी गे। 25 तेबे राजे सादोको खे बोलेया, "परमेशरो रे सन्दूको खे शईरो दे वापस लई जा। जे यहोवे री दया री नजर मां पाँदे ओ, तेबे तेस आऊँ वापस निणा ओर आपणे रणे री जगा बी दखाणी; 26 पर जे से माखे एड़ा बोलो, ‘आऊँ तांते खुश नि ए,’ तेबे बी आऊँ आजीर ए, जेड़ा तेसखे अच्छा लगो से तेड़ा ई मां साथे बर्ताव करो।" 27 तेबे राजे सादोक पुरोईतो खे बोलेया, "क्या तूँ दर्शी नि ए? मेरी योजना ये कि तूँ तो रामो दे शईरो दे वापस ऊई जा ओर तेरा पाऊ अहीमास ओर एब्यातारो रा पाऊ योनातान, दोनो तां साथे शईरो खे चली जाओ। 28 सुणो, मां जंगल़ो रे काटो तक तदुओ तक रूके दे रणा, जदुओ तक तुसा लोका ते माखे कोई सन्देश नि मिलो।" 29 तेबे सादोक ओर एब्यातारे परमेशरो रा सन्दूक यरूशलेम शईरो खे वापस करी ता ओर आपू तेथी रये।

दाऊद ओर हूशै

30 तेबे दाऊद तिना साथे जो तेस साथे गये, जैतूनो रे पाह्ड़ो पाँदे सिर टखी की, नांगे पैरे, रोंदा ऊआ चढ़ने लगेया ओर जितणे लोक तेस साथे थे, सेयो बी सिर टखी की रोंदे ऊए चढ़ीगे। 31 तेबे दाऊदो खे ये सन्देश मिलेया, "अबशालोमो साथले राजद्रोहिया साथे अहीतोपेल ए।" दाऊदे बोलेया, "ओ यहोवा, अहीतोपेलो री सला खे मूर्खता बणाई दे।" 32 जेबे दाऊद चूँडिया तक पऊँचेया, जेती से परमेशरो री आराधना करने खे जाया करो थे, तेबे एरेकी हूशै चोगा फाड़ी की, सिरो पाँदे स्वा मल़ी की तेस साथे मिलणे खे आया। 33 दाऊदे तेसखे बोलेया, "जे तूँ मां साथे आगे जाएगा, तेबे तो मेरिया तँईं बोज ऊणा, 34 पर जे तू शईरो खे वापस ऊई की अबशालोमो खे बोलणे लगे कि ओ राजा, आऊँ तेरा दास ए, जेड़ा आऊँ बऊत दिना तक तेरे बाओ रा दास रया, तेड़ा ई एबे तेरा रऊँगा, तेबे तूँ मेरे फायदे रिया तँईं अहीतोपेलो रिया सला खे निष्फल करी सकेया। 35 ओर तेती तां साथे सादोक ओर एब्यातार पुरोईत रणे। इजी री खातर राजमईलो बीचा ते जो आल ताखे सुणो, से सादोक ओर एब्यातार पुरोईतो गे बताया करना। 36 तिना साथे तो दो तिना रे पाऊ, मतलब सादोको रा पाऊ अहीमास ओर एब्यातारो रा पाऊ योनातान, तेती रणे; तेबे जो सन्देश तुसा लोका खे मिलो से मांगे तिना रे आथो देई पेजेया करना।" 37 तेबे दाऊदो रा दोस्त हूशै शईरो खे गया ओर तेस ई बखते अबशालोम बी यरूशलेम शईरो दे पऊँची गा।