2 सेमुएल 2

दाऊदो रा यहूदा प्रदेशो पाँदे राजा बणना

1 इजी ते कुछ बखतो बाद दाऊदे यहोवे ते पूछेया, "क्या आऊँ यहूदा रे केसी शईरो दे रणे खे जाऊँ?" यहोवे तेसखे बोलेया, "आ, चली जा।" दाऊदे फेर पूछेया, "कुण जे शईरो दे जाऊँ?" यहोवे ज्वाब दित्तेया, "हेब्रोन शईरो दे चली जा।" 2 तेबे दाऊद यिज्रेल शईरो रे अहीनोअम ओर कर्मेल शईरो रे नाबालो री जवाणस अबीगैल नाओं री, आपणी दुँईं लाड़िया समेत तेथी गया। 3 दाऊद आपणे साथिया खे बी एकी-एकी रे कराने समेत तेथी लईगा ओर सेयो सब हेब्रोन शईरो रे गाँवो दे रणे लगे।

4 तेबे यहूदी लोक हेब्रोनो खे गये ओर तिना बीचा ते किने एकी जणे तेथी दाऊदो रा अभिषेक कित्तेया, कि से यहूदा रे कराने रा राजा ओ। जेबे दाऊदो खे ये सन्देश मिलेया कि जिने शाऊलो खे माट्टी दित्ती थी सेयो गिलाद इलाके रे याबेश शईरो रे लोक ए। 5 तेबे दाऊदे दूता गे गिलाद इलाके रे याबेश शईरो रे लोका गे ये सन्देशा पेजेया, "यहोवे री आशीष तुसा पाँदे ओ, कऊँकि तुसे आपणे प्रभु शाऊलो पाँदे कृपा करी की से दबाया। तेसखे माट्टी दित्ती। 6 इजी री खातर एबे यहोवा तुसा साथे कृपा ओर सच्चाईया रा बर्ताव करो ओर मां बी तुसा री एसा पलाईया रा बदला तुसा खे देणा, कऊँकि तुसे ये काम जो शाऊलो साथे कित्तेया। 7 एबे ईम्मत करो ओर मजबूत बणो, कऊँकि तुसा रा राजा शाऊल मरी गा ओर यहूदा रे कराने आपू पाँदे राजा ऊणे खे मेरा अभिषेक करी राखेया।"

ईशबोशेत इस्राएलो रा राजा

8 जेबे ये सब ऊणे लगी रा था तेस ई बखते नेरो रा पाऊ अब्नेर जो शाऊलो रा परदान सेनापति था, तिने शाऊलो रा पाऊ ईशबोशेत आपू साथे लया ओर यरदन नदिया ते पार महनैम शईरो खे चली गा; 9 ओर तेते जगा दे अब्नेरे ईशबोशेत गिलाद प्रदेशो रा राजा बणाया, ओर अशूरिया रे देश, यिज्रेल, एप्रैम, बिन्यामीन, बल्कि सारे इस्राएल प्रदेशो पाँदे राजा नियुक्त करी ता।

10 शाऊलो रा पाऊ ईशबोशेत चाल़िया साला रा था जेबे से इस्राएलो पाँदे राज करने लगेया ओर दो साला तक राज करदा रया। पर यहूदा रा कराना दाऊदो रे पक्षो दे था। 11 ओर दाऊदो रा हेब्रोनो दे यहूदा रे कराने पाँदे राज करने रा बखत साढ़े सात साल था।

यहूदा ओर इस्राएलो बीचे युद्ध

12 एक दिन नेरो रा पाऊ अब्नेर ओर शाऊलो रे पाऊ ईशबोशेतो रे लोक, महनैमो ते गिबोन शईरो दे आए। 13 तेबे सरूयाह रा पाऊ योआब ओर दाऊदो रे माणूं, हेब्रोनो ते निकल़ी की तिना साथे गिबोनो रे पोखरे गे मिले ओर दोनो दल तेस पोखरे गे एकी-एकी कनारे खे बैठीगे। 14 तेबे अब्नेरे योआबो खे बोलेया, "जवान लोक उठी की आसा सामणे लड़ो।" योआबे बोलेया, "सेयो उठो।" 15 तेबे सेयो उठे ओर बिन्यामीन गोत्र, मतलब शाऊलो रे पाऊ ईशबोशेतो रे पक्षो खे बारा जणे गिणी की निकल़े ओर दाऊदो रे लोका बीचा ते बी बारा निकल़े। 16 ओर तिने एकी-दूजे रा सिर पकड़ी की आपणी-आपणी तलवार एकी-दूजे रिया छड़िया दे कूसायी ती ओर सेयो एकी साथे ई मरी गे। इजी ते तेसा जगा रा नाओं "हेल्कथस्सूरीम"*2:16 "हेल्कथस्सूरीम" तेज तलवारी रा डोरू पड़ेया, से जगा गिबोनो दे ए।

