1 एक दिन शाऊले आपणे पाऊ योनातान ओर सबी कर्मचारिया साथे दाऊदो खे काणे रिया गल्ला कित्तिया। पर शाऊलो रा पाऊ योनातान दाऊदो रा अच्छा दोस्त था। 2 इजी री खातर योनाताने दाऊदो खे बोलेया, "मेरा बाओ ताखे काणा चाओआ, इजी री खातर तैं प्यागा सम्बल़ी की रणा ओर केसी गुप्त जगा रे लूकी की बैठी जाएया 3 ओर मां मैदानो दे जेती तूँ ऊणा तेती जाई की आपणे बाओ साथे खड़ा ऊई की तेस साथे तेरे बारे दे गल्ला करनिया ओर जो कुछ से मांते बोलोगा मां तांगे बताणा।" ओर दाऊदे जेड़ा योनाताने बोलेया था तेड़ा ई कित्तेया।

4 दूजे दिने योनाताने आपणे बाओ गे दाऊदो री तारीफ करी की बोलेया, "ओ राजा, आपणे दास दाऊदो रा अपराधी नि ओ, तेसरा कुछ बी बुरा नि कर कऊँकि तिने तेरे खलाफ कुछ गल़त नि करी राखेया। तेसरे सारे कामा ते तेरा बऊत फाईदा ई ऊई रा। 5 तिने तेरिया तँईं आपणे प्राणो पाँदे खेली की से पलिश्ती काया ओर तेसरे जरिये यहोवे सारे इस्राएली लोका खे बड़ी जीत दलाई था। इजी खे देखी की तूँ बऊत खुश ऊआ, तेबे तूँ निर्दोष दाऊदो खे काई की निर्दोषो रे खूनो रा दोषी कऊँ बणना चाएया?" 6 तेबे शाऊले योनातानो री गल्ल मानी की ये कसम खाई, "यहोवे री जिन्दगिया री कसम, दाऊद नि काया जाणा।"

7 तेते ते बाद योनाताने दाऊदो खे बुलाई की यो सारिया गल्ला तेसगे बताईया। तेबे योनातान दाऊदो खे शाऊलो गे लईगा ओर से पईले जेड़ा तेस साथे रणे लगेया।

8 एक दिन फेर पलिश्तिया साथे लड़ाई ऊणे लगी ओर दाऊदे जाई की पलिश्तिया साथे लड़ने खे सेना री अगुआई कित्ती। तिने बऊत पलिश्ती सिपाई काये ओर जो बची गे सेयो तेथा ते नठीगे।

9 ओर बादो ते परमेशरो रिया तरफा ते एक दुष्टात्मा शाऊलो पाँदे चढ़ेया। ओर शाऊल आथो दे भाल़ा लई की बैठी रा था, ओर दाऊद तेस सामणे बीणा बजाणे लगी रा था, 10 तेबे शाऊले ये सोची कि भाल़ा एड़ा बाया कि से दाऊदो खे चीरदा ऊआ पीतो दे तसी जाओ, पर दाऊद शाऊलो रे सामणे ते एड़ा आटेया कि भाल़ा जाई की पीतो रेई तसी गा ओर दाऊद नठेया ओर तेसा राती बचीगा। 11 तेसा ई राती शाऊले दाऊदो रे कअरे दूत इजी खे पेजे, ताकि सेयो तेसरी ताका दे रओ ओर प्यागा तेसखे काओ, तेबे दाऊदो री लाड़िए मीकले तेसखे ये बोली की चिताया, "जे तूँ आज की राती एथा ते नठी की आपणी जान नि बचाए, तो तिना काल प्यागा तूँ काई देणा।"

12 तेबे मीकले दाऊद द्वारिया ते बारे उतारी ता ओर से नठी की दूर चलीगा। 13 तेबे मीकले कअरो रे देवते लई की दाऊदो रे माँजे पाँदे लटयाल़ी ते ओर तेसे बाकरिया रे बाल़ा री बणी दी एक जाल़ी तेसरे सिरो पाँदे लगाईती, ओर सेयो टाल्लेया ते टकी ते। 14 जेबे शाऊले दाऊदो खे पकड़ने खे दूत पेजे, तेबे मीकले बोलेया, "से तो बमार ए।" 15 तिने यो सब गल्ला शाऊलो खे बताईया तो शाऊले ये बोली की सेयो माणूं फेर पेजे, "दाऊदो खे माँजे समेत मांगे चकी की लई की आओ ताकि आऊँ तेसखे कायी सकूँ।" 16 जेबे दूत दाऊदो रे कअरे पीतरे गये तो तिने देखेया कि माँजे पाँदे तो कअरो रे देवतेया रिया मूर्तिया ए, ओर तेसरे सिरो पाँदे बाकरिया रे बाल़ा री एक जाल़ी लगी री। 17 शाऊले मीकल बुलाई जेबे से आई तो तिने बोलेया, "तैं मां साथे एड़ा तोखा कऊँ कित्तेया? तैं मेरे दुश्मणो खे कऊँ नठणे दित्तेया कि से बची कि निकल़ी जाओ?" मीकले शाऊलो खे बोलेया, "दाऊदे बोलेया कि माखे जाणे दे नि तो मां तूँ काई देणी।"

18 जेबे दाऊद नठी की बचीगा, ओर से रामाह शईरो दे सेमुएलो गे गया। जो कुछ शाऊले तेस साथे कित्तेया था से सब तिने सेमुएलो गे बताया। तेबे दाऊद ओर सेमुएल रामाह शईरो ते निकल़ी की नबायोत जगा खे चली गे ओर तेथी रूकी की रणे लगे। 19 तेबे किने जाई कि शाऊलो खे बोलेया कि दाऊद रामाह शईरो रे नबायोत जगा दे आ, 20 शाऊले दाऊदो खे पकड़ने रिया तँईं माणूं तेती पेजे। पर जेबे सेयो तेती पऊँचे तेस बखते नबीया रा दल भविष्यबाणी करने लगी रा था। सेमुएल दलो री अगुआई करने खे खड़ी रा था। तेबे यहोवे रा आत्मा शाऊलो रे माणूंआ पाँदे उतरेया ओर सेयो बी भविष्यबाणी करने लगे। 21 लोके ये गल्ल शाऊलो खे बताई तेबे तिने ओर दूत दाऊदो खे पकड़ने खे पेजे पर सेयो बी भविष्यबाणी करने लगे। शाऊले तीजी बार फेर लोक पेजे पर सेयो बी भविष्यबाणी करने लगे। 22 आखरी दे शाऊल आपू ई रामाह शईरो खे आया, से तेस बड़े गड्डे पाँदे जो सेकुए दे आ पऊँची की तिना लोका ते पूछणे लगेया, "सेमुएल ओर दाऊद केईए?" तिने बोलेया, "सेयो तो रामाह शईरो रे नबायोत जगा दे ए।" 23 तेबे से रामाह शईरो रे नबायोत जगा खे गया ओर यहोवे रा आत्मा तेस पाँदे उतरेया ओर से जदुए तक रामाह शईरो रे नबायोत जगा दे नि पऊँचेया से भविष्यबाणी करदा रया। 24 ओर तिने बी आपणे टाल्ले फाड़े ओर सेमुएलो सामणे भविष्यबाणी करने लगेया, से सारा दिन ओर सारी रात तेती नांगा पड़ेया दा रएया। इजी बजा ते ये कहावत चली कि क्या शाऊल बी तिना बीचा ते एक नबी बणी गा रा ए?