1 सेमुएल 28

1 कुछ बखतो बाद पलिश्तिये इस्राएलो साथे लड़ने खे आपणी सेना कट्ठी कित्ती। तेबे आकीशे दाऊदो खे बोलेया, "तूँ पक्का जाणी लो कि ताखे आपणे जवाना खे लई की मां ओर मेरिया सेना साथे इस्राएलिया रे खलाफ लड़ाई करने जाणा पड़ना।" 2 दाऊदे आकीशो खे बोलेया, "इजी बजा ते तां जाणी लणा कि तेरे दासो क्या करना।" आकीशे दाऊदो खे बोलेया, "इजी बजा ते मां तूँ आपणा खास रक्षक बणाई की सदा खे आपू साथे राखणा।"

शाऊल ओर पूत-सिद्धि करने वाल़ी जवाणस

3 सेमुएल तो कुछ बखत पईले मरी गा था ओर सारे इस्राएलिये तेसरिया तँईं शोग कित्तेया ओर तेसखे तेसरे शईरो रे माट्टी दित्ती थी। शाऊले जादू-टोणा ओर पूतसिद्धि करने वाल़े लोक देशो ते निकयाल़ी ते थे। 4 जेबे पलिश्ती सिपाई कट्ठे ऊए ओर शूनेमो रे डेरे लगाए, तो शाऊले सारे इस्राएली कट्ठे कित्ते ओर तिने गिलबो शईरो दे डेरे लगाए। 5 पलिश्तिया री सेना खे देखी की शाऊल डरीगा ओर तेसरा मन बऊत कबराईगा ओर से थरथराणे लगेया। 6 जेबे शाऊले यहोवे ते पूछेया, तेबे यहोवे ना तो तेसखे सुफने रे जरीये ज्वाब दित्तेया ओर ना ई ऊरीमो रे जरीये ओर ना ई भविष्यबक्तेया रे जरीये। 7 तेबे शाऊले आपणे कर्मचारिया खे बोलेया, "मेरिया तँईं कोई जादू-टोणा करने वाल़ा टोल़ो, ताकि आऊँ तेसगे जाई की तेसते पूछूँ।" तेसरे कर्मचारिये तेसखे बोलेया, "एनदोर जगा दे एक जादू-टोणा करने वाल़ी जवाणस रओई।" 8 तेबे शाऊले आपणा पेष बदलेया ओर दूजे टाल्ले पईनी की दूई माणूंआ खे साथे लई की रातोरात चली की तेसा जादू-टोणा करने वाल़िया जवाणसा गे गया ओर बोलेया, "आपणे जादू-टोणे ते मेरिया तँईं पूछ ओर जेसरा नाओं आऊँ लऊँगा तेसखे बुलाई दे।" 9 जवाणसे बोलेया, "तूँ जाणेया कि शाऊले क्या करी राखेया कि तिने जादू-टोणे वाल़े ओर पूतसिद्धि करने वाल़े लोक देशो ते नाश करीते रे। तेबे तूँ मेरे प्राणो खे फन्दा कऊँ लगाणे लगी रा कि माखे मरवाए।" 10 पर शाऊले यहोवे री कसम खाई की तेसा खे बोलेया, "यहोवे री जिन्दगिया री कसम, इजी गल्ला रिया बजा ते ताखे सजा नि मिलणी।" 11 जवाणसे बोलेया, "आऊँ तेरिया तँईं केसरी आत्मा खे बुलाऊँ?" तिने बोलेया, "सेमुएलो री आत्मा खे मेरिया तँईं बुला।" 12 जेबे जवाणसे सेमुएल देखेया तो डरो रे मारे जोरे-जोरे की चींगणे लगी ओर शाऊलो खे बोलेया, "तैं माखे तोखा कऊँ दित्तेया? तूँ तो शाऊल ए।" 