1 सेमुएल 10

1 तेबे सेमुएले एक कुप्पी तेल लई की तेसरे सिरो पाँदे लटी ता ओर तेसखे चूम्मी की बोलेया, "आऊँ ये इजी खे लगी रा करने कि यहोवे आपणे निज पाअगो (इस्राएली लोका) पाँदे परदान ऊणे खे तेरा अभिषेक करी राखेया। 2 आज जेबे तूँ मांगा गे ते चली जाणा, तेबे राहेला रिया कब्रा गे जो बिन्यामीन प्रदेशो रे बन्ने पाँदे सेलसहा जगा दे ए, दो जणे ताखे मिलणे ओर तिना बोलणा, ‘जिना गह्दिया खे टोल़ने तूँ गया था सेयो मिलीगिया ओर सुण, तेरा बाओ गह्दिया री फिकर छाडी की तुसा रिया तँईं फिकर करने लगी रा ओर लोका ते पूछणे लगी रा कि तुसे मेरा पाऊ देखी राखेया?’ 3 तेबे तेथा ते आगे जाई की जेबे तूँ ताबोर जगा दे बड़े डाल़ो गे पऊँचणा, तेबे तीन जणे यहोवे री आराधना करने खे बेतेल जगा खे जांदे ऊए ताखे मिलणे, जिना बीचा ते एकी गे बाकरिया रे तीन बच्चे, दूजे गे तीन रोटिया ओर तीजे गे एक कुप्पी दाखमधु ऊणा। 4 तिना तेरा सुखसाँद पूछणा ओर ताखे दो रोटिया देणियां ओर तैं सेयो तिना रे आथो ते लई लणियां। 5 तेबे तूँ यहोवे रे पाह्ड़ो*10:5 यहोवे रे पाह्ड़ो इब्रानी पाषा दे इना शब्दा रा मतलब ए "गिबेथ-एलोहिम", इना शब्दा रा मतलब ए परमेशरो रा पाह्ड़। एड़ा लगोआ कि ये दर्शाओआ, जो शाऊलो रे कअरो रा शईर ए। पाँदे गिबा शईरो दे पऊँचणा, जेती पलिश्ती लोका री चौकी ए ओर जेबे तूँ तेते शईरो दे जाए, तेबे नबिया रा एक दल पाह्ड़ो पाँदा ते उतरदा ऊआ ताखे मिलणा ओर सेयो सितार, डफली, बँसरी ओर बीणा बजांदे ओर भविष्यबाणी करदे ऊए मिलणे। 6 तेबे यहोवे रा आत्मा पुरिया तागती साथे तां पाँदे उतरना ओर तूँ तिना साथे ऊई की भविष्यबाणी करने लगी जाणा ओर तूँ बदली जाणा ओर तेरा सबाओ बी बदली जाणा। 7 जेबे यो नशाण ताखे दिशणे लगणे, तेबे जो काम करने रा मोका ताखे मिलो तिदे लगी जाणा, कऊँकि यहोवा तां साथे रणा। 8 तैं मांते पईले गिलगाल शईरो खे जाणा ओर मां होमबलि ओर मेलबलि चढ़ाणे तांगे आऊणा। तैं साता दिना तक आऊँ न्याल़ना। तेबे मां तांगे पऊँची की ताखे बताणा कि तां क्या-क्या करना ए।"

9 जिंयाँ ई शाऊले सेमुएलो गे ते जाणे खे पीठ फेरी तिंयाँ ई परमेशरे तेसरा मन बदली ता ओर सेयो सारे नशाण तेस ई दिने प्रगट ऊए। 10 जेबे सेयो तेथी तेस पाह्ड़ो गे गिबा दे आए, तेबे नबिया रा एक दल तेसखे मिलेया ओर यहोवे रा आत्मा तेस पाँदे बडिया तागती साथे उतरेया ओर से तिना साथे भविष्यबाणी करने लगेया। 11 जेबे शाऊलो खे जाणने वाल़ेया इजी रे बारे दे सुणेया कि शाऊल बी भविष्यबाणी करने लगी रा तो सेयो बोलणे लगे, "कीशो रे पाऊए खे ये क्या ऊआ? क्या नबीया बीचे शाऊल बी एक नबी आ?" 12 तेथो रे एकी माणूंए बोलेया, "पला, तिना रा बाओ कुण ए?" इजी पाँदे ये कहावत चलणे लगी, "क्या शाऊल बी नबिया बीचला ए?" 13 जेबे से भविष्यबाणी करी चुकेया, तेबे से आराधना रिया जगा दे ऊबे चलीगा।

