1 इजी ते बाद सेमुएल मरी गा ओर सारे इस्राएलिये कट्ठे ऊई की तेसरिया तँईं दु:ख मनाया ओर तेसरे कअरे ई जो रामा शईरो दे था, तेसखे माट्टी दित्ती। तेबे दाऊद उठी की आपणे गढ़ो दे पारान बणो खे चली गा।

2 माओन शईरो दे एक माणूं रओ था जेसरा बपार कर्मेलो रिया जगा दे था। से माणूं बऊत ई अमीर था ओर तेसरे 3,000 पेडा, 1,000 बाकरिया थिया ओर से आपणिया पेडा री ऊन कतरने लगी रा था। 3 तेस माणूंए रा नाओं नाबाल ओर तेसरी लाड़िया रा नाओं अबीगैल था। तेसरी लाड़ी अक्लमंद ओर सुन्दर थी, पर से माणूं बुरा ओर नीच था। से कालेबो रे वंशो रा था।

4 जेबे दाऊदो खे सुनसाण जगा दे सन्देश मिलेया कि नाबाल आपणिया पेडा री ऊन कतरने लगी रा, 5 तेबे दाऊदे दस जवान तेती पेजी ते ओर दाऊदे तिना जवाना खे बोलेया, "कर्मेलो दे नाबालो गे जाई की मेरी तरफा ते तेसरी खबर-सम्बाल़ पूछो 6 ओर तेसखे ईंयाँ बोलो कि तेरी लाम्बी उम्र ओ, तेरा कल्याण ओ, तेरा कराना पला-चंगा रओ ओर जो कुछ तेरा ए से अच्छा रओ। 7 मैं सुणी राखेया कि जो ऊन तूँ कतरने लगी रा, कर्मेलो दे तेरे गवाल़े आसा गे रओ थे ओर आसे ना तो तिना रा कोई नुकशाण कित्तेया ओर ना ई तिना रा कुछ राचेया। 8 आपणे जवाना ते ये गल्ल पूछी लो ओर तिना ताखे बताणा। इजी री खातर इना जवाना पाँदे तेरी दया-दृष्टि ओ, आसे तो खुशिया रे बखते आई रे, इजी री खातर जो कुछ ताखे ठीक लगो से आपणे दासा खे ओर आपणे दोस्त दाऊदो खे दे।"

9 एड़िया गल्ला दाऊदो रे जवान तेसरे नाओं ते नाबालो खे सुणाई की तेसरे ज्वाबो रा इंतजार करने लगे। 10 नाबाले दाऊदो रे जवाना खे ज्वाब देई की तिना खे बोलेया, "दाऊद कुण ए? यिशै रा पाऊ कुण ए? आजकाल बऊत सारे दास आपणे-आपणे स्वामिया गे ते नठी जाओए। 11 क्या आऊँ आपणी रोटी-पाणी ओर जो डांगर मैं आपणे कतरने वाल़ेया खे काई राखे लई की एड़े लोका खे देई दूँ, जिना खे आऊँ जाणदा ई नि कि सेयो केथो रे ए?" 12 तेबे दाऊदो रे जवान खाली आथ वापस आपणिया बाटा दे आईगे ओर दाऊदो खे यो सारिया बेज्जत करने वाल़िया सारिया गल्ला सुणाई तिया। 13 तेस ई बखते दाऊदे आपणे जवाना खे बोलेया, "आपणी-आपणी तलवारी बानी लो।" तेबे तिने आपणी-आपणी तलवार बानी ली ओर दाऊदे बी आपणी तलवार बानी ली। तेबे कोई 400 माणूं दाऊदो पीछे-पीछे चले ओर 200 माणूं आपणे समानो री रक्षा करने खे पीछे रयी गे।

14 पर एकी सेवके नाबालो री लाड़ी अबीगैला खे दशेया, "दाऊदे सुनसाण जगा ते म्हारे स्वामिए खे आशीर्वाद देणे खे दूत पेजे थे ओर तिने सेयो बेज्जत कित्ते। 15 पर सेयो माणूं पईले ते ई आसा साथे बऊत अच्छा बर्ताव राखोए ओर जेबे आसे मैदानो दे रंदे बखते तिना गे आया-जाया करुँ थे, तेबे म्हारा कोई नुकशाण नि ऊआ ओर ना ई म्हारा कुछ राचेया। 16 जदुओ तक आसे तिना साथे पेडा-बाकरिया चराऊँ थे, तदुओ तक सेयो रात-दिन म्हारा त्यान राखो थे। 17 इजी री खातर एबे सोच-बिचार कर कि क्या करना चाईयो, कऊँकि तिने म्हारे स्वामिए रा ओर तेसरे सारे कराने रा नुकशाण करने रा ठाणी ला रा ऊणा, से तो एड़ा दुष्ट ए कि तेसगे कोई बोली पनि सकदा।"