13 राजे तेसा खे बोलेया, "डर नि, ताखे क्या दिशणे लगी रा?" जवाणसे बोलेया, "माखे एक देवता तरतिया ते पाँदे निकल़दा ऊआ दिशणे लगी रा।" 14 शाऊले तेसा ते पूछेया, "तेसरी शक्ल केड़ी ए?" तेसे बोलेया, "एक स्याणा मर्द चोगा पईनी की चढ़ी की आऊणे लगी रा।" तेबे शाऊले पक्का जाणी की कि से सेमुएल ई ए, तिने मूँदे मुंए जमीना दे पड़ी की माथा टेकेया। 15 सेमुएले शाऊलो ते पूछेया, "तैं आऊँ ऊबे कऊँ बुलाई की सताया?" शाऊले बोलेया, "आऊँ बड़ी मुसीबता दे आ, कऊँकि पलिश्ती मां साथे लड़ने लगी रे ओर यहोवे आऊँ छाडीता रा ओर एबे ना तो माखे भविष्यबक्तेया रे जरीये ज्वाब देयोआ ओर ना ई सुफने दे, इजी री खातर मैं तूँ बुलाया ताकि तूँ मांगे बताई दे कि आऊँ क्या करुँ।" 16 सेमुएले बोलेया, "जेबे यहोवा ताखे छाडी की तेरा दुश्मण बणी गा, तेबे तूँ मांते कऊँ पूछणे लगी रा? 17 यहोवे जेड़ा मांते बुलवाया था तेड़ा ई बर्ताओ तां साथे करी राखेया, मतलब तिने तेरे आथो ते राज्य छुड़ाई की तेरे पड़ोसी दाऊदो खे देईता रा। 18 तैं जो यहोवे री गल्ल नि मानी ओर ना अमालेकिया खे तेसरे पड़के रे कोपो रे मुताबिक सजा दित्ती थी, इजी बजा ते यहोवे आज तां साथे एड़ा बर्ताव करी राखेया। 19 यहोवे तां समेत इस्राएली पलिश्तिया रे कब्जे दे करी देणे ओर तूँ आपणे माठेया समेत काल मां साथे ऊणा ओर इस्राएली सेना बी यहोवे पलिश्तिया रे कब्जे दे करी देणी।" 20 तेबे शाऊल तेबुई मुंए रे पारे जमीना दे पड़ीगा ओर सेमुएलो री गल्ला रिया बजा ते बऊत डरीगा। तिने पूरा दिन ओर रात रोटी नि खाई थी, इजी ते तेसदे कोई तागत नि रयी। 21 तेबे से जवाणस शाऊलो गे गयी ओर तेसखे बऊत बेचैन देखी की तेसखे बोलेया, "सुण, तेरी दासिये तो तेरी गल्ल मानी ओर मैं आपणे प्राणो पाँदे खेली की तेरे वचन सुणी ले जो तैं मांते बोले। 22 तो एबे तूँ बी आपणी दासिया री गल्ल मान, आऊँ तां सामणे रोटिया रा एक टुकड़ा राखूँई, तूँ तिजी खे खाई लो, ताकि जेबे तूँ आपणी बाटा रे जाए तेबे ताखे तागत मिलो।" 23 पईले शाऊले खाणा खाणे खे ना कित्ती। पर तेसरे सेवके ओर तेसे जवाणसे मिली की तेस पाँदे इतणा दबाव बणाया कि से तिना री गल्ल मानी की, जमीना ते उठी की माँजे पाँदे बैठी गा। 24 तेती तेसा जवाणसा रे कअरे एक पाल़ेया दा बाच्छू था, तेसे से फटाफट काया ओर पकाया, तेबे आटा लई की बाटेया ओर बिना सजेड़े वाल़िया रोटिया बणाई की 25 शाऊल ओर तेसरे सेवका सामणे ली आई ओर तिने खाया। खाणा खाणे ते बाद सेयो उठी की तेसा ई राती वापस चली गे।