1 सेमुएल 21

दाऊदो रा शाऊलो ते नठणा

1 तेबे दाऊद नोब*21:1 नोब नोब पुरोईता रा शईर था। बड़ा पुरोईत तेती रओ था ओर मिलणे वाल़ा तम्बू तेती था। शईरो दे अहीमेलेक पुरोईतो गे आया, अहीमेलेक दाऊदो साथे मिलणे खे थरथरांदा ऊआ निकल़ेया ओर तेसते पूछेया, "क्या बजा ए कि तूँ कल्ला ए ओर तां साथे कोई नि ए?" 2 तेबे दाऊदे अहीमेलेक पुरोईतो खे बोलेया, "राजे माखे एक काम करने री आज्ञा देई की माखे बोलेया कि जेस काम करने खे आऊँ ताखे पेजुँआ ओर जो आज्ञा आऊँ ताखे देऊँआ, से केसी खे पता नि लगणा चाईयो। जेथो तक मेरे सिपाईया रा सम्बन्द ए, मैं तिना खे आज्ञा देई राखी कि सेयो माखे केई मिलो। 3 आऊँ जाणूंआ कि तेरे आथो दे खाणे खे क्या ए, माखे पाँज रोटिया ओर जो कुछ बी आ माखे दे।" 4 पर पुरोईते दाऊदो खे बोलेया, "मांगे आम रोटी तो नि ए, बस पवित्र रोटी ए, तेरे साथी तिना रोटिया खे खाई सकोए, बस इतणा ओ कि सेयो मर्द जवाणसा ते लग रई रे ओ।" 5 दाऊदे पुरोईतो खे ज्वाब देई की बोलेया, "सच ए कि आसे तीऊँ दिना ते जवाणसा ते लग ए, तेबे बी जेबे आऊँ निकल़ी की आया था तेबे बी सेयो पवित्र थे, जेबे आसे सादारण यात्रा दे बी जाऊँए तेबे बी पवित्र रऊँए, तो आजका दिन तो आसा खे खास ए तो आसे पवित्र कऊँ नि ऊणे।" 6 तेती पवित्र रोटिया ते अलावा ओर कोई रोटी नि थी। तेबे पुरोईते दाऊदो खे पवित्र रोटी दित्ती, कऊँकि तेती ओर रोटी नि थी, बस पेंटा री रोटी थी जो यहोवे रे सामणे ते चकी राखी थी, जेबे ये रोटी चकी तेबे तेस दिने तेतेरिया जगा पाँदे ताजा रोटी राखी। 7 तेस ई दिने तेती दोएग नाओं रा शाऊलो रा कर्मचारी यहोवे ते आगे रूकी रा था, से एदोमी ओर शाऊलो रे ग्वाल़ेया रा मुखिया था। 8 तेबे दाऊदे अहीमेलेको ते पूछेया, "क्या तांगे एती कोई भाल़ा या तलवार ए? कऊँकि माखे राजे रे कामो री एड़ी जल्दबाजी थी कि आऊँ ना तो तलवार साथे ल्याई राखेया ओर ना आपणा ई कोई अथियार ल्याया।" 9 पुरोईते बोलेया, "आ, पलिश्ती गोलियत जो तैं एला नाओं री तराईया दे काया था, तेसरी तलवार टाल्ले दे लपेटी की एपोदो रे पीछे राखी री ए, जे तूँ तिजी खे लणा चाएया, तो लई लो, तिजी खे छाडी की एती ओर कुछ नि ए।" दाऊदे बोलेया, "तेते ते अच्छी ओर कोई तलवार नि ए तेसा माखे देई दे।"

दाऊदो रा गत शईरो खे नठणा

10 तेबे दाऊद चली गा ओर तेस ई दिने शाऊलो रे डरो रे मारे नठी की पलिश्तिया रे गत शईरो दे राजा आकीशो गे गया। 11 तेबे आकीशो रे कर्मचारिये आकीशो खे बोलेया, "क्या से इस्राएल देशो रा राजा दाऊद नि ए? क्या लोके तेसरे बारे दे नाचदे-नाचदे एकी-दूजे साथे ये गाणा नि गाया था कि शाऊले ह्जार दुश्मण ओर दाऊदे दस ह्जार दुश्मण काये?" 12 दाऊदे यो गल्ला आपणे मनो दे राखिया ओर गतो रे राजा आकीशो ते बऊत डरीगा। 13 तेबे दाऊदे तिना सामणे पागला जेड़ा बर्ताओ कित्तेया ओर तिना रे आथो दे पड़ी की पागल बणी गा ओर बड़े द्वारा पाँदे लकीरा खींजणे ओर आपणी दाड़िया पाँदे लार सेटणे लगेया। 14 तेबे आकीशे आपणे कर्मचारिया खे बोलेया, "देखो, ये माणूं तो पागल ए, तुसे एसखे मांगे कऊँ ल्याये? 15 क्या मांगे पागला री कोई कमी ए कि तुसे एसखे मां सामणे पागलपन करने खे ल्याई राखे? एड़े माणूंए री एती कोई जरूरत नि ए।"