1 तेबे सेमुएले सारे इस्राएली लोका खे बोलेया, "सुणो, जो कुछ तुसे मांगे बोलेया था से मानी की मैं तुसा पाँदे एक राजा ठराई राखेया। 2 एबे देखो, तेस राजे तुसा ते आगे-आगे चली कि तुसा री अगुआई करनी, आऊँ तो एबे स्याणा ऊईगा रा ए ओर मेरे बाल़ सफेद ऊईगे रे ओर मेरे बच्चे तुसा बीचे ए ओर आऊँ बचपनो ते लई की आजो तक तुसा रा अगुवा बणी की रया। 3 आऊँ तुसा बीचे आजीर ए, इजी री खातर तुसे यहोवे सामणे ओर तेसरे अभिषिक्त राजे रे सामणे मां पाँदे गवाई देयो कि मैं केसरा बल़द लया? या केसरा गह्दा लया? या केसी पाँदे अन्देर कित्तेया? या केसी खे तोखा दित्तेया? या केसी रा न्याय बिगाड़ने खे तुसा ते रिश्वत लई? बताओ ओर मां से तुसा खे वापस करी देणा।" 4 तिने लोके ज्वाब दित्तेया, "तैं तो ना आसा पाँदे अन्देर कित्तेया, ना आसा खे तोखा दित्तेया ओर ना ई केसी रे आथो ते रिश्वत लई।" 5 सेमुएले तिना खे बोलेया, "आजके दिने यहोवा तुसा रा गवाह् ओर तेसरा अभिषिक्त राजा एते गल्ला रा गवाह् ए कि तुसे मांदे कोई दोष नि देखेया।" तिने लोके ज्वाब दित्तेया, "आ, आसे गवाह् ए।"

6 तेबे सेमुएल लोका खे बोलणे लगेया, जो मूसा ओर हारूणो खे ठराई की तुसा रे बुजुर्गा खे मिस्र देशो ते निकयाल़ी की ल्याया से यहोवा ई ए। 7 इजी री खातर तुसे एबे चुपचाप खड़े रओ ओर मां यहोवे सामणे तेसरे तार्मिकता रे काम जो तिने तुसा साथे ओर तुसा रे बुजुर्गा साथे कित्ते तिना रिया बजा ते तुसा पाँदे दोष लगाणा। 8 याकूब ओर तेसरा परिवार मिस्रो दे रणे जाणे ते बाद जेबे मिस्रो रे लोके सेयो सताए तेबे तुसा रे बुजुर्गे यहोवे री दुहाई दित्ती फेर यहोवे मूसा ओर हारूण पेजे ओर तिने तुसा रे बुजुर्ग मिस्रो ते निकयाल़े ओर एते जगा दे बसाए। 9 फेर जेबे सेयो आपणे परमेशर यहोवे खे पूली गे, तेबे तिने सेयो हासोर शईरो रे सेनापति सीसरा, पलिश्ती ओर मोआबो रे राजे रे वशो दे करीते ओर सेयो तिना साथे लड़े। 10 तेबे तिने यहोवे री दुहाई देई की बोलेया, "आसे यहोवे खे छाडी की बाल देवतेया ओर अश्तोरेत देविया री सेवा करी की बऊत बड़ा पाप करी राखेया, पर एबे तूँ आसा खे म्हारे दुश्मणा ते छुड़ाए तो आसा तेरी सेवा करनी।"

11 इजी री खातर यहोवे यरूब्बाल*, बदान, यिप्तह ओर मां सेमुएलो खे पेजी की तुसे तुसा रे चऊँ कनारले दुश्मणा ते छुड़ाए ओर तुसे बिना डरे रणे लगे। 12 जेबे तुसे देखेया कि अम्मोनी लोका रा राजा नाहाश आसा पाँदे अमला करने खे आऊणे लगी रा, तेबे बी तुसा रा परमेशर यहोवा तुसा रा राजा था, पर तेबे बी तुसे माखे बोलेया, ना, आसा पाँदे एक राजा ऊणा चाईयो। 13 एबे तेस राजे खे देखो जो तुसे चूणी ला रा ओर जो तुसे मांगेया था; देखो, यहोवे एक राजा तुसा खे देईता रा ए।

