1 एप्रैमी गोत्रो दे एल्काना नाओं रा एक मर्द था, से एप्रैमो रे पाह्ड़ी इलाके रे रामातैन* सौपीम नाओं रे शईरो दे रणे वाल़ा था। से सूफो रे कराने दे तोहूए रा पड़पोता, एलीहूए रा पोता ओर यरोहामो रा पाऊ था। 2 एल्काना रे दो लाड़िया थिया*, एकी रा नाओं हन्ना* ओर दूजिया रा नाओं पन्निना* था। पन्निना रे तो बाल़क ऊए, पर हन्ना रे कोई बच्चा नि ऊआ। 3 से मर्द हर साल आपणे परिवारो समेत आपणे शईरो ते सेना रे यहोवे गे आराधना करने ओर माथा टेकणे ओर मेलबलि चढ़ाणे खे शीलो नाओं री जगा दे जाओ था। तेती एलीए रे दो पाऊ होप्नी ओर पीनहास नाओं रे पुरोईत रओ थे, जो यहोवे खे पुरोईतो रा काम करो थे। 4 जेबे-जेबे एल्काना मेलबलि चढ़ाओ था, तेबे-तेबे से आपणी लाड़ी पन्निना ओर तेसा रे सबी माठे-बेटिया खे बलिया बीचा ते इस्सा देया करो था। 5 पर एल्काना हन्ना ते बऊत प्यार करो था, ओर तेसा खे बलिया बीचा ते दुगणा इस्सा देयो था कऊँकि एबुए तक यहोवे हन्ना खे कोई बी ल्वाद नि दित्ती थी। 6 पर हन्ना री सौकण पन्निना इजी बजअ ते कि यहोवे तेसा खे कोई बी ल्वाद नि दित्ती दी। तेसा खे बऊत चिढ़ाओ थी ओर टोके देयो थी कि ताखे यहोवे कोई ल्वाद नि दित्ती। 7 हर साल एड़ा ई ओ था। जेबे हन्ना यहोवे रे मन्दरो खे जाओ थी, तेबे पन्निना तेसा खे चिढ़ाओ थी। इजी बजा ते से रोणे लगी जाओ थी ओर रोटी नि खाओ थी। 8 तेबे तेसा रे लाड़े एल्काने हन्ना ते पूछेया, "ओ हन्ना, तूँ कऊँ रोणे लगी री, ओर रोटी कऊँ नि खांदी? तूँ इजी खे दु:खी ये कि तेरे कोई बी ल्वाद नि ए। क्या तेरिया तँईं आऊँ दसा पाऊआ ते बी बढ़ी की नि ए?"

9 एक दिन जेबे सेयो शीलो जगा दे यहोवे खे बलिदान चढ़ाई की ओर खाणा खाई-पी चुके तेबे हन्ना उठी ओर प्रार्थना करने खे गई। यहोवे रे मन्दरो दे दरवाजे गे एक कनारे एली पुरोईत गद्दिया पाँदे बैठी रा था। 10 तेबे हन्ना मनो दे बऊत दु:खी ऊई की यहोवे ते प्रार्थना करने लगी ओर जोरे-जोरे की रोणे लगी। 11 तेबे तेसे ये मान्नता मानी, "ओ सेना रे यहोवा, जे तूँ आपणी दासिया पाँदे दया करे ओर मेरी सम्बाल़ लये, ओर आपणी दासिया खे पूली नि जाए ओर आपणी दासिया खे पाऊ दे, तो मां से हमेशा खे यहोवे खे अर्पण करी देणा ओर तेसरे सिरो दे उस्तरा कदी नि लगवाणा।*" 12 जेबे से यहोवे सामणे एड़ी प्रार्थना करने लगी री थी, तेबे एली तेसा रिया तरफा खे त्यानो साथे देखणे लगी रा था। 13 हन्ना मनो ई मनो दे प्रार्थना करने लगी री थी, तेसा रे ओठ तो ईलो थे, पर तेसा री आवाज नि सुणो थी, इजी री खातर एलीए समजेया कि ये नशे देई। 14 तेबे एली पुरोईते तेसा खे बोलेया, "तां कदुओ तक नशे दे रणा? आपणिया ओसा दे आओ।" 15 हन्ने ज्वाब दित्तेया, "ना, ओ मेरे स्वामी, आऊँ तो बऊत दु:खिया ए, मैं तो कोई नशा नि करी राखेया पर मैं आपणे मनो री गल्ल खोली की यहोवे खे बोली राखी। 16 आपणी दासिया खे कटीया जवाणस नि समज, जो कुछ मैं एबुए तक बोली राखेया, से बऊत ई दु:खी ओर परेशान ऊणे रिया बजा ते बोली राखेया।" 17 एली पुरोईते बोलेया, "रामो दे चली जा; जो तैं इस्राएलो रे परमेशरो ते मांगेया से ताखे मिली जाओ।" 18 तेसे ज्वाब दित्तेया, "तेरी दासिया पाँदे तेरी दया ओ।" तेबे से जवाणस चली गी ओर तेसे जाईकी रोटी खाई, ओर से फेर कदी बी दु:खी नि ऊई।

