1 तेबे किर्यत्यारीम शईरो रे लोके जाई की सन्दूक चकेया। सेयो तेसखे अबीनादाबो रे कअरे लई की गये जो टीले पाँदे था। तिने यहोवे रे सन्दूको री सेवा करने खे अबीनादाबो रे पाऊ एलीआजारो खे पवित्र कित्तेया।

2 किर्यत्यारीमो दे सन्दूक राखे दे कोई बीइ साल ऊईगे थे। इना साला दे इस्राएलो रा सारा कराना दु:ख करदा ऊआ यहोवे पीछे चलणे लगेया। 3 तेबे सेमुएले इस्राएलो रे सारे गोत्रा रे लोका खे बोलेया, "जे तुसे आपणे सारे मनो ते यहोवे खे ई मानणा चाओए, तो तुसे पराये देवते ओर अश्तोरेत देविया रिया मूर्तिया खे आपू बीचा ते बारे करो ओर यहोवे रिया तरफा खे आपणा मन लगाई की तेसरी ई सेवा करो। तेबे यहोवे तुसे पलिश्तिया ते छुड़ाणे।" 4 तेबे इस्राएलिये बाल देवते ओर अश्तोरेत देविया रिया मूर्तिया बारे काडी तिया ओर बस यहोवे री ई सेवा करने लगे। 5 तेबे सेमुएले तिना खे बोलेया, "तुसे सब इस्राएली लोक मिस्पा शईरो दे कट्ठा ओ ओर आऊँ तुसा रिया तँईं यहोवे ते प्रार्थना करूँगा।" 6 तेबे सेयो मिस्पा शईरो दे कट्ठे ऊए ओर पाणी परी की चढ़ावे रे रूपो दे यहोवे सामणे चढ़ाईता ओर तेस दिने बअरत राखेया ओर सेयो ये गल़ती मानी की बोलणे लगे, "आसे यहोवे रे खलाफ पाप करी राखेया।" तेस बखते सेमुएल मिस्पा शईरो दे इस्राएली लोका रा न्यायी बणेया।

7 जेबे पलिश्ती लोके सुणेया कि इस्राएली लोक मिस्पा शईरो दे कट्ठे ऊई रे, तेबे तिना रे सरदार आपणी सेना समेत इस्राएली लोका साथे लड़ने खे आए। ये सुणी की इस्राएली पलिश्तिया ते डरी गे। 8 इस्राएली लोक सेमुएलो ते बिनती करी की बोलणे लगे, "म्हारिया तँईं म्हारे परमेशर यहोवे ते प्रार्थना करदे रओ, जेते कि से आसा खे पलिश्तिया ते बचाओ।" 9 तेबे सेमुएले एक दूद पींदा मिन्टू यहोवे खे सारा का सारा होमबलि करी की चढ़ाया* ओर इस्राएली लोका खे बचाणे रिया तँईं तिने यहोवे ते प्रार्थना कित्ती, तेबे यहोवे तेसरी ये प्रार्थना सुणी लई। 10 जेस बखते सेमुएल होमबलि चढ़ाणे लगी रा था तेस बखते पलिश्ती इस्राएली लोका साथे लड़ने खे नेड़े आईगे, तेबे तेस ई दिने यहोवे पलिश्तिया पाँदे बडिया आवाजा साथे बादल़ गरजाए जेते कि सेयो बऊत कबराई गे ओर सेयो इस्राएली लोका ते आरी गे ओर तेथा ते नठणे लगे। 11 तेबे इस्राएली लोके मिस्पा शईरो ते निकल़ी की बेतकर जगा तक बाटा रिये पलिश्ती लोका रा पीछा कित्तेया ओर तिना खे काँदे चली गे।

12 तेबे सेमुएले एक पात्थर लई की मिस्पा ओर शेन शईरा बीचे खड़ा कित्तेया ओर तेस पात्थरो रा नाओं ये बोली की "एबेनेजेर"* राखेया, "एथो तक यहोवे म्हारी मताद करी राखी।" 13 तेबे पलिश्ती लोक तिना ते आरी गे ओर फेर मुड़ी की इस्राएली लोका रे देशो दे तिना ते लड़ने खे नि आए। सेमुएल जदुए तक जिऊँदा रया, तदुए तक यहोवा पलिश्ती लोका रे खलाफ खड़ा रया। 14 एक्रोन ओर गतो तक जितणे शईर पलिश्तिये इस्राएली लोका ते छीनी लये थे, सेयो फेर इस्राएली लोका खे देईते ओर इना शईरा रे पीतरे जितणिया ओर जगा आईया सेयो बी इस्राएलिये पलिश्तिया ते छीनी लिया। तेबे इस्राएली लोका ओर एमोरी लोका बीचे बी शान्तिया रा समजौता ऊई गा। 15 सेमुएल जदुए तक जिऊँदा रया तदुए तक इस्राएली लोका रा न्याय करदा रया। 16 से हर साल बेतेल, गिलगाल ओर मिस्पा शईरा दे कूमी-कूमी की तिना सबी जगा रे इस्राएली लोका रा न्याय करो था। 17 ओर फेर से रामा शईरो दे जेती तेसरा कअर था वापस आई जाओ था ओर तेती बी इस्राएली लोका रा न्याय करो था। तेती तिने यहोवे खे एक बेदी बणाई।