1 सेमुएल 29

दाऊदो पाँदे पलिश्तिया रा शक करना

1 पलिश्तिये आपणी सारी सेना अपेक शईरो दे कट्ठी कित्ती ओर इस्राएलिये यिज्रेल काट्टिया रे नेड़े री सूबल़ा गे डेरे लगाई राखे थे। 2 तेबे पलिश्तिया रे सरदारे आपणे-आपणे सैनिक 100 ओर 1,000 दे बांडी ते ओर सेना पीछे-पीछे आकीशो साथे दाऊद बी आपणी सेना साथे आगे बढ़ी गा। 3 तेबे पलिश्ती सेना रे परदाने पूछेया, "ये इब्रानी सिपाई एती क्या करने लगी रे?" आकीशे तिना सेना रे परदाना खे बोलेया, "ये दाऊद ए, इस्राएलो रे राजा शाऊलो रा कर्मचारी ए, ये एकी-दूई साला ते मां साथे आ। जदुओ ते ये शाऊलो खे छाडी की मांगे आई रा, तदुओ ते आजो तक मैं एसदे कोई दोष नि पाई राखेया।" 4 पर पलिश्ती परदान तेसते बड़े रोषे ऊए ओर तेसखे बोलेया, "एस मर्दो खे वापस पेजी दे कि से तेसा जगा दे जाओ जो तैं तेसखे ठराई राखी, से आसा साथे लड़ाईया दे नि आओ, केथी एड़ा नि ओ कि से लड़ाईया दे म्हारा बिरोदी बणी जाओ। तेबे तेस आपणे स्वामिए साथे केस रीतिया ते मेल करना? क्या लोका रे सिर कटवाई की नि करना? 5 क्या तुसे पूली गे कि ये सेई दाऊद ए। जेसरे बारे दे लोक नाचदे ओर गांदे ऊए एकी-दूजे खे बोलो थे कि शाऊले ह्जार, पर दाऊदे दस ह्जार काये।"

6 तेबे राजा आकीशे राजा दाऊदो खे बुलाई की तेसखे बोलेया, "यहोवे री जिन्दगिया री कसम तूँ तो पला माणूं ए ओर सेना साथे तेरा मां साथे आऊणा-जाणा ठीक लगोआ, कऊँकि जदुओ ते तूँ मांगे आया, तदुओ ते लई की आजो तक मैं तो तांदे कोई बुराई नि देखी। तेबे बी सरदार लोक ताखे नि चांदे। 7 एबे तूँ रामो दे सिकलगो दे आपणे कअरो खे चली जा, एड़ा नि ओ कि पलिश्ती सरदार तांते नराज ओ।" 8 दाऊदे राजा आकीशो खे बोलेया, "मैं क्या गल़त करी राखेया? ओर जदुओ ते आऊँ तां सामणे आया तदुओ ते आजो तक तैं आपणे दासो दे क्या बुराई देखी राखी कि आपणे स्वामी राजे रे दुश्मणा ते लड़ी नि सकूँ?" 9 आकीशे दाऊदो खे बोलेया, "आ, ये माखे पता ए, तूँ मेरी नजरा दे यहोवे रे दूतो जेड़ा अच्छा लगोआ, तेबे बी पलिश्ती परदाने बोली राखेया कि से आसा साथे लड़ाईया दे नि जाओ। 10 इजी री खातर एबे तूँ आपणे स्वामिए रे सेवका खे लई की जो तां साथे आई रे प्यागा तड़के उठेया ओर तुसे प्रयासा ऊँदे ई चली जाएओ।" 11 तेबे प्यागा दाऊद आपणे माणूंआ समेत तड़के उठी की पलिश्तिया रे देशो खे वापस ऊईगा। तेबे पलिश्ती यिज्रेलो दे चढ़ीगे।