19 एल्काना ओर तेसरा सारा परिवार प्यागा उठी की यहोवे गे माथा टेकी की रामो दे रामाह शईरो खे आपणे कअरो खे चली गे। तेबे एल्काना आपणी जवाणस हन्ना गे गया। तेबे यहोवे तेसा री प्रार्थना सुणी, 20 ओर तेस ई बखते हन्ना गर्भवती ऊई। तेबे तेसा रे सई बखतो दे एक पाऊ ऊआ ओर तेसे तेसरा नाओं सेमुएल राखेया, कऊँकि से बोलणे लगी, "माखे ये परमेशर यहोवे ते मांगी की मिली रा।"

21 हर सालो जेड़े एल्काना आपणे पूरे परिवारो समेत शीलो जगा दे यहोवे री आराधना करने ओर मेलबलि चढ़ाणे ओर आपणी मान्नता पूरी करने खे चलणे लगेया। 22 पर हन्ना आपणे लाड़े खे ये बोली की कअरे ई रयी गी, "जेबे बच्चे दूद पीणा छाडी देणा तेबे मां से आपू यहोवे गे लई जाणा ओर तेती मां से यहोवे खे अर्पण करना ओर से तेती सदा खे रणा।" 23 तेसा रे लाड़े एल्काने तेसा खे ज्वाब दित्तेया, "जो ताखे ठीक लगोआ से कर, जदुओ तक तूँ तेसरा दूद नि छुड़ाए, तदुओ तक एथी रओ; बस इतणा ओ कि यहोवा आपणा वादा पूरा करो।" तेबे से जवाणस तेथी कअरे रयी गी ओर आपणे पाऊए खे पाल़दी रयी। 24 जेबे हन्ने बच्चे रा दूद छुड़ाया, तेबे से तेसखे साथे लईगी ओर तीऊँ साला रा एक बाच्छू, लगभग दस किलो आटा ओर कुप्पी भर शराब बी लईगी ओर से पाऊ शीलो जगा दे यहोवे रे मन्दरो दे पऊँचाई ता, तेस बखते से बच्चा ई था। 25 तेबे तिने बाच्छू बलि करी की से बच्चा एलीए गे पऊँचाई ता। 26 तेबे हन्ने बोलेया, "ओ मेरे स्वामी, तेरी जिन्दगिया री कसम, ओ मेरे स्वामी, आऊँ से ई जवाणस ए जो तांगे एथी खड़े ऊई की यहोवे ते प्रार्थना करुँ थी। 27 ये से ई पाऊ ए जेसखे पाणे रिया तँईं मैं प्रार्थना कित्ती थी ओर यहोवे माखे मूँ मांगेया वरदान देईता। 28 इजी री खातर आऊँ बी तेसखे यहोवे खे अर्पण करी देऊँई, ताकि ये आपणी पूरी जिन्दगी यहोवे रा ई बणेया रा रओ।" तेबे एल्काना ओर तेसरे परिवारे तेती यहोवे री आराधना कित्ती ओर माथा टेकेया।