1 तेस ई बखते पलिश्ती सिपाई इस्राएली लोका साथे लड़े ओर इस्राएली लोक पलिश्ती सिपाईया रे सामणे ते नठीगे पर तिने सेयो गिलबो नाओं रे पाह्ड़ो पाँदे काईते। 2 तेबे पलिश्ती सिपाई शाऊल ओर तेसरे पाऊआ पीछे दौड़े ओर पलिश्तिये शाऊलो रे पाऊ योनातान, अबीनादाब ओर मल्कीश काईते। 3 शाऊलो साथे घमासान युद्ध ऊणे लगी रा था ओर तेबे पलिश्तिए से बुरिया तरआ ते आपणे तीरे की बऊत काईल करिता। 4 तेबे शाऊले आपणे अथियार टोणे वाल़े खे बोलेया, "आपणी तलवार खींजी की मांदे कोपी दे, एड़ा नि ओ कि यो बिना खतना कित्ते रे लोक माखे आई की कोपी देयो ओर मेरा मजाक उडाओ।" पर तेसरे अथियार टोणे वाल़े बऊत डरी की एड़ा करने ते ना करी ती। तेबे शाऊले आपणी तलवार खड़ी कित्ती ओर तेते पाँदे पड़ीगा। 5 ये देखी की कि शाऊल मरी गा, तेसरा अथियार टोणे वाल़ा बी आपणी तलवारी पाँदे आपू पड़ी की तेस साथे मरी गा। 6 ईंयाँ शाऊल ओर तेसरे तीनो पाऊ ओर तेसरा अथियार टोणे वाल़ा ओर तेसरे सारे माणूं तेस ई दिने कट्ठे मरी गे। 7 ये देखी की कि इस्राएली लोक नठीगे ओर शाऊल ओर तेसरे पाऊ मरी गे, तेसा तराईया री पोरली तरफा वाल़े ओर यरदन नदिया ते पार रणे वाल़े इस्राएली माणूं आपणे-आपणे शईरा खे छाडी की नठीगे ओर पलिश्ती आई की तिना दे रणे लगे। 8 दूजे दिने जेबे पलिश्ती मरने वाल़ेया रा माल लुटणे आए, तेबे तिना खे शाऊल ओर तेसरे तीनो पाऊ गिलबो रे पाह्ड़ो पाँदे पड़े दे मिले। 9 तेबे तिने शाऊलो रा सिर बाडेया ओर अथियार लूटी ले ओर पलिश्तिया री हर जगा दे दूत इजी खे पेजे कि तिना रे मन्दरो दे ओर आम लोका बीचे ये शुभ सन्देश देंदे जाओ। 10 तेबे तिने तेसरे अथियार तो अश्तोरेत नाओं री देविया रे मन्दरो दे राखे, पर तेसरी लोथ बेतशानो री दवाला पाँदे लटकाई ती। 11 जेबे गिलाद देशो वाल़े याबेशो दे रणे वाल़ेया सुणेया कि पलिश्तिये शाऊलो साथे क्या-क्या करी राखेया, 12 तेबे सारे शूरवीर चले ओर रातोरात जाई की शाऊल ओर तेसरे पाऊआ रिया लाशा बेतशानो री दवाला पाँदा ते याबेशो दे ली आए ओर तेती फूकी तिया। 13 तेबे तिने तिना रिया आड्डिया लई की याबेशो रे झाऊआ रे डाल़ो निठे दबाई तिया ओर सात दिन तक बअरत राखेया।