1 जेबे सेमुएल बुजुर्ग ऊआ, तेबे तिने आपणे दोनो पाऊ इस्राएली लोका रा न्याय करने खे ठराए। 2 तेसरे दो ई माठे थे जेठे पाऊए रा नाओं योएल ओर दूजे रा नाओं अबिय्याह था, यो बेर्शेबा शईरो दे न्याय करो थे। 3 पर सेमुएलो रे पाऊ तेस जेड़े नि ऊए, सेयो पैसेया रे लाल़ची थे ओर सेयो पैसा लई की गल़त न्याय करो थे।

4 तेबे इस्राएली लोका रे परदान कट्ठे ऊई की रामा शईरो दे सेमुएलो गे गये। 5 तिने तेसखे बोलेया, "देख, तूँ तो एबे बुजुर्ग ऊईगा रा ओर तेरे पाऊआ रा सबाओ बी तां जेड़ा नि ए, एबे आसा रा न्याय करने खे दूजिया जातिया जेड़ा आसा खे बी एक राजा दे।"* 6 पर जो गल्ल तिने बोली, "आसा पाँदे न्याय करने खे आसा खे एक राजा दे" ये गल्ल सेमुएलो खे बुरी लगी। तेबे सेमुएले यहोवे ते प्रार्थना कित्ती। 7 यहोवे सेमुएलो खे ज्वाब दित्तेया, "सेयो लोक जो कुछ ताखे बोलोए से मानी लो, कऊँकि तिने तूँ नि नकारेया पर आऊँ ई नकारी राखेया ओर सेयो चाओए कि आऊँ आगो खे तिना पाँदे राज नि रऊँ। 8 जदुए ते आऊँ तिना खे मिस्र देशो ते निकयाल़ी की ल्याया, तदुए ते लई की आजके दिनो तक सेयो लोक जेड़े-जेड़े काम करदे आई रे मतलब माखे छाडी की पराये देवतेया री सेवा करोए, तेड़ा ई सेयो तां साथे बी करोए। 9 एबे तूँ जेड़ा सेयो चाओए तेड़ा ई कर, पर तिना खे एते गल्ला रे बारे दे बी चतौणी देई की समजयाई दे कि जेस राजे तुसा पाँदे राज करना तेस तुसा साथे केड़ा बर्ताओ करना।"

10 सेमुएले तिना लोका खे जो तेसते राजा माँगो थे यहोवे रिया सारिया गल्ला सुणाईयां। 11 तेबे सेमुएले तिना खे बोलेया, "जेस राजे तुसा पाँदे राज करना तेस तुसा साथे एड़ा बर्ताओ करना: तेस तुसा रे पाऊ लई की कुछ तो लड़ाईया दे आपणे रथ ओर कोड़ेया खे चलाणे वाल़े राखणे ओर बाकि तेसरे रथो ते आगे-आगे पैदल दौड़ेया करने, 12 तेबे तेस सेयो ह्जार-ह्जार ओर पंजा-पंजा सिपाईया पाँदे सेनापति बनाणे। कई तेस आपणे डोरूआ दे अल़ बाणे ओर फसल कट्ठी करने रे कामो पाँदे राखणे। कई तेस आपू गे लड़ाईया रे अथियार ओर रथा रा समान बनाणे खे राखणे। 13 तेबे तेस तुसा रिया बेटिया जबरदस्ती लई जाणिया ओर तिना ते खुशबूदार तेल बनवाणे, ओर तेस सेयो सबी तरआ रा खाणा बनवाणे खे बोटिये रे कामो पाँदे राखणिया। 14 फेर तेस राजे तुसा रे खरे-खरे डोरू ओर अंगूरा रे बगीचे ओर जैतूनो रे डाल़ा री जमीन लई की आपणे कर्मचारिया दे बांडी देणी। 15 तेबे तेस तुसा रे नज्जो रा ओर अंगूरा रा दसुआ ईसा लई की आपणे परदाना ओर कर्मचारिया खे देणा। 16 तेबे तेस तुसा रे दास-दासिया सबी ते खरे डांगर* ओर तुसा रे गह्दे बी लई की आपणे कामो दे लगाणे। 17 तेस तुसा रिया पेडा-बाकरिया रा बी दसुआ ईसा लणा, ईंयाँ तुसे तेस राजे रे दास ऊणे। 18 जेस बखते ये सब ऊणा तुसा आपणे चूणे रे राजे ते आजाद ऊणे रिया तँईं यहोवे ते प्रार्थना करनी, पर यहोवे तेस बखते तुसा री सुणनी तो आए पर ज्वाब नि देणा।"

19 तेबे बी इस्राएली लोके सेमुएलो री चतौणी नि मानी ओर बोलणे लगे, "ना! आसा खे राजा ई चाईयो, 20 जेते कि आसे बी ओर सबी जातिया जेड़े ऊई जाऊँ ओर म्हारा राजा म्हारा न्यायी बणी की आसा ते आगे-आगे चली की म्हारिया तरफा ते लड़ाईया दे म्हारी अगुआई करेया करो।" 21 लोका रिया यो सब गल्ला सुणी की सेमुएले यहोवे खे सुणाईया। 22 यहोवे सेमुएलो खे ज्वाब दित्तेया, "तिना री गल्ल मानी की तिना खे राजा ठराई दे।" तेबे सेमुएले इस्राएली लोका खे बोलेया, "ठीक ए, तुसे सब एबे आपणे-आपणे शईरा दे आपणे कअरे चली जाओ।"