1 एक दिन दाऊदे आपणे मनो दे सोचेया, "एक दिन शाऊलो रे आथे आऊँ काया जाणा। इजी री खातर मेरा फाईदा एते गल्ला दे आ कि आऊँ पलिश्तिया रे देशो दे नठी जाऊँ। तेबे शाऊलो आऊँ इस्राएल देशो दे टोल़ना बन्द करी देणा। ईंयाँ आऊँ तेसरे आथो ते बची की निकल़ी जाणा।" 2 तेबे दाऊद आपू साथले 600 मर्दा खे लई की इस्राएलो ते चली गा ओर पलिश्तिया रे गत शईरो रे राजा माओको रे पाऊ आकीशो गे गया। 3 तेबे दाऊद ओर तेसरे माणूं आपणे-आपणे परिवारो समेत गत शईरो दे राजा आकीशो गे रणे लगे। दाऊद तो आपणी दो लाड़िया साथे, मतलब यिज्रेल शईरो री अहीनोअम ओर कर्मेलो री रणे वाल़ी नाबालो री बिदुआ अबीगैला साथे रया। 4 जेबे शाऊलो खे सन्देश मिलेया कि दाऊद गत शईरो खे नठी गा रा, तेबे तिने से फेर कदी नि टोल़ेया।

5 एक दिन दाऊदे आकीशो खे बोलेया, "जे मां पाँदे तेरी दया-दृष्टि ओ, तो देशो री केसी छोटे शईरो दे माखे जगा देई दे जेती आऊँ रऊँ; तेरा दास तां साथे राजधानिया दे कऊँ रओ?" 6 तेबे आकीशे तेसखे तेस ई दिने सिकलग बस्ती देईती; इजी बजा ते सिकलग बस्ती आजो तक यहूदा रे राजेया री बणी दी ए। 7 पलिश्तिया रे देशो दे रंदे ऊए दाऊद ओर तेसरे साथिया खे एक साल चार मीन्ने बीतीगे। 8 तेबे दाऊदे आपणे माणूंआ समेत जाई ई गशूरी, गिर्जी ओर अमालेकिया पाँदे चढ़ाई कित्ती, यो जातिया तो पुराणे जमाने ते तेते देशो दे रओ थिया जो शूरो रिया बाटा दे मिस्र देशो तक ए। 9 तेबे दाऊदे से देश नाश करी ता ओर मर्द, जवाणस सब काईते, ओर पेडा-बाकरिया, गाय-बल़द, गह्दे, ऊँट ओर टाल्ले लई की वापस ऊआ ओर आकीशो गे गया। 10 जेबे बी आकीश दाऊदो ते पूछो था, "आज तैं अमला तो नि कित्तेया?" दाऊद बोलो था, "आ, यहूदा रे दक्खण दिशा दे गया, या यरहमेलिया रे दक्खणा दे गया या केनिया री दक्खण दिशा दे गया था।" 11 दाऊदे जवाणस मर्द कोई बी जिऊँदे नि छाडे कि तिना खे गत शईरो दे पऊँचाओ, से सोचो था कि केथी एड़ा नि ओ कि सेयो म्हारा काम बताई की ईंयाँ नि बोलो कि दाऊदे एड़ा-एड़ा कित्तेया। बल्कि जदुओ ते से पलिश्तिया रे देशो दे रओ था, तदुओ ते तेसरा काम एड़ा ई था। 12 तेबे आकीशे दाऊदो री गल्ल सच मानी की आपणे मनो दे सोचेया, "ये इन्ने आपणे इस्राएली लोका री नजरा दे बऊत गल़त करी राखेया, इजी री खातर ये सदा मेरा दास बणेया दा रणा।"