2 सेमुएल 10

दाऊदो रा अम्मोनिया खे अराणा

1 कुछ बखतो ते बाद अम्मोनिया रा राजा नाहाश मरी गा ओर तेसरा हानून नाओं रा पाऊ तेसरी जगा पाँदे राजा ऊआ। 2 तेबे दाऊदे ये सोचेया, "जिंयाँ हानूनो रे बाओ नाहाशे मां साथे दया दखाई राखी थी, तिंयाँ ई मां बी हानूनो साथे दया दखाणी।" तेबे दाऊदे आपणे कई काम करने वाल़ेया खे तेसगे तेसरे बाओ री मौता रे बारे दे शान्ति देणे खे पेजी ते। ओर दाऊदो रे काम करने वाल़े अम्मोनिया रिया जमीना पाँदे आए। 3 पर अम्मोनिया रे परदान आपणे स्वामी हानूनो खे बोलणे लगे, "दाऊदे जो तांगे शान्ति देणे वाल़े पेजी राखे, सेयो क्या तेरी समजा ते तेरे बाओ री इज्जत करने रे बिचारो ते पेजी राखे? ना, दाऊदे सेयो तांगे एते बिचारो ते पेजी राखे कि एते शईरो दे टोल़-टाल़ करी की ओर इजी रा पेत लई की इजी पाँदे अमला करो।" 4 तेबे हानूने दाऊदो रे काम करने वाल़े पकड़ी ते ओर तिना री आदी-आदी दाढ़ी कटवाई की ओर टाल्ले लको ते लई की जानूआ तक बडाई की सेयो जाणे दित्ते।

5 जेबे एते गल्ला रा पता दाऊदो खे लगेया तेबे तिने कुछ लोक तिना साथे मिलणे खे पेजे, कऊँकि सेयो राजे रे सामणे आऊणे ते बऊत शर्माणे लगी रे थे ओर सेयो वापस कअरे नि जाणा चाओ थे। तेबे राजे ये बोलेया, "जदुओ तक तुसा री दाढ़ी बढ़ी नि जाओ, तदुओ तक यरीहो देई रूके दे रओ, तेबे वापस आई जाएयो।"

6 जेबे अम्मोनिये देखेया कि दाऊद आसा रा दुश्मण बणी गा दा ए, तेबे अम्मोनिये बेत्रहोब ओर सोबा रे 20,000 अरामी*10:6 अरामी सीरिया सिपाई, ओर माका रे राजे रे 1,000 सिपाई, ओर 12,000 तोब शईरो ते सिपाई, त्याड़िया पाँदे बुलवाए। 7 ये सुणी की दाऊदे योआब ओर शूरवीरा री सारी सेना लड़ने खे पेजी। 8 तेबे अम्मोनी सिपाई निकल़े ओर बड़े द्वारो गेई खड़ी गे ओर सोबा ओर रहोबो रे अरामी ओर तोब ओर माका रे सिपाई तिना ते लग मैदानो दे थे। 9 जेबे योआबे ये देखेया कि आसा रे आगे-पीछे दुँईं तरफा खे म्हारे खलाफ सेना खड़ी री तेबे तिने आपणे सारे बड़े-बड़े इस्राएली सिपाईया बीचा ते बऊत सारे छाँटी की अरामिया रे सामणे लड़ने खड़े करीते, 10 ओर बाकी सैनिक आपणे पाई अबीशै रे आथो दे सम्बाल़ीते ताकि सेयो अम्मोनिया साथे लड़ने खे त्यार रओ।

11 तेबे योआबे तेसखे बोलेया, "जे अरामी सिपाई मां पाँदे जितणे लगो, तेबे तैं मेरी मताद करनी ओर जे अम्मोनी ताखे अराणे लगो, तो मां आई की तेरी मताद करनी। 12 तूँ याओ बान ओर आसा आपणे लोका खे ओर आपणे परमेशरो रे शईरो रिया तँईं लड़ना चाईयो ओर यहोवा जेड़ा तेसखे अच्छा लगो तेड़ा ई करो।"

13 तेबे योआब ओर जो सिपाई तेस साथे थे अरामिया साथे लड़ने खे नेड़े गए ओर अरामी सिपाई तिना सामणे ते नठीगे। 14 ये देखी की कि अरामी नठीगे रे अम्मोनी सिपाई बी अबीशै रे सामणे ते नठी की शईरो ते पीतरे कूसी गे। तेबे योआब अम्मोनिया गे ते वापस ऊई की यरूशलेम शईरो खे आया। 15 तेबे ये देखी की कि आसे इस्राएली लोका ते आरी गे रे सारे अरामी कट्ठे ऊए। 16 तिना रे राजा हदादेजेरे दूत पेजी की फरातो ते पारले अरामी सिपाई बुलाए ओर सेयो हदादेजेरो रे सेनापति शोबको खे आपणा परदान बणाई की हेलाम शईरो खे आए। 17 जेबे दाऊदो खे इजी रा पता लगेया तेबे तिने सारे इस्राएली सिपाई कट्ठे कित्ते ओर यरदन नदिया ते पार ऊई की हेलामो दे पऊँचेया। तेबे अरामिये दाऊदो रे खलाफ सेना लई की तेस साथे लड़े। 18 पर अरामी इस्राएली लोका सामणे ते नठीगे ओर दाऊदे अरामिया बीचा ते 700 रथ चलाणे वाल़े ओर 40,000 कोड़ेया रे सवार काई ते ओर तिना रे सेनापति शोबक एड़ा काईल कित्तेया कि से तेथी मरी गा। 19 ये देखी की कि आसे इस्राएली लोका ते आरी गे रे, जितणे राजा हदादेजेरो रे वशो दे थे तिने सबी इस्राएली लोका साथे मलाप करी ला ओर तिना री सेवा करने लगे। तेबे अरामी अम्मोनिया री ओर मताद करने ते डरी गे।