18 तेबे अबीगैले फटाफट 200 रोटिया, दो कुप्पी शराब, पाँजा पेडा रा मास, लगभग पच्ची किलो पूजेया रा नज्ज, 100 गुच्छे अंगूर ओर दाऊगल़े रिया 200 टिक्किया गह्देया पाँदे लदाईया 19 ओर तेसे आपणे जवाना खे बोलेया, "तुसे मांते आगे-आगे चलो, आऊँ तुसा पीछे-पीछे आऊँई।" पर तेसे आपणे लाड़े नाबालो गे कुछ नि बताया कि से क्या करने जाणे लगी री। 20 से गह्दे पाँदे चढ़ी की पाह्ड़ो री आड़ा दे उतरने लगी री थी ओर दाऊद आपणे माणूंआ समेत तेसा सामणे उतरने लगी रा था ओर से तिना खे मिली। 21 दाऊदे सोचेया था कि मैं जो सुनसाण जगा दे तेसरे सबी माला री रक्षा एड़ी कित्ती कि तेसरा कुछ नि राचेया, ये सब बेकार ऊआ, कऊँकि तिने पलाईया रे बदले मां साथे बुराई ई कित्ती। 22 आऊँ कसम खाऊँआ कि प्रयासा ऊणे तक तेस माणूंए रे सारे लोका बीचे एकी माणूंए खे बी आऊँ जिऊँदा छाडूं, तो यहोवा दाऊदो साथे सेई बर्ताओ करो बल्कि इजी ते बी जादा सख्त बर्ताओ करो।

23 दाऊदो खे देखी की अबीगैल फटाफट गह्दे पाँदा ते थाले उतरी ओर दाऊदो सामणे मुंए रे पारे जमीना दे पड़ी की तेसगे माथा टेकेया। 24 तेबे से तेसरे पैरा पाँदे पड़ी की बोलणे लगी, "ओ मेरे स्वामी, ये अपराध मेरे ई सिरो पाँदे ओ, तेरी दासी तांते कुछ बोलणा चाओई ओर तूँ आपणी दासिया री गल्ल सुणी लो। 25 मेरा स्वामी तेस दुष्ट नाबालो पाँदे आपणा त्यान नि लगाओ, कऊँकि जेड़ा तेसरा नाओं ए तेड़ा ई से आपू ए, तेसरा नाओं तो नाबाल ए ओर सच्ची तेसदे मूर्खता ए, पर मैं तेरी दासिये स्वामिए रे जवान जो तैं पेजे थे, देखी नि राखे थे। 26 एबे, यहोवे री जिन्दगिया री कसम। ओ स्वामी ओर तेरी जिन्दगिया री कसम! यहोवे ई तूँ अत्या रे दोषो ते बचाया। तूँ आपणे आथो रे जरीये आपणा बदला लणे ते रोकी राखेया। यहोवा तेरे सबी दुश्मणा खे, तेरी बुराई करने री ताका दे रणे वाल़ेया खे, नाबालो जेड़े बणाई देयो। 27 एबे ये पेंट जो तेरी दासी आपणे स्वामिए गे ल्याई राखी, तिना जवाना खे देयो जो मेरे स्वामिए साथे हांडोए। 28 आपणी दासिया रा अपराध माफ कर, कऊँकि यहोवे जरूर तूँ राजा बनाणा ओर स्थिर करना, कऊँकि तूँ हमेशा यहोवे रिया तरफा ते लड़ेया ए ओर पूरी जिन्दगी तांदे कोई बुराई नि ऊणी। 29 तेबे बी एक माणूं तेरा पीछा करने खे ओर तेरे प्राणो रा ग्राह्क ऊणे खे उठी रा, तेबे बी मेरे स्वामिए रा प्राण तेरे परमेशर यहोवे री जीवनरूपी गाठड़िया दे बानेया दा रणा ओर तेरे दुश्मणा रे प्राण मानो खरेबणो दे राखी की सेटी देणे। 30 इजी री खातर जेबे यहोवे ताखे यो सारिया पलाईया करनिया जो तिने तांते जो वादा करी राखेया ओर तूँ इस्राएलो पाँदे परदान ठईराणा, 31 तेबे स्वामी, ताखे दु:ख या परेशानी नि ऊणी कि तैं बिना बजा ते केसी रा खून कित्तेया या बदला लया। जेबे यहोवा तेरी मताद करोगा, तेबे ओ स्वामी, तेबे आपणी दासिया खे बी याद राखेया।"

