1 सेमुएल 26

दाऊदो रा शाऊलो खे दूजी बार जिऊँदा छाडणा

1 एक दिन कुछ जीपी शईरो रे लोक गिबा शईरो दे शाऊलो गे जाई की बोलणे लगे, "दाऊद तो यशीमोन शईरो ते पार तेसा हकीला नाओं री पाह्ड़िया पाँदे लूकी रा।" 2 तेबे शाऊल उठी की इस्राएलो रे 3,000 छाँटे रे योद्धा खे साथे लई की गया, ताकि दाऊदो खे जीपो रिया सुनसाण जगा दे टोल़ो। 3 तेबे शाऊले आपणा डेरा बाटा रे नेड़े हकीला नाओं री पाह्ड़िया पाँदे जो यशीमोन शईरो सामणे ए लगाया। पर दाऊद आपणे साथिया समेत सुनसाण जगा दे रया ओर तेसखे पता लगी गा कि शाऊल मेरा पीछा करने खे सुनसाण जगा दे आई रा। 4 तेबे दाऊदे पेतिए पेजी की निश्चा करी ला कि शाऊल सच्ची आई गा रा।

5 तेबे तेस ई दिने सांजा दाऊद उठी की तेसा जगा दे गया जेती शाऊले आपणा तम्बू खड़ा करी राखेया था ओर दाऊदे से जगा देखी जेती शाऊल आपणे सेनापति नेरो रे पाऊ अब्नेरो साथे सई रा था ओर तेसरे माणूं तेसरे चऊँ कनारे सई रे थे। 6 तेबे दाऊदे हित्ती अहीमेलेक ओर सरूयाह रे पाऊ योआबो रे पाई अबीशै खे बोलेया, "मां साथे तेती डेरे दे शाऊलो गे केस चलणा?" अबीशै बोलेया, "तां साथे मां जाणा।" 7 तेबे दाऊद ओर अबीशै रातोरात तिना लोका गे गये ओर क्या देखोए कि शाऊल गडिया री आड़ा दे सई रा ओर तेसरा भाल़ा तेसरे सरयाणे दे जमीना दे गड़ी रा ओर सेना रा परदान अब्नेर ओर सिपाई तेसरे चऊँ कनारे सई रे। 8 तेबे अबीशै दाऊदो खे बोलेया, "यहोवे आज तेरा दुश्मण तेरे आथो रे करी ता रा, इजी री खातर एबे आऊँ तेसखे एड़ा बाऊँ कि भाल़ा तेसखे चिरदा ऊआ जमीना दे तसी जाओ ओर माखे से दूजी बार नि बाणा पड़ो।" 9 पर दाऊदे अबीशै खे बोलेया, "तेसखे नाश नि कर, कऊँकि यहोवे रे चूणे दे पाँदे आथ चलाई की कुण निर्दोष रयी सकोआ।"

10 तेबे दाऊदे बोलेया, "आसा खे तेसखे काणे री जरूरत नि ए, यहोवे री जिन्दगिया री कसम यहोवे ई से काणा या से आपणी मौत मरना या से लड़ाईया दे जाई की मरी जाणा। 11 पर माखे यहोवा नि करो कि आऊँ आपणा आथ यहोवे रे चूणे दे पाँदे चलाऊँ, एबे तेसरे सरयाणे ते भाल़ा ओर पाणिए रा कअड़ा चकी दे ओर आसे एथा ते चलूँए।" 12 तेबे दाऊदे भाल़ा ओर पाणिए रा कअड़ा शाऊलो रे सरयाणे ते चकी ला ओर सेयो चली गे। सेयो ना तो किने देखे ओर ना तीना खे पता लगेया ओर ना कोई जागेया, कऊँकि सेयो इजी बजा ते सयी रे थे कऊँकि यहोवे री तरफा ते तिना दे बड़ी पारी नींज आईगी थी।