असाहेलो री मौत

17 तेस दिने बड़ा खतरनाक युद्ध ऊआ ओर अब्नेर ओर इस्राएलो रे लोक दाऊदो रे माणूंआ ते आरी गे। 18 तेस दिने तेथी तो योआब, अबीशै ओर असाहेल नाओं रे सरूयाह रे तीनो पाऊ थे ओर असाहेल बणो रे ईरणो जेड़ा तेज दौड़ने वाल़ा था। 19 तेबे असाहेल अब्नेरो रा पीछा करने लगेया ओर तेसरा पीछा करदे ऊए ना तो दाँणे मुड़ेया ना खूँजे। 20 अब्नेरे पीछे फिरी की पूछेया, "क्या तूँ असाहेल ए?" तिने बोलेया, "आ, आऊँ सेईए।" 21 अब्नेरे तेसखे बोलेया, "चाए तूँ दाँणे, चाए खूँजे मुड़, केसी जवानो खे पकड़ी की तिना रा कवच लई लो।" पर असाहेले तेसरा पीछा करना नि छाडेया। 22 अब्नेरे असाहेलो खे फेर बोलेया, "मेरा पीछा छाडी दे; मां तूँ काई की माट्टिया दे कऊँ मलाणा? एड़ा करी की मां तेरे पाई योआबो गे आपणा मूँ किंयाँ दखाणा?" 23 तेबे बी तिने आटणे ते ना कित्ती; तेबे अब्नेरे आपणे भाल़े री पिछाड़ी तेसरे पेटो दे एड़ी बाई कि भाल़ा दूजे कनारे पिट्ठी दे निकल़ी गा ओर से तेथी रूड़ी की मरी गा ओर जितणे लोक तेते जगा दे आए जेती असाहेल रूड़ी की मरी गा, तेती सेयो सारे खड़े रये।

अब्नेर ओर योआब

24 पर योआब ओर अबीशै अब्नेरो रा पीछा करदे रये ओर सूरजो रे डूबदे-डूबदे सेयो अम्माह नाओं री तेसा पाह्ड़िया तक पऊँचे, जो गिबोनो रे जंगल़ो री बाटा रे गीह रे सामणे ए। 25 ओर बिन्यामीनी अब्नेरो पीछे ऊई की एक दल ऊईगे ओर एक पाह्ड़िया री चूँडिया पाँदे खड़े ऊए।

26 तेबे अब्नेर योआबो खे जोरे की आका पाई की बोलणे लगेया, "क्या तलवार सदा कांदी रओ? क्या तूँ नि जाणदा इजी रा फल दु:ख ई देणे वाल़ा ऊणा? तां कदुओ तक आपणे लोका खे आज्ञा नि देणी कि आपणे इस्राएली पाईया रा पीछा छाडी की वापस आओ?" 27 योआबे बोलेया, "परमेशरो री जिन्दगिया री कसम जे तूँ नि बोलदा तेबे लोक पक्का प्यागा ई चली जाणे थे ओर आपणे-आपणे इस्राएली पाईया रा पीछा नि करना था।" 28 तेबे योआबे रड़सिंगे दे फूकर दित्ती ओर सारे लोक रूकी गे ओर तेबे इस्राएली लोका रा पीछा नि कित्तेया ओर फेर लड़ाई नि कित्ती। 29 तेसा ई राती अब्नेर आपणे माणूंआ समेत तेस ई दिने रातोरात अराबा ते ऊई की गया; ओर यरदन नदिया ते पार सारे बित्रोन देशो रिये ऊई की महनैमो दे पऊँचेया।

30 योआब ओर तेसरे सिपाई अब्नेरो रा पीछा छाडी की वापस ऊए ओर जेबे तिने सारे लोक कट्ठे कित्ते, तेबे क्या देखेया कि दाऊदो रे माणूंआ बीचा ते उन्नी मर्द ओर असाहेल पनि ए। 31 पर दाऊदो रे माणूंए बिन्यामीनी ओर अब्नेरो रे माणूं एड़े काये कि तिना बीचा ते 360 जणे मरी गे। 32 योआबो रे कुछ सिपाईए असाहेलो री लाशा खे चकी की तेसरे बाओ रे कब्रिस्तानो दे, जो बेतलेहमो दे थी, तेथी दबाईता। तेबे योआब आपणे माणूंआ समेत पूरी रात चली की प्याग ऊणे तक हेब्रोनो दे पऊँचेया।