32 दाऊदे अबीगैला खे बोलेया, "इस्राएलो रा यहोवा तन्य ए, जिने आजके दिने तूँ मां साथे मिलणे खे पेजी। 33 तेरा विवेक तन्य ए ओर तूँ आपू बी तन्य ए कि तैं आऊँ आजके दिने बेकसूरा रा खून करने ओर आपणा बदला लणे ते बचाया। 34 कऊँकि सच्चो खे ई इस्राएलो रा परमेशर यहोवा, जिने आऊँ तेरा नुकशाण करने ते रोकेया, तेसरी जिन्दगिया री कसम, जे तूँ फटाफट मां साथे मिलणे नि आऊँदी, तो बिना कोई शक प्यागा प्रयासा ऊणे तक नाबालो रा कोई माणूं नि बचणा था।" 35 तेबे दाऊदे से लया जो से तेसखे ल्याई थी, तेबे तिने तेसा खे बोलेया, "आपणे कअरे रामो दे जा, सुण, मैं तेरी गल्ल ओर तेरी बिनती मानी ली री।" 36 तेबे अबीगैल नाबालो गे वापस चली गी ओर तेबे से क्या देखोई कि से कअरे राजे री जिया पाट्टिया करने लगी रा ओर नाबालो रा मन मगन ए ओर से नशे दे बऊत चूर ऊईगा रा, इजी री खातर तेसे प्यागा रा प्रयासा ऊणे तक तेसखे कुछ नि बोलेया। 37 प्यागा जेबे नाबालो रा नशा उतरेया, तेबे अबीगैले तेसगे दाऊदो रिया गल्ला बताईया। ये सुणी की नाबालो रे दिलो री तड़कन रूकी गी! ओर से सुन्न पड़ीगा। 38 तेबे दसा दिना ते बाद यहोवे नाबाल एड़ा मारेया कि से मरी गा।

39 जेबे दाऊदे सुणेया कि नाबाल मरीगा, तेबे तिने बोलेया, "तन्य ए यहोवा! नाबाले मेरी बेज्जती कित्ती थी, जेतेरा बदला आपू यहोवे तेसते लई ला, ओर माखे, आपणे दासो खे बुराई करने ते रोकेया। यहोवे नाबालो री बुराईया रा नतीजा तेसरे ई सिरो पाँदे पाया।" तेते ते बाद दाऊदे अबीगैला गे इजी खे आपणे दूत पेजे कि सेयो तेसा ते दाऊदो साथे ब्या करने खे गल्ल बात करो। 40 जेबे दाऊदो रे सेवक कर्मेलो दे अबीगैला गे पऊँचे, तेबे तेसा खे बोलणे लगे, "दाऊदे आसे तांगे इजी खे पेजी राखे कि तूँ तेसरी लाड़ी बणे।" 41 तेबे अबीगैल उठी। तेसे सिर चुकाई की तिना रा स्वागत कित्तेया ओर बोलेया, "आऊँ तुसा री दासी ए। आपणे स्वामी दाऊदो रे सेवका रे पैर तोणे खे ये दासी त्यार ए।" 42 तेबे अबीगैल फटाफट उठी ओर गह्दे पाँदे चढ़ी ओर तेसा रिया पाँज सेलिया तेसा पीछे-पीछे चली पड़िया; से दाऊदो रे दूता पीछे-पीछे चली पड़ी ओर तेसरी लाड़ी बणीगी। 43 तेबे दाऊदे यिज्रेल शईरो री अहीनोअमा साथे बी ब्या करी ला, तेबे सेयो दोनो तेसरी लाड़िया ऊईगिया। 44 पर शाऊले आपणी बेटी मीकल जो पईले दाऊदो री लाड़ी थी से लैशो रे पाऊ पलतीए खे देईती थी जो गल्लीम शईरो रा रणे वाल़ा था।