13 तेबे दाऊद तराईया रिया दूजिया तरफा खे जाई की दूरा ते पाह्ड़ो री चूँडिया पाँदे खड़ा ऊईगा ओर दुँईं बीचे काफी फांसला था। 14 तेबे दाऊदे तिना लोका खे ओर नेरो रे पाऊ अब्नेरो खे आका पाई की बोलेया, "ओ अब्नेर क्या तूँ सुणने नि लगी रा?" अब्नेरे ज्वाब देई की बोलेया, "तूँ कुण ए जो राजे खे आका पाई की नींजा ते उठाणे लगी रा?" 15 दाऊदे अब्नेरो खे बोलेया, "क्या तूँ मर्द नि ए? इस्राएलो दे तां जेड़ा बहादूर माणूं कुण ए? तैं आपणे स्वामी राजे री चौकसी कऊँ नि कित्ती? एक माणूं तो तेरे स्वामी राजे खे नाश करने खे कूसेया था। 16 जो काम तैं करी राखेया से बऊत बुरा ए। यहोवे री जिन्दगिया री कसम तुसे लोक तो काणे जोगे ए, कऊँकि तुसे आपणे स्वामी, यहोवे रे अभिषिक्तो री चौकसी नि कित्ती। एबे देख, राजे रा भाल़ा ओर पाणिए रा कअड़ा जो तेसरे सरयाणे दे थे केयी ए?"

17 तेबे शाऊले दाऊदो री आवाज पछयाणी की बोलेया, "ओ मेरे पाऊ दाऊद, क्या ये तेरी आवाज ए?" दाऊदे बोलेया, "आ, मेरे स्वामी राजा, मेरी ई आवाज ए।" 18 तेबे दाऊदे बोलेया, "मेरा स्वामी आपणे दासो रा पीछे कऊँ करने लगी रा? मैं क्या करी राखेया? मांते कुणजी बुराई ऊई री? 19 एबे मेरा स्वामी राजा, आपणे दासो री गल्ला सुणी लो। जे यहोवे तूँ मेरे खलाफ सकेल़ी राखेया, तेबे तो से पेंट मान, पर जे माणूंए एड़ा करी राखेया ओ, तो सेयो यहोवे रिया तरफा ते स्रापित ओ, कऊँकि तिने एबे आऊँ निकयाल़ी ता दा ए, ताकि आऊँ यहोवे री निज जगा दे नि रऊँ ओर तिने बोली राखेया, जा पराये देवतेया री सेवा कर। 20 इजी री खातर मेरा खून यहोवे रिया आखी पीछे जमीना दे नि बह्यी सको, इस्राएलो रा राजा तो एक पिस्सू टोल़ने आई रा, जेड़ा कोई पाह्ड़ो पाँदे तीतरो रा शिकार करोआ।"

21 तेबे शाऊले बोलेया, "मैं पाप करी राखेया, ओ मेरे पाऊ दाऊद वापस आओ, मेरा प्राण आजके दिने तेरी नजरा दे कीमती ठईरी रा, इजी बजा ते मां फेर तेरा नुकशाण नि करना, सुण, मैं मूर्खता करी राखी ओर मांते बड़ी पूल ऊई री।" 22 पर दाऊदे ज्वाब दित्तेया, "ओ राजा, भाल़े खे देख, कोई जवान एती आई की इजी खे लई जाओ। 23 यहोवे एकी-एकी खे आपणे-आपणे तर्म ओर सच्चाईया रा फल देणा, देख, आज यहोवे तूँ मेरे आथो रे करी ता था, पर मैं यहोवे रे अभिषिक्तो रा नुकशाण करना ठीक नि समजेया। 24 इजी री खातर जिंयाँ आज तेरे प्राण मेरी नजरा दे प्यारे ठईरे, तिंयाँ ई मेरे प्राण यहोवे री नजरा दे बी प्यारे ठईरो ओर से माखे सारी मुसीबता ते छुड़ाओ।" 25 तेबे शाऊले दाऊदो ते बोलेया, "ओ मेरे पाऊ दाऊद, तूँ तन्य ए! तां बड़े-बड़े काम करने ओर तेरे काम सफल ऊणे।" तेबे दाऊद आपणी बाटा दे चली गा शाऊल बी आपणी जगा खे आपणे कअरे वापस ऊईगा।