14 तेबे शाऊलो रे चाचे तेसते ओर तेसरे सेवको ते पूछेया, "तुसे इतणे दिना तक केई गये थे?" तिने बोलेया, "आसे तो गह्दिया खे टोल़ने गये थे ओर जेबे आसे देखेया कि केथी नि मिलिया, तेबे आसे सेमुएलो गे पूछणे खे गये।" 15 शाऊलो रे चाचे बोलेया, "मांगे बता कि सेमुएले ताखे क्या बोलेया।" 16 शाऊले आपणे चाचे खे बोलेया, "तिने आसा खे निश्चा करी की बताया कि गह्दिया मिलीगी रिया।" पर जो गल्ल सेमुएले राज रे बारे दे बताई थी से तिने तेसगे नि बताई।

राजे रे रूपो दे शाऊलो री घोषणा

17 तेबे सेमुएले इस्राएलो रे लोक मिस्पा जगा दे यहोवे रे नेड़े बुलाए। 18 तेबे तिने इस्राएली लोका खे बोलेया, "इस्राएलो रा परमेशर यहोवा ईंयाँ बोलोआ, आऊँ तो इस्राएलो खे मिस्र देशो ते निकयाल़ी की ल्याया ओर तुसा खे मिस्री लोका रिया गुलामिया ते ओर तिना सबी लोका ते जो तुसा पाँदे अन्देर करो थे छुड़ाए। 19 पर तुसे आज आपणा यहोवा जो सारी मुसीबता ते ओर कष्टो ते तुसा खे छुड़ाणे वाल़ा ए नक्कमा जाणेया ओर तेसखे बोलेया, आसा पाँदे राजा नियुक्त कर। इजी री खातर तुसे आपणे-आपणे गोत्र ओर आपणे-आपणे कुला रे मुताबिक यहोवे रे सामणे खड़े ऊई जाओ।"

20 तेबे सेमुएल इस्राएलो रे सबी गोत्रा खे नेड़े ल्याया ओर पर्ची बिन्यामीन गोत्रो रे नाओं पाँदे निकल़ी। 21 तेबे से बिन्यामीनो रे गोत्रो रे कुल-कुल करी की नेड़े ल्याया ओर पर्ची मत्रीए रे कुलो रे नाओं पाँदे निकल़ी, तेबे पर्ची कीशो रे पाऊ शाऊलो रे नाओं पाँदे निकल़ी, पर जेबे सेयो शाऊलो खे टोल़ने लगे तेबे से तिना खे नि मिलेया। 22 तेबे तिने फेर यहोवे ते पूछेया, "क्या से एती आई रा?" यहोवे बोलेया, "आ, सुणो, से एती समानो बीचे लूकी रा।"

23 तेबे सेयो दौड़ी की शाऊलो खे तेथा ते ल्याये ओर जेबे शाऊल लोका बीचे खड़ा ऊआ तो सेयो सब लोक तेसरे फरकुआ तक ई आओ थे। 24 सेमुएले सबी लोका खे बोलेया, "जो माणूं यहोवे चूणी राखेया, से तुसे देखी ला दा ए कि सबी लोका बीचे तेस जेड़ा कोई नि ए।" तेबे सारे लोक जोरे की बोलणे लगे, "राजा बऊत साला तक जिऊँदा रओ।"

25 तेबे सेमुएले लोका खे दशेया कि एकी राजे रा अक्क ओर फर्ज क्या ए। तिने से सब एकी कताबा दे लिखी की से कताब यहोवे रे सामणे राखी ती। तेबे सेमुएले सबी लोका खे आपणे-आपणे कअरे जाणे खे बोलेया। 26 तेबे शाऊल गिबा शईरो खे आपणे कअरे चली गा ओर तेस साथे एक दल बी गया जिना रा मन यहोवे उभारेया था। 27 पर कई कटीया लोके बोलेया, "एस माणूंए आसे क्या बचाणे?" तिने से नक्कमा जाणेया ओर तेसगे पेंट नि ल्याये। तेबे बी से सुणी अणसुणी करी की चुप रया।