1 सेमुएल 22

शाऊलो रा पुरोईता खे काणा

1 तेबे दाऊद तेथा ते चली गा ओर अदुल्लाम शईरो री गुफा दे पऊँची की बचीगा। जेबे तेसरे पाईए ओर तेसरे बाओ रे परिवारो रे ओरी लोके ये सुणेया तेबे सेयो तेती तेसगे पऊँची गे। 2 तेबे जितणे मुसीबता रे पड़ी रे थे, जितणे कर्जदार थे ओर जितणे उदास थे, सेयो सारे तेसगे कट्ठे ऊए ओर से तिना रा परदान बणी गा। तेबे कोई 400 मर्द तेस साथे ऊईगे।

3 बऊत कट बखतो देई दाऊदे तेसा जगा खे छाडी की मोआब देशो रे मिस्पा शईरो दे गया ओर जाई की तेथो रे राजे खे बोलेया, "मेरे बाओ खे आपू गे तदुए तक रणे दे, जदुए तक आऊँ जाणी नि लऊँ कि यहोवे मेरिया तँईं क्या करना।" 4 तेबे से तिना खे मोआबो देशो रे राजे सामणे लईगा ओर जदुओ तक दाऊद तेती गढ़ो रे रया, तदुओ तक सेयो तेसगे रये।

5 एक दिन गाद नाओं रे एक नबीए दाऊदो खे बोलेया, "एती गढ़ो दे नि रओ, चल, यहूदा रे प्रदेशो दे जा।" तेबे दाऊद चली की यहूदा प्रदेशो रे हेरेत बणो दे रणे लगेया। 6 कुछ बखतो ते बाद शाऊले सुणेया कि दाऊद ओर तेसरे साथिया रा पता लगी गा रा तेस बखते शाऊल गिबा री ऊच्ची जगा पाँदे, एक झाऊए रे डाल़ो निठे, आथो दे आपणा भाल़ा लई की बैठी रा था ओर तेसरे सारे कर्मचारी तेसरे नेड़े-तेड़े खड़ी रे थे। 7 तेबे शाऊल आपणे कर्मचारिया खे जो तेसरे नेड़े-तेड़े खड़ी रे थे बोलणे लगेया, "ओ बिन्यामीनी लोको, सुणो, क्या यिशै रे पाऊए तुसा सबी खे डोरू ओर अंगूरा रे बगीचे देणे? क्या तेस तुसे सब सेनापति या अधिकारी बनाणे? 8 पर तुसे सबी मेरे खलाफ राजद्रोह री सभा कऊँ करी राखी? जेबे मेरे पाऊ योनाताने यिशै रे पाऊए साथे वाचा बानी, तेबे मांगे किने नि बताया ओर तुसा बीचा ते किने बी मेरिया तँईं दु:खी ऊई की मांगे नि बताया कि मेरे पाऊए मेरा कर्मचारी मेरे खलाफ एड़ी ताका दे लगाई राखेया, जेड़ा आजके दिने ए।"

9 तेबे एदोम कुलो रे दोएगे, जो शाऊलो रे सेवका पाँदे अधिकारी था, ज्वाब देई की बोलेया, "मैं तो यिशै रा पाऊ नोब शईरो दे अहीतूबो रे पाऊ अहीमेलेको गे आऊँदा ऊआ देखेया 10 ओर अहीमेलेके दाऊदो रिया तँईं यहोवे ते पूछेया ओर तेसखे खाणे रिया चीजा दित्तिया ओर पलिश्ती गोलियतो री तलवार बी दित्ती।" 11 तेबे राजे अहीतूबो रा पाऊ अहीमेलेक पुरोईत ओर तेसरे बाओ रा सारा कराना, मतलब नोब शईरो रे रणे वाल़े पुरोईत बुलाए ओर सारे के सारे राजे गे आए। 12 तेबे शाऊले बोलेया, "ओ अहीतूबो रे पाऊ, सुण!" अहीमेलेके ज्वाब दित्तेया, "ओ स्वामी बोल, क्या आज्ञा ए?" 13 तेबे शाऊले तेसते पूछेया, "क्या बजा ए कि तैं ओर यिशै रे पाऊए दुँईं मेरे खलाफ साजिश कऊँ करने लगी रे? तैं तेसखे रोटी ओर तलवार दित्ती ओर तेसरिया तँईं यहोवे ते बी पूछेया, जेते कि से मेरे खलाफ उठो ओर एड़ी ताका रे रओ जेड़ा आजके दिने ए?"

14 अहीमेलेके राजे खे ज्वाब दित्तेया, "स्वामी, तेरे सारे कर्मचारिया बीचे दाऊदो जेड़ा वफादार कोई पनि ए। से तो तेरा जवांई ओर तेरे सिपाईया रा अधिकारी आ। से तेरे परिवारो दे परोसे वाल़ा माणूं आ। 15 ये पईली बार नि था, कि मैं दाऊदो रिया तँईं परमेशरो ते प्रार्थना कित्ती। एड़ी गल्ल बिल्कुल पनि ए। राजा मां पाँदे या मेरे केसी बी रिश्तेदारो पाँदे दोष नि लगा। आसे तेरे सेवक ए। माखे एतेरे बारे दे कुछ बी जाणकारी नि ए कि ये सब क्या ऊणे लगी रा?" 16 शाऊल राजे बोलेया, "ओ अहीमेलेक, तूँ ओर तेरे बाओ रा सारा कराना पक्का काया जाणा।" 17 तेबे राजे तिना पईरेदारा खे जो तेसरे नेड़े-तेड़े खड़ी रे थे आज्ञा दित्ती, "मुड़ो ओर यहोवे रे पुरोईता खे काई दो, कऊँकि तिने बी दाऊदो री मताद करी राखी ओर से नठी गा ये जाणदे ऊए बी इने मांगे नि दसेया।" पर राजे रे सेवक यहोवे रे पुरोईता खे काणा नि चाओ थे।

18 तेबे राजे दोएगो खे बोलेया, "तूँ मुड़ी की पुरोईता खे काईदे।" तेबे एदोमी दोएगे मुड़ी की पुरोईत काईते ओर तेस दिने रेशमो रा एपोद पईने रे पच्यासी पुरोईत काये। 19 तिने पुरोईता रे शईर नोबो दे जवाणस, मर्द, बाल-बच्चे, दूद पीणे वाल़े बच्चे, बल़द, गह्दे ओर पेडा-बाकरिया सब तलवारी साथे काये। 20 पर अहीतूबो रे पाऊ अहीमेलेको रा एब्यातार नाओं रा एक पाऊ बची की निकल़ी गा ओर दाऊदो गे नठी गा। 21 तेबे एब्यातारे दाऊदो गे बताया कि शाऊले यहोवे रे पुरोईत फाटी ते। 22 दाऊदे एब्यातारो खे बोलेया, "जेस दिने एदोमी दोएग मैं अहीमेलेको गे तेती देखेया था, तेस दिने ई माखे पता लगी गा था कि तेस पक्का शाऊलो गे सब कुछ बताई देणा। तेरे बाओ रे सारे कराने खे काणे री बजा आऊँ ई ऊआ। 23 इजी री खातर तूँ मां साथे बिना डरे रओ, शाऊल ताखे काणा चाओआ, ओर से माखे बी काणा चाओआ। मां साथे रणे ते तूँ बचेया दा रणा।"