14 जे तुसे यहोवे रा डर मानदे, तेसरी सेवा करदे ओर तेसरी गल्ल सुणदे रओ ओर यहोवे री आज्ञा खे टाल़ी की तेस साथे बगावत नि करो ओर तुसे ओर से जो तुसा पाँदे राजा ए दोनो आपणे परमेशर यहोवे पीछे चलणे वाल़े बणे रे रओ, तेबे तो पला ऊणा, 15 पर जे तुसे यहोवे री गल्ल नि मानो ओर यहोवे री आज्ञा खे टाल़ी की तेस साथे बगावत करो, तो यहोवे जेड़ी सजा तुसा रे बुजुर्गा खे दित्ती थी, तेड़ी ई सजा तेस तुसा खे ओर तुसा रे राजे खे बी देणी। 16 इजी री खातर तुसे एबे चुपचाप खड़े रओ ओर एस बड़े कामो खे देखो जो यहोवा तुसा रिया आखी सामणे करने वाल़ा ए। 17 तुसे जाणोए कि आज-काल कणका री बडाई ऊणे लगी री। पर एबे एस सूके रे बखतो दे मां यहोवे खे पुकारना ओर जेबे तेस बादल़ गरजाणे ओर बर्खा करनी, तेबे तुसा जाणी लणा ओर देखी बी लणा कि तुसे राजा मांगी की यहोवे री नजरा दे बऊत बड़ी बुराई करी राखी। 18 तेबे सेमुएले यहोवे खे आका पाईया ओर यहोवे तेस ई दिने बादल़ गरजाए ओर बर्खा कित्ती ओर सारे लोक यहोवे ते ओर सेमुएलो ते बऊत डरी गे। 19 तेबे सबी लोके सेमुएलो खे बोलेया, "आसे जो तेरे दास ए तुँ आसा रिया तँईं यहोवे ते प्रार्थना कर कि आसे मरूँ नि, कऊँकि आसे आपणे सारे पापा ते बढ़ी की ये बुराई करी राखी कि आसे राजा मांगेया।" 20 सेमुएले लोका खे बोलेया, "डरो नि, तुसे ये सारी बुराई तो करी राखी, पर एबे यहोवे पीछे चलणे ते पीछे नि आटणा, ओर आपणे सारे मनो ते तेसरी सेवा करनी। 21 परमेशर यहोवे खे छाडी की बेकार मूर्तिया री पूजा करने खे नि जाणा जो ना तो तुसा री मताद करी सकदिया ओर ना ई बचाई सकदिया। कऊँकि सेयो सारिया केसी बी कामो रिया नि ए। 22 यहोवे तो आपणे बड़े नाओं रिया बजा ते आपणी प्रजा नि छाडणी, कऊँकि यहोवे तुसे आपणी इच्छा ते आपणी प्रजा बणाई राखे। 23 एड़ा ना ओ कि आऊँ तुसा खे प्रार्थना करना छाडी देऊँ, ओर इजी बजा ते यहोवा मेरे खलाफ ऊई जाओ, मां तो तुसा खे अच्छी ओर सीदी बाट बतांदे रणा। 24 बस इतणा ओ कि तुसे लोक यहोवे रा डर मानो ओर सच्चाईया साथे आपणे पूरे मनो ते तेसरी सेवा करो; कऊँकि ये तो सोचो कि तिने तुसा रिया तँईं केड़े बड़े-बड़े काम करी राखे। 25 पर जे तुसे बुराई करदे ई रओगे, तो तुसे ओर तुसा रा राजा दोनो के दोनो खत्म ऊई